ಕೈಕಂಬ ಜಂಕ್ಷನ್‌: ಇಲ್ಲಿ ರಸ್ತೆ ದಾಟುವುದೇ ಅಪಾಯ!

Team Udayavani, Nov 21, 2018, 11:37 AM IST

ಸುಬ್ರಹ್ಮಣ್ಯ: ಕಡಬ-ಗುಂಡ್ಯ ಭಾಗದಿಂದ ಸುಬ್ರಹ್ಮಣ್ಯ ಕಡೆ ತೆರಳುವ ರಾಜ್ಯ ಹೆದ್ದಾರಿಯ ಕೈಕಂಬ ಜಂಕ್ಷನ್‌ನಲ್ಲಿ ಪೇಟೆ ಸಿಗುತ್ತದೆ. ಇಲ್ಲಿ ವಾಹನ ದಟ್ಟಣೆ ಜಾಸ್ತಿಯಾಗುತ್ತಿದೆ. ರಸ್ತೆಯಲ್ಲಿ ಪಾದಚಾರಿಗಳು ಆಗಾಗ ಅಪಾಯಕ್ಕೆ ಸಿಲುಕುತ್ತಾರೆ. ಇದು ಬೆಂಗಳೂರು-ಮೈಸೂರು ರಾಜ್ಯ ಹೆದ್ದಾರಿ. ಗುಂಡ್ಯದಿಂದ ಮತ್ತು ಕಡಬದಿಂದ ಸುಬ್ರಹ್ಮಣ್ಯಕ್ಕೆ ತೆರಳುವ ವೇಳೆ ಸುಬ್ರಹ್ಮಣ್ಯ ನಗರ ತಲುಪುವ ಮುನ್ನ 6 ಕಿ.ಮೀ. ಅಂತರದಲ್ಲಿ ಕೈಕಂಬ ಸಿಗುತ್ತದೆ. ಈ ಜಂಕ್ಷನ್‌ ನಲ್ಲಿ ಮೂರು ರಸ್ತೆಗಳು ಕವಲೊಡೆಯುತ್ತವೆ. ಕಡಬ-ಗುಂಡ್ಯ-ಸುಬ್ರಹ್ಮಣ್ಯ ಹಾಗೂ ಮಡಿಕೇರಿ-ಮೈಸೂರು, ಮಂಗಳೂರು, ಧರ್ಮಸ್ಥಳ ಭಾಗಕ್ಕೆ ತೆರಳುವ ಪ್ರಯಾಣಿಕರಿಗೆ ಬಸ್‌ ಹತ್ತಲು ಈ ಸ್ಥಳ ಕೇಂದ್ರ ಬಿಂದುವಾಗಿದೆ.

ದೂರದ ಊರುಗಳಿಗೆ ತೆರಳುವ ಸಾರ್ವಜನಿಕರು ಇಲ್ಲಿ ವಾಹನ ಕಾಯುತ್ತಿರುತ್ತಾರೆ. ಕಡಬ ಭಾಗಕ್ಕೆ ತೆರಳುವಲ್ಲಿ ಒಂದು ಬಸ್‌ ತಂಗುದಾಣವಿದೆ. ಅದು ಕಡಬ ಭಾಗಕ್ಕೆ ತೆರಳುವವರಿಗೆ ಮಾತ್ರ ಅನುಕೂಲಕ್ಕೆ ಬರುತ್ತದೆ. ಅದರ ಇನ್ನೊಂದು ಪಾರ್ಶ್ವ ಗುಂಡ್ಯ-ಸುಬ್ರಹ್ಮಣ್ಯ ನೇರ ಸಂಪರ್ಕ ರಸ್ತೆ ಬದಿಯಲ್ಲಿ ಯಾವುದೇ ತಂಗುದಾಣವಿಲ್ಲ. ಹೀಗಾಗಿ ಈ ಭಾಗದವರು ಬಸ್‌ ಹಿಡಿಯಲು ಕಡಬ ರಸ್ತೆಯಲ್ಲಿರುವ ತಂಗುದಾಣಕ್ಕೆ ಮುಖ್ಯ ರಸ್ತೆ ದಾಟಿ ತೆರಳಬೇಕು.

ರಸ್ತೆ ದಾಟುವಾಗ ಅಪಾಯ
ಕಡಬಕ್ಕೆ ತೆರಳುವ ರಸ್ತೆಯಲ್ಲಿ ಇರುವ ತಂಗುದಾಣದಲ್ಲಿ ಸಾರಿಗೆ ಬಸ್‌ಗಳು ನಿಲ್ಲುವುದರಿಂದ ಬಸ್‌ಗಾಗಿ ಮುಖ್ಯ ರಸ್ತೆಯನ್ನು ದಾಟಿ ತೆರಳಬೇಕು. ಇದು ಅಪಾಯಕಾರಿಯಾಗಿದೆ. ವಾಹನ ದಟ್ಟಣೆ ಇರುವ ಈ ರಸ್ತೆಯನ್ನು ಅವಸರವಸರವಾಗಿ ದಾಟುವ ವೇಳೆ ವಾಹನಗಳು ಢಿಕ್ಕಿ ಹೊಡೆದು ಅಪಾಯಗಳು ಸಂಭವಿಸುತ್ತಿವೆ. ಬೆಳಗ್ಗೆ ಮತ್ತು ಸಂಜೆ ಹೊತ್ತು ಪರಿಸರದ ಮಕ್ಕಳು ಶಾಲಾ ಕಾಲೇಜಿಗೆ ತೆರಳುವ ಮತ್ತು ಬರುವ ವೇಳೆ ತಂಗುದಾಣದ ಕಡೆಗೆ ರಸ್ತೆ ದಾಟುವಾಗ ಮೈಯೆಲ್ಲ ಕಣ್ಣಾಗಿದ್ದರೂ ಸಾಲದು.

ಕೈಕಂಬ ಜಂಕ್ಷನ್‌ನಲ್ಲಿ ಗುಂಡ್ಯ-ಸುಬ್ರಹ್ಮಣ್ಯ ನೇರ ರಸ್ತೆ ಇರುವ ಪಕ್ಕದಲ್ಲೆ ದ.ಕ.ಜಿ.ಪಂ., ಉ.ಮಾ.ಹಿ. ಪ್ರಾಥಮಿಕ ಶಾಲೆ ಇದೆ. ರಸ್ತೆಗೆ ಹೊಂದಿಕೊಂಡಂತೆ ಶಾಲೆ ಹಾಗೂ ಮೈದಾನವಿದೆ. ಶಾಲೆ ಬಿಟ್ಟಾಗ ಮಕ್ಕಳು ರಸ್ತೆ ಬದಿಯ ಶಾಲಾ ಗೇಟಿನಿಂದ ನೇರ ಹೆದ್ದಾರಿಗೆ ಬರುತ್ತಾರೆ. ಇಲ್ಲಿ ಬಸ್‌ ತಂಗುದಾಣ ಕೂಡ ಇಲ್ಲ. ಮಕ್ಕಳು ಶಾಲೆಗೆ ಬರುವ ಮತ್ತು ಬಿಡುವ ಹೊತ್ತಲ್ಲಿ ಅಪಾಯಕ್ಕೆ ಒಳಗಾಗುತ್ತಾರೆ. ಎಳೆಯ ಮಕ್ಕಳನ್ನು ಶಿಕ್ಷಕರೇ ನಿತ್ಯವೂ ರಸ್ತೆ ದಾಟಿಸಿ ಬಿಡಬೇಕಿದೆ. ಮಕ್ಕಳು ರಸ್ತೆ ದಾಟುವ ಪ್ರಯತ್ನಕ್ಕೆ ಮುಂದಾಗುತ್ತಾರೆ. ಮಕ್ಕಳನ್ನು ನಿಯಂತ್ರಿಸುವುದು ಕಷ್ಟ. ಮಕ್ಕಳು ರಸ್ತೆ ದಾಟುವಾಗ ಭೀತಿಯಾಗುತ್ತದೆ.

ಪೊಲೀಸ್‌ ಸಿಬಂದಿ ನಿಯೋಜಿಸಿ
ಇಲ್ಲಿ ಪ್ರವಾಸಿಗರ ವಾಹನಗಳು ಅತೀ ವೇಗವಾಗಿ ಸಂಚರಿಸುತ್ತಿವೆ. ಮಳೆ, ಬಿಸಿಲಿಗೆ ರಸ್ತೆ ಬದಿಯಲ್ಲೇ ತಾಸುಗಟ್ಟಲೆ ನಿಂತಿರಬೇಕಿದೆ. ಗುಂಡ್ಯ-ಸುಬ್ರಹ್ಮಣ್ಯ ರಸ್ತೆಯಲ್ಲಿ ಬಸ್‌ ತಂಗುದಾಣದ ಆವಶ್ಯಕತೆಯಿದೆ. ಅದಕ್ಕಿಂತ ಮುಂಚಿತ ಜಂಕ್ಷನ್‌ನಲ್ಲಿ ಶಾಲೆಗೆ ಮಕ್ಕಳು ತೆರಳುವ ಎರಡು ಅವಧಿಯಲ್ಲಿ ಪೊಲೀಸ್‌ ಸಿಬಂದಿಯನ್ನು ನಿಯೋಜಿಸಬೇಕು ಮತ್ತು ವೇಗ ತಡೆಗೆ ಬ್ಯಾರಿಕೇಡ್‌ ಅಳವಡಿಸಬೇಕಿದೆ. ತಿರುವಿನ ಇಕ್ಕಟ್ಟಾದ ಜಾಗದಲ್ಲಿ ನಡು ರಸ್ತೆಯಲ್ಲೆ ಅಡ್ಡಾದಿಡ್ಡಿ ವಾಹನಗಳನ್ನು ನಿಲ್ಲಿಸುವುದು, ಯಮ ಸ್ವರೂಪಿ ವೇಗದಲ್ಲಿ ಸಂಚರಿಸುವ ವಾಹನಗಳಿಗೆ ತಡೆ ಹಾಕಬೇಕಿದೆ.

ರಸ್ತೆ ದಾಟಲು ಭಯ
ಕೈಕಂಬ ಜಂಕ್ಷನ್‌ನಲ್ಲಿ ಶಾಲೆಯ ಮಕ್ಕಳು ರಸ್ತೆ ದಾಟುವಾಗ ಭಯವಾಗುತ್ತದೆ. ಇಲ್ಲಿ ಈ ಹಿಂದೆ ಅನೇಕ ಭಾರಿ ಅಪಘಾತ ಸಂಭವಿಸಿವೆ. ಅಧಿಕಾರಿಗಳ ಗಮನಕ್ಕೆ ತಂದಿದ್ದರೂ ಪ್ರಯೋಜನವಾಗಿಲ್ಲ. ಇಲ್ಲಿ ತುರ್ತು ಕ್ರಮದ ಅವಶ್ಯಕತೆ ಇದೆ.
– ದಿನೇಶ ಕೆ. ಕಾಳಪ್ಪಾಡಿ, ಸ್ಥಳೀಯರು

 ಬಾಲಕೃಷ್ಣ ಭೀಮಗುಳಿ