ಎಟಿಪಿ ಫೈನಲ್ಸ್‌: ಡೆಲ್‌ಪೆಟ್ರೊ ಬದಲು ನಿಶಿಕೊರಿಗೆ ಅವಕಾಶ

Team Udayavani, Nov 5, 2018, 6:05 AM IST

ಲಂಡನ್‌: ಮೊಣಕಾಲು ನೋವಿನಿಂದಾಗಿ ಜುವಾನ್‌ ಮಾರ್ಟಿನ್‌ ಡೆಲ್‌ ಪೆಟ್ರೊ ಲಂಡನ್‌ನಲ್ಲಿ ನಡೆಯಲಿರುವ ಎಟಿಪಿ ಫೈನಲ್ಸ್‌ ಟೆನಿಸ್‌ ಕೂಟದಿಂದ ಹೊರಬಂದಿದ್ದಾರೆ.ಡೆಲ್‌ ಪೊಟ್ರೊ ಬದಲು ಜಪಾನಿನ ಕೀ ನಿಶಿಕೊರಿಗೆ ಅವಕಾಶ ಸಿಕ್ಕಿದೆ.

ಇದು ವರ್ಷಾಂತ್ಯದ 8 ಅಗ್ರ ರ್‍ಯಾಂಕಿಂಗ್‌ ಆಟಗಾರರ ನಡುವಿನ ಪ್ರತಿಷ್ಠಿತ ರ್ಯಾಕೆಟ್‌ ಸಮರವಾಗಿದೆ. ನೊವಾಕ್‌ ಜೊಕೋವಿಕ್‌, ರಫೆಲ್‌ ನಡಾಲ್‌, ರೋಜರ್‌ ಫೆಡರರ್‌, ಅಲೆಕ್ಸಾಂಡರ್‌ ಜ್ವೆರೇವ್‌, ಕೆವಿಸ್‌ ಆ್ಯಂಡರ್ಸನ್‌, ಮರಿನ್‌ ಸಿಲಿಕ್‌ ಹಾಗೂ ಡೊಮಿನಿಕ್‌ ಥೀಮ್‌ ಜತೆಗೆ ಈಗ ಜಪಾನಿನ ನಿಶಿಕೊರಿ ಸೇರಿಕೊಂಡಿದ್ದಾರೆ. ಡೆಲ್‌ ಪೆಟ್ರೊ ಈ ಅಗ್ರ 8ರಲ್ಲಿ ಸ್ಥಾನ ಪಡೆದು ಈ ಕೂಟಕ್ಕೆ ಆಯ್ಕೆ ಆಗಿದ್ದರು. ಆದರೆ ಈಗ ಕಾಲಿನ ಸಮಸ್ಯೆ ಉಲ್ಬಣಿಸಿದ ಕಾರಣ ಹೊರಬರುವ ನಿರ್ಧಾರಕ್ಕೆ ಬಂದರು. ನವೆಂಬರ್‌ 11ರಂದು ಈ ಕೂಟ ಆರಂಭವಾಗಲಿದೆ.

“ಲಂಡನ್‌ ಓಪನ್‌ನಲ್ಲಿ ಸ್ಪರ್ಧಿಸಲು ಸಾಧ್ಯವಾಗದೇ ಇರುವುದು ಹತಾಶೆ ಮೂಡಿಸಿದೆ. ಈ ಟೂರ್ನಿ ನನಗೆ ವಿಶೇಷವಾಗಿದ್ದು, ಅದಷ್ಟು ಬೇಗ ಗುಣಮುಖನಾಗಲು ಪ್ರಯತ್ನ ಪಡುತ್ತೇನೆ. ಚಿಕಿತ್ಸೆಯು ಉತ್ತಮ ರೀತಿಯಲ್ಲಿ ನಡೆಯುತ್ತಿದೆ. ಚೇತರಿಸಿಕೊಳ್ಳಲು ಇನ್ನಷ್ಟು ಸಮಯದ ಅಗತ್ಯವಿದೆ’ ಎಂದು ಪೆಟ್ರೊ ತಿಳಿಸಿದ್ದಾರೆ.

ಋತುವಿನ ಅಂತಿಮ ಕೂಟವಾದ “ಎಟಿಪಿ ಫೈನಲ್ಸ್‌’ನಲ್ಲಿ ನಿಶಿಕೊರಿ 4ನೇ ಬಾರಿ ಸ್ಪರ್ಧಿಸುತ್ತಿದ್ದಾರೆ. ಅವರು 2014 ಹಾಗೂ 2016ರಲ್ಲಿ ಸೆಮಿಫೈನಲ್‌ ಪ್ರವೇಶಿಸಿದ್ದರು.