ಚೀನದಿಂದ ವಿಶ್ವದ ಪ್ರಥಮ Artificial intelligence news anchor

Team Udayavani, Nov 9, 2018, 4:38 PM IST

ಬೀಜಿಂಗ್‌ : ವಿಶ್ವದ ಮೊತ್ತ ಮೊದಲ ಆರ್ಟಿಫಿಶಿಯಲ್‌ ಇಂಟೆಲಿಜೆನ್ಸ್‌ (ಕೃತಕ ಬುದ್ಧಿಮತ್ತೆ) ನ್ಯೂಸ್‌ ಆ್ಯಂಕರ್‌ ಅನ್ನು ಚೀನ ಅನಾವರಣಗೊಳಿಸಿದೆ.

ಮೊನ್ನೆ ಬುಧವಾರ ವೂಝೆನ್‌ ನಲ್ಲಿ ನಡೆದಿದ್ದ ವಿಶ್ವ ಅಂತರ್‌ಜಾಲ ಸಮಾವೇಶದಲ್ಲಿ ಕ್ಸಿನ್‌ಹುವಾ ಸುದ್ದಿ ಸಂಸ್ಥೆ ಈ ಕೃತಕ ಬುದ್ಧಿಮತ್ತೆಯ ನ್ಯೂಸ್‌ ಆ್ಯಂಕರನ್ನು ವಿಶ್ವಕ್ಕೆ ಪರಿಚಯಿಸಿದೆ.

ಕೃತಕ ಬುದ್ಧಿಮತ್ತೆ (ಎಐ) ಯ ಈ ನ್ಯೂಸ್‌ ಆ್ಯಂಕರನ್ನು ಚೀನದ ಕ್ಸಿನ್‌ಹುವಾ ಮತ್ತು ಸರ್ಚ್‌ ಇಂಜಿನ್‌ ಕಂಪೆನಿ ಸೊಗೋವ್‌ ಜತೆಗೂಡಿ ಅಭಿವೃದ್ಧಿ ಪಡಿಸಿವೆ. 

ಇಂಗ್ಲಿಷ್‌ ಮಾತನಾಡುವ ಈ ಕೃತಕ ಬುದ್ಧಿ ಮತ್ತೆಯ ನ್ಯೂಸ್‌ ಆ್ಯಂಕರ್‌ ತನ್ನ ಮುಂದಿದ್ದ  ಕ್ಯಾಮೆರಾದಲ್ಲಿ ಕಂಡು ಬಂದ ಪಠ್ಯವನ್ನು ಓದುವ ಮೂಲಕ ತನ್ನನ್ನು ಪರಿಚಯಿಸಿಕೊಂಡಿದ್ದಾನೆ.

ಕ್ಸಿನ್‌ ಹುವಾ ಸುದ್ದಿ ಸಂಸ್ಥೆಯ ನಿಜ ನ್ಯೂಸ್‌ ಆ್ಯಂಕರ್‌ ಆಗಿರುವ ಝಾಂಗ್‌ ಝಾವೋ ಅವರನ್ನು ಹೋಲುವ ರೀತಿಯಲ್ಲಿ ಈ ಕೃತಕ ಬುದ್ಧಿಮತ್ತೆ ನ್ಯೂಸ್‌ ಆ್ಯಂಕರನ್ನು ವಿನ್ಯಾಸಗೊಳಿಸಲಾಗಿದೆ. 

ಈ ಕೃತಕ ಬುದ್ಧಿ ಮತ್ತೆಯ ನ್ಯೂಸ್‌ ಆ್ಯಂಕರ್‌ (ರೋಬೋಟ್‌) ತನ್ನನ್ನು ಇಂಗ್ಲಿಷ್‌ನಲ್ಲಿ ಪರಿಚಯಿಸಿಕೊಂಡ ರೀತಿ ಹೀಗಿದೆ : 

“Hello everyone, I am an English Artificial Intelligence anchor. This is my very first day in Xinhua News agency. My voice and appearance are modelled on Zhang Zhao, a real anchor with Xinhua,” 

ಮುಂದುವರಿದು ಈ ಮಾಡೆಲ್‌ ನ್ಯೂಸ್‌ ಆ್ಯಂಕರ್‌ ಇಂಗ್ಲಿಷಿನಲ್ಲಿ  ಹೇಳಿದ್ದು ಹೀಗೆ : 

ಮಾಧ್ಯಮ ರಂಗದ ಅಭಿವೃದ್ಧಿಯು ನಿರಂತರ ಹೊಸ ಹೊಸ ಅನ್ವೇಷಣೆಗಳನ್ನು ಅಪೇಕ್ಷಿಸುತ್ತಿದೆ; ಅಂತೆಯೇ ಅತ್ಯಾಧುನಿಕ ಅಂತಾರಾಷ್ಟ್ರೀಯ ತಂತ್ರಜ್ಞಾನದೊಂದಿಗೆ ಸಮ್ಮಿಳಿತವಾಗುತ್ತಿದೆ. ಅಂತೆಯೇ ನನ್ನೊಳಗಿನ ಕಂಪ್ಯೂಟರ್‌ ವ್ಯವಸ್ಥೆಗೆ ಉಣಿಸಿರುವಂತಹ ಸಂಗತಿಗಳನ್ನು ನಾನು ನಿಮಗೆ ತಿಳಿಸಲು ನಾನು ಅವಿರತವಾಗಿ ಕೆಲಸ ಮಾಡುತ್ತಿರುತ್ತೇನೆ’

“ನಿಮಗೆ ನಿರಂತರ ಹೊಚ್ಚ ಹೊಸ ಸುದ್ದಿಯ ಅನುಭವವನ್ನು ನೀಡುವುದನ್ನು ನಾನು ಎದುರು ನೋಡುತ್ತಿದ್ದೇನೆ’.