ರಸಿಕಾ…

Team Udayavani, Nov 16, 2018, 6:00 AM IST

ರಸಿಕಾ ದುಗ್ಗಲ್‌ ಹೆಸರು ಕಮರ್ಶಿಯಲ್‌ ಸಿನೆಮಾಗಳಲ್ಲಿ ಅಷ್ಟೇನೂ ಪ್ರಚಾರದಲ್ಲಿಲ್ಲ. ಆದರೆ, ಬಲವಾದ ಕಥಾಹಂದರವಿರುವ ಮುಖ್ಯವಾಹಿನಿಯಿಂದ ಪ್ರತ್ಯೇಕವಾಗಿ ನಿಲ್ಲುವ ಸಿನೆಮಾಗಳಲ್ಲಿ ರಸಿಕಾ ಹೆಸರು ಚಿರಪರಿಚಿತ. ಅನ್ವರ್‌, ನೋ ಸ್ಮೋಕಿಂಗ್‌, ಹೈಜಾಕ್‌, ತಹಾನ್‌, ಅಜ್ಞಾತ್‌, ಥ್ಯಾಂಕ್ಸ್‌ ಮಾ, ಕ್ಷಯ್‌, ಖೀಸ್ಸಾ, ಮಂಟೊ, ತು ಹೀ ಮೇರಾ ಸಂಡೇ, ಒನ್ಸ್‌ ಎಗೈನ್‌… ಹೀಗೆ ರಸಿಕಾ ನಟಿಸಿದ ಚಿತ್ರಗಳ ಪಟ್ಟಿ ಬೆಳೆಯುತ್ತ ಹೋಗುತ್ತದೆ. ಈ ಪೈಕಿ ಹಲವು ಚಿತ್ರಗಳು ರಾಷ್ಟ್ರೀಯ ಅಂತಾರಾಷ್ಟ್ರೀಯ ಚಿತ್ರೋತ್ಸವಗಳಲ್ಲಿ ಪ್ರದರ್ಶಿತವಾಗಿವೆ. ಪ್ರಶಸ್ತಿಗಳನ್ನೂ ಬಾಚಿಕೊಂಡಿವೆ.

ಹೀಗೆ ಮುಖ್ಯವಾಹಿನಿಯಿಂದ ಹೊರತಾದ ಚಿತ್ರಗಳು ಇಲ್ಲದಿದ್ದರೆ ಕಿರುತೆರೆಯಲ್ಲಿ ಬ್ಯುಸಿಯಾಗಿರುತ್ತಾಳೆ ರಸಿಕಾ. ಇತ್ತೀಚೆಗಷ್ಟೇ ರಸಿಕಾ ನಟಿಸಿದ ಮಿರ್ಜಾಪುರ್‌ ಮತ್ತು ಹಮೀದ್‌ ಎಂಬೆರಡು ಟಿವಿ ಸರಣಿಗಳು ಅಂತಾರಾಷ್ಟ್ರೀಯ ಚಿತ್ರೋತ್ಸವದಲ್ಲಿ ಪ್ರದರ್ಶಿತವಾಗಿ ಮೆಚ್ಚುಗೆ ಗಳಿಸಿದ್ದವು. ಇಂತಿಪ್ಪ ರಸಿಕಾ ಇದೀಗ ಮುಖ್ಯವಾಹಿನಿಯ ಚಿತ್ರವೊಂದರಲ್ಲಿ ನಟಿಸುತ್ತಿದ್ದಾಳೆ ಎನ್ನುವುದೇ ಸುದ್ದಿ. ಅದೂ ಕಾಮೆಡಿ ಚಿತ್ರ ಎನ್ನುವುದು ಇನ್ನೊಂದು ವಿಶೇಷತೆ. ರಸಿಕಾ ಕತೆಗೆ ಅಗತ್ಯ ಎನಿಸುವ ಪಾತ್ರವಾದರೆ ಮಾತ್ರ ನಟಿಸುತ್ತಾಳೆ. ಸುಮ್ಮನೆ ಲೆಕ್ಕಭರ್ತಿಗೊಂದು ಪಾತ್ರ ಸೃಷ್ಟಿಸಿ ಅದರಲ್ಲಿ ನಟಿಸುವುದರಲ್ಲಿ ಯಾವುದೇ ಅರ್ಥವಿಲ್ಲ ಎನ್ನುವುದು ಅವಳ ನಿಲುವು. ಈಗ ಬಾಲಿವುಡ್‌ನ‌ಲ್ಲಿ ಬದಲಾವಣೆಯ ಗಾಳಿ ಬಲವಾಗಿಯೇ ಬೀಸುತ್ತಿದೆಯೇ. ಹೀರೊ, ಹೀರೊಯಿನ್‌, ವಿಲನ್‌ ಎಂಬ ಸಾಂಪ್ರದಾಯಿಕ ಪರಿಕಲ್ಪನೆಯಿಂದ ನಿರ್ದೇಶಕರು ಹೊರಬಂದಿದ್ದಾರೆ. ಹೀಗಾಗಿ ಹೊಸ ರೀತಿಯ ಸಿನೆಮಾಗಳು ಬರುತ್ತಿವೆ. ಇದರಿಂದಾಗಿ ಎಲ್ಲ ಬಗೆಯ ಕಲಾವಿದರಿಗೂ ಅಲ್ಲೀಗ ಅವಕಾಶ ಸಿಗುತ್ತಿದೆ. ಹಿಂದಿನಂತೆ ಇಂಥ ಪತ್ರಕ್ಕೆ ಇಂಥ ಕಲಾವಿದರೇ ಆಗಬೇಕೆಂಬ ಅಲಿಖೀತ ನಿಯಮ ಇಲ್ಲ ಎನ್ನುವುದು ರಸಿಕಾ ಅರ್ಥಮಾಡಿಕೊಂಡಿರುವ ಬಾಲಿವುಡ್‌.