ಮಿಥಾಲಿ ಮಿಂಚು; ಭಾರತಕ್ಕೆ ಶರಣಾದ ಪಾಕ್‌

Team Udayavani, Nov 13, 2018, 6:00 AM IST

ಪ್ರೊವಿಡೆನ್ಸ್‌ (ಗಯಾನಾ): ಅನುಭವಿ ಆಟಗಾರ್ತಿ ಮಿಥಾಲಿ ರಾಜ್‌ ಅವರ ಅರ್ಧ ಶತಕದ ಸಾಹಸದಿಂದ ರವಿವಾರ ರಾತ್ರಿಯ ವನಿತಾ ಟಿ20 ವಿಶ್ವಕಪ್‌ ಪಂದ್ಯದಲ್ಲಿ ಭಾರತ ತಂಡ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ಥಾನವನ್ನು 7 ವಿಕೆಟ್‌ಗಳಿಂದ ಮಣಿಸಿದೆ.

ಮೊದಲು ಬ್ಯಾಟಿಂಗ್‌ ನಡೆಸಿದ ಪಾಕಿಸ್ಥಾನ, ಭಾರತದ ಕಳಪೆ ಕ್ಷೇತ್ರರಕ್ಷಣೆಯ ಲಾಭವನ್ನೆತ್ತಿ 7 ವಿಕೆಟಿಗೆ 133 ರನ್‌ ಗಳಿಸಿತು. ಭಾರತ 19 ಓವರ್‌ಗಳಲ್ಲಿ ಮೂರೇ ವಿಕೆಟಿಗೆ 137 ರನ್‌ ಬಾರಿಸಿ ಸತತ 2ನೇ ಜಯವನ್ನು ಒಲಿಸಿಕೊಂಡಿತು. ಇದಕ್ಕೂ ಮುನ್ನ ಹರ್ಮನ್‌ಪ್ರೀತ್‌ ಪಡೆ ನ್ಯೂಜಿಲ್ಯಾಂಡನ್ನು ಕೆಡವಿತ್ತು. ಇನ್ನೊಂದೆಡೆ ಪಾಕಿಸ್ಥಾನ ಸತತ 2 ಪಂದ್ಯಗಳಲ್ಲೂ ಸೋಲನುಭವಿಸಿದ್ದು, ನಾಕೌಟ್‌ ಹಾದಿ ಬಹುತೇಕ ಮುಚ್ಚಿದೆ. ಮೊದಲ ಮುಖಾಮುಖೀಯಲ್ಲಿ ಅದು ಆಸ್ಟ್ರೇಲಿಯಕ್ಕೆ ಶರಣಾಗಿತ್ತು.

ಸತತ 2 ಜಯದಿಂದಾಗಿ ಆಸ್ಟ್ರೇಲಿಯ ಮತ್ತು ಭಾರತ ತಂಡಗಳು “ಬಿ’ ವಿಭಾಗದಲ್ಲಿ ಮೊದಲೆರಡು ಸ್ಥಾನದಲ್ಲಿವೆ. ಆಸೀಸ್‌ ರನ್‌ರೇಟ್‌ನಲ್ಲಿ ಭಾರತಕ್ಕಿಂತ ಮುಂದಿದೆ. ಭಾರತ 1.162, ಆಸ್ಟ್ರೇಲಿಯ 3.73 ರನ್‌ರೇಟ್‌ ಹೊಂದಿದೆ.

ಭಾರತಕ್ಕೆ 10 ಪೆನಾಲ್ಟಿ ರನ್‌!
ಚೇಸಿಂಗ್‌ ಆರಂಭಿಸುವ ಮೊದಲೇ ಭಾರತದ ಖಾತೆಗೆ 10 ಪೆನಾಲ್ಟಿ ರನ್‌ ಸೇರ್ಪಡೆಯಾದದ್ದು ಈ ಪಂದ್ಯದ ವಿಶೇಷ. ಬ್ಯಾಟಿಂಗ್‌ ವೇಳೆ ಪಾಕಿಸ್ಥಾನಿ ಆಟಗಾರ್ತಿಯರು 2 ಸಲ ಪಿಚ್‌ನ ಅಪಾಯಕಾರಿ ಜಾಗದಲ್ಲಿ ಓಡಿದ್ದೇ ಇದಕ್ಕೆ ಕಾರಣ. ತಲಾ 5 ರನ್ನಿನಂತೆ 10 ರನ್ನನ್ನು ದಂಡದ ರೂಪದಲ್ಲಿ ತೆತ್ತ ಪಾಕ್‌ ಆಟಗಾರ್ತಿಯರು ಕೊನೆಗೆ ಸೋಲಿನ ದಂಡವನ್ನು ತೆರಬೇಕಾಯಿತು. ಪಾಕ್‌ ಬ್ಯಾಟಿಂಗ್‌ ವೇಳೆ ಭಾರತ 5 ಕ್ಯಾಚ್‌ಗಳನ್ನು ನೆಲಕ್ಕೆ ಚೆಲ್ಲಿ ತನ್ನ ಕಳಪೆ ಕ್ಷೇತ್ರರಕ್ಷಣೆ ಪ್ರದರ್ಶಿಸಿತ್ತು.

ಮಿಥಾಲಿ ಅರ್ಧ ಶತಕ
ನ್ಯೂಜಿಲ್ಯಾಂಡ್‌ ಎದುರಿನ ಮೊದಲ ಪಂದ್ಯದಲ್ಲಿ ಬ್ಯಾಟಿಂಗಿಗೆ ಇಳಿಯದಿದ್ದ ಮಿಥಾಲಿ ರಾಜ್‌ ಪಾಕ್‌ ಎದುರು ಇನ್ನಿಂಗ್ಸ್‌ ಆರಂಭಿಸಿ 47 ಎಸೆತಗಳಿಂದ 56 ರನ್‌ ಸಿಡಿಸಿದರು. ಈ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌ನಲ್ಲಿ 7 ಬೌಂಡರಿ ಸೇರಿತ್ತು. ಸ್ಮತಿ ಮಂಧನಾ ಕೂಡ ಉತ್ತಮ ಬ್ಯಾಟಿಂಗ್‌ ಪ್ರದರ್ಶನ ನೀಡಿ ಮೊದಲ ವಿಕೆಟಿಗೆ 9.3 ಓವರ್‌ಗಳಿಂದ 73 ರನ್‌ ಗಳಿಸುವಲ್ಲಿ ನೆರವಾದರು. ಮಂಧನಾ ಗಳಿಕೆ 26 ರನ್‌ (28 ಎಸೆತ, 4 ಬೌಂಡರಿ). 18ರ ಹರೆಯದ ಜೆಮಿಮಾ ರೋಡ್ರಿಗಸ್‌ 21 ಎಸೆತಗಳಿಂದ 16 ರನ್‌ ಮಾಡಿದರು (1 ಬೌಂಡರಿ).
ಭಾರತದ ಗೆಲುವಿನ ವೇಳೆ ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ 14 ರನ್‌, ವೇದಾ ಕೃಷ್ಣಮೂರ್ತಿ 8 ರನ್‌ ಗಳಿಸಿ ಅಜೇಯರಾಗಿದ್ದರು.

ಭಾರತ ತನ್ನ ಮುಂದಿನ ಪಂದ್ಯವನ್ನು ಗುರುವಾರ ಅಯರ್‌ಲ್ಯಾಂಡ್‌ ವಿರುದ್ಧ ಆಡಲಿದೆ.

ಸಂಕ್ಷಿಪ್ತ ಸ್ಕೋರ್‌: ಪಾಕಿಸ್ಥಾನ-7 ವಿಕೆಟಿಗೆ 133 (ಬಿಸ್ಮಾ ಮರೂಫ್ 53, ನಿದಾ ದರ್‌ 52, ಪೂನಂ ಯಾದವ್‌ 22ಕ್ಕೆ 2, ಡಿ. ಹೇಮಲತಾ 34ಕ್ಕೆ 2). ಭಾರತ-19 ಓವರ್‌ಗಳಲ್ಲಿ 3 ವಿಕೆಟಿಗೆ 137 (ಮಿಥಾಲಿ ರಾಜ್‌ 56, ಸ್ಮತಿ ಮಂಧನಾ 26, ಜೆಮಿಮಾ ರೋಡ್ರಿಗಸ್‌ 16, ನಿದಾ ದರ್‌ 17ಕ್ಕೆ 1, ದಿಯಾನಾ ಬೇಗ್‌ 19ಕ್ಕೆ 1). 
ಪಂದ್ಯಶ್ರೇಷ್ಠ: ಮಿಥಾಲಿ ರಾಜ್‌.