ಖತರ್ನಾಕ್‌ ಏಣಿ ಗ್ಯಾಂಗ್‌ ಚೋರಿಯರ ಬಂಧನ

Team Udayavani, Nov 15, 2018, 6:50 AM IST

ಕಲಬುರಗಿ: ನಿರ್ಭಯವಾಗಿ ರಾತ್ರಿ ವೇಳೆ ರಸ್ತೆಗಿಳಿದು ಕಳ್ಳತನದಲ್ಲಿ ತೊಡಗುತ್ತಿದ್ದ ಖತರ್ನಾಕ್‌ ಏಣಿ ಗ್ಯಾಂಗ್‌ನ ನಾಲ್ವರು ಕಳ್ಳಿಯರನ್ನು ನಗರದ ಬ್ರಹ್ಮಪುರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. 

ಮಾಂಗರವಾಡಿಯ ಭಾಗುಬಾಯಿ, ಕವಿತಾ,ರವಿನಾ ಮತ್ತು ಕಲ್ಲಿ ಬಂಧಿತ ಕಳ್ಳಿಯರು. ಬಂಧಿತರು ರಾತ್ರೋ ರಾತ್ರಿ ರಸ್ತೆಯಲ್ಲಿ ಏಣಿ ಹಿಡಿದು ಕಳ್ಳತನಕ್ಕೆ ಇಳಿಯುತ್ತಿದ್ದರು. ರಾತ್ರಿ ವೇಳೆ ಏಣಿ ಹಿಡಿದು ಬಹುಮಹಡಿ ಕಟ್ಟಡದ ಅಂಗಡಿಗಳ ಮೇಲೆ ಹತ್ತಿ, ತಮ್ಮ ಕೈಚಳಕ ತೋರಿಸುತ್ತಿದ್ದರು. ಅ.16ರಂದು ನಗರದ ಬಟ್ಟೆ ಅಂಗಡಿಯೊಂದಕ್ಕೆ ಈ ಚೋರಿಯರು ಒಬ್ಬೊಬ್ಬರಾಗಿ ಏಣಿ ಹತ್ತಿ ಕಳ್ಳತನ ಮಾಡುತ್ತಿದ್ದ
ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿತ್ತು. ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದ ಬ್ರಹ್ಮಪುರ ಪೊಲೀಸರು, ಸಿಸಿಟಿವಿ ದೃಶ್ಯಾವಳಿ ಆಧರಿಸಿ ನಾಲ್ವರನ್ನು ಪತ್ತೆ ಹಚ್ಚಿ ಸೆರೆ ಹಿಡಿದಿದ್ದಾರೆ. ಬಂಧಿತರೆಲ್ಲರೂ 20ರಿಂದ 30 ವರ್ಷದೊಳಗಿ ನವರಾಗಿದ್ದಾರೆ.

ಇವರ ಕೈಚಳಕಕ್ಕೆ ವ್ಯಾಪಾರಿಗಳು ಬೆಚ್ಚಿ ಬಿದ್ದಿದ್ದಾರೆ. ಗ್ಯಾಂಗ್‌ನಲ್ಲಿ ಬರೀ ಹೆಣ್ಣು ಮಕ್ಕಳೇ ಇದ್ದು, ರಾತ್ರಿಯಲ್ಲಿ ಎಂತಹುದೇ ಕಟ್ಟಡ ಇದ್ದರೂ ಏಣಿ ಮೂಲಕ ಹತ್ತಿ, ಒಳಗೆ ನುಗ್ಗಿ, ಕೈಗೆ ಸಿಕ್ಕ ವಸ್ತುಗಳನ್ನು ದೋಚುತ್ತಿದ್ದರು. ಬ್ರಹ್ಮಪುರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.