ಯುಪಿಯನ್ನು ಹಿಮ್ಮೆಟ್ಟಿಸಿದ ತಲೈವಾಸ್‌

Team Udayavani, Nov 3, 2018, 6:00 AM IST

ಗ್ರೇಟರ್‌ ನೋಯ್ಡಾ: ಗ್ರೇಟರ್‌ ನೋಯ್ಡಾ ಚರಣದ ಮೊದಲ ಪ್ರೊ ಕಬಡ್ಡಿ ಪಂದ್ಯದಲ್ಲಿ ಅಜಯ್‌ ಠಾಕೂರ್‌ ನಾಯಕತ್ವದ ತಮಿಳ್‌ ತಲೈವಾಸ್‌ ತಂಡ ಯುಪಿ ಯೋಧಾಸ್‌ ತಂಡವನ್ನು 46-24 ಅಂಕಗಳ ಭಾರೀ ಅಂತರದಿಂದ ಸೋಲಿಸಿದೆ. ಆಟದ ಪ್ರತಿಯೊಂದು ವಿಭಾಗದಲ್ಲೂ ತಲೈವಾಸ್‌ ಸ್ಪಷ್ಟ ಮೇಲುಗೈ ಸಾಧಿಸಿತು. 

ದಿನದ ದ್ವಿತೀಯ ಪಂದ್ಯದಲ್ಲಿ ಗುಜರಾತ್‌ ಫಾರ್ಚೂನ್‌ಜೈಂಟ್ಸ್‌ ತಂಡ 36-25 ಅಂಕಗಳಿಂದ ಜೈಪುರ್‌ ಪಿಂಕ್‌ ಪ್ಯಾಂಥರ್ಗೆ ಸೋಲುಣಿಸಿತು. ತಮಿಳ್‌ ತಂಡದ ಪರ ಕನ್ನಡಿಗ ಸುಕೇಶ್‌ ಹೆಗ್ಡೆ ಸಖತ್‌ ಮಿಂಚಿದರು. ಅವರು 12 ದಾಳಿಗಳನ್ನು ನಡೆಸಿ 9 ಅಂಕ ಗಳಿಸಿದರು. ಇವರಿಗೆ ಬಲವಾದ ಬೆಂಬಲ ನೀಡಿದ ನಾಯಕ ಅಜಯ್‌ ಠಾಕೂರ್‌, ದಾಳಿ ಮೂಲಕ 9 ಅಂಕ ಗಳಿಸಿದರು. ಇವರಿಬ್ಬರ ಆಟ ತಮಿಳ್‌ ತಲೈವಾಸ್‌ ಮೇಲುಗೈಗೆ ಕಾರಣವಾಯಿಯಿತು. ಇವರಿಗೆ ರಕ್ಷಣೆಯಲ್ಲಿ ಮಂಜೀತ್‌ ಚಿಲ್ಲರ್‌ ನೆರವಾದರು. ಅವರು 14 ಯತ್ನಗಳಲ್ಲಿ 8 ಅಂಕ ಗಳಿಸಿದರು. ರಕ್ಷಣೆಯಲ್ಲೂ ತಮಿಳ್‌ ತಂಡ ಪ್ರಬಲವಾದ ಕೋಟೆ ಕಟ್ಟಿದ್ದರಿಂದ ಯುಪಿ ಪರದಾಡಿತು.

ಯುಪಿ ಪರ ಪ್ರಶಾಂತ್‌ ಕುಮಾರ್‌ ರೈ ದಾಳಿಯಲ್ಲಿ ಮಿಂಚಿದರು. ಅವರು 12 ಬಾರಿ ತಮಿಳ್‌ ಕೋಟೆಗೆ ಕಾಲಿಟ್ಟು 7 ಅಂಕಗಳನ್ನು ಬುಟ್ಟಿಗೆ ಹಾಕಿದರು. ರಕ್ಷಣೆಯಲ್ಲಿ ಗಮನ ಸೆಳೆದದ್ದು ಜೀವ ಕುಮಾರ್‌ ಮಾತ್ರ. ಯುಪಿಗೆ ಹೊಡೆತವಾಗಿ ಪರಿಣಮಿಸಿದ್ದು ನಾಯಕ ರಿಷಾಂಕ್‌ ದೇವಾಡಿಗ ಅವರ ವೈಫ‌ಲ್ಯ. ರಿಷಾಂಕ್‌ ದಾಳಿಯಲ್ಲಿ ಪೂರ್ಣವಾಗಿ ವಿಫ‌ಲ ರಾದರು. ಒಂದೂ ಅಂಕ ಗಳಿಸಲು ಅವರಿಂದಾಗಲಿಲ್ಲ.

ಇದು ತಮಿಳ್‌ ತಂಡಕ್ಕೆ 9 ಪಂದ್ಯಗಳಲ್ಲಿ ಒಲಿದ ಮೂರನೇ ಜಯ. ಇನ್ನುಳಿದ 6 ಪಂದ್ಯಗಳಲ್ಲಿ ಸೋಲನುಭವಿಸಿದೆ. ಇನ್ನೊಂದೆಡೆ 8 ಪಂದ್ಯವಾಡಿರುವ ಯುಪಿಗೆ ಇದು 4ನೇ ಸೋಲು. ಅದು 3 ಪಂದ್ಯದಲ್ಲಿ ಗೆಲುವು ಸಾಧಿಸಿದೆ. ಒಂದು ಪಂದ್ಯ ಟೈ ಆಗಿದೆ.

ಇಂದಿನ ಪಂದ್ಯಗಳು
ಯು ಮುಂಬಾ-ಪುಣೇರಿ  8 ಗಂಟೆ
ಯುಪಿ-ಬೆಂಗಳೂರು      9 ಗಂಟೆ