ಎತ್ತಿನಹೊಳೆ ದ್ವಿತೀಯ ಹಂತ: ಅಂತರ್ಜಲ ಕುಸಿತ ಭೀತಿ

Team Udayavani, Nov 24, 2018, 10:04 AM IST

ಸುಬ್ರಹ್ಮಣ್ಯ: ಎತ್ತಿನಹೊಳೆ ಯೋಜನೆಯ ದ್ವಿತೀಯ ಹಂತ ಆರಂಭಗೊಂಡಿರುವ ಸಕಲೇಶಪುರ ಭಾಗದಲ್ಲಿ ಕಾಮಗಾರಿಯಿಂದಾಗಿ ಅಂತರ್ಜಲ ಕುಸಿಯುವ ಸಾಧ್ಯತೆಯ ಬಗ್ಗೆ ಅಲ್ಲಿನ ಜನರು ಆತಂಕಗೊಂಡಿದ್ದು, ಪ್ರತಿಭಟನೆ ಮತ್ತು ಕಾನೂನು ಹೋರಾಟಕ್ಕೆ ಅಣಿಯಾಗಿದ್ದಾರೆ.

ಬೆಳಗೋಡು ವ್ಯಾಪ್ತಿಯ ಹೆಬ್ಬನಹಳ್ಳಿಯಿಂದ ಮೂಗಲಿ, ಕೂಡನಹಳ್ಳಿ, ಬೆಳಗೋಡು ಹಾಗೂ ಬೆಳಮೆ ಗ್ರಾಮದ ವರೆಗೆ 7 ಕಿ.ಮೀ. ವ್ಯಾಪ್ತಿಯಲ್ಲಿ ಸುರಂಗ ಮತ್ತು ನಾಲೆ ಕಾಮಗಾರಿ ನಡೆಯುತ್ತಿದೆ. ಈ ಪೈಕಿ 1.156 ಕಿ.ಮೀ. ಸುರಂಗ ಮಾರ್ಗ. ಉಳಿದಂತೆ 1.157 ಕಿ.ಮೀ.ನಿಂದ 7 ಕಿ.ಮೀ. ವರೆಗೆ ತೆರೆದ ನಾಲೆ. ಜತೆಗೆ ಬೇಲೂರು, ಬಸವಾಪುರ, ಮಾದೀಹಳ್ಳಿ ಮತ್ತು ಬೆಟ್ಟದಾಲೂರು ವ್ಯಾಪ್ತಿಯಲ್ಲಿ 29 ಕಿ.ಮೀ.ನಿಂದ 31 ಕಿ.ಮೀ. ವರೆಗೆ ಸುರಂಗ ಮತ್ತು ತೆರೆದ ನಾಲೆ ಕಾಮಗಾರಿ ಕೈಗೊಳ್ಳಲಾಗುತ್ತಿದೆ.

ಇಲ್ಲಿ ಸುಮಾರು 7 ಕಿ.ಮೀ. ಹಾಗೂ ಆಲೂರು ತಾಲೂಕಿನಲ್ಲಿ ಸುಮಾರು 2 ಕಿ.ಮೀ. ಉದ್ದದ ತೆರೆದ ಕಾಲುವೆ ನಿರ್ಮಾಣವನ್ನು ಬೆಂಗಳೂರು ಮೂಲದ ಖಾಸಗಿ ಕಂಪೆನಿಯೊಂದು ಸುಮಾರು 335.7 ಕೋಟಿ ರೂ.ಗೆ ವಿಶ್ವೇಶ್ವರಯ್ಯ ಜಲನಿಗಮದಿಂದ ಗುತ್ತಿಗೆ ಪಡಕೊಂಡಿದೆ. ಕಾಮಗಾರಿ ವೇಳೆ ಸ್ಫೋಟಕ ಬಳಕೆಗೆ ಹಾಸನ ಜಿಲ್ಲಾಧಿಕಾರಿಯಿಂದ ಅನುಮತಿ ಕೋರಿದೆ.

ಇದಕ್ಕೆ 40 ಅಡಿಗಳಷ್ಟು ಆಳಕ್ಕೆ ಭೂಮಿ ಕೊರೆಯಬೇಕಿದೆ. ಇದನ್ನು ನಡೆಸಿದಲ್ಲಿ ಬೆಳಗೋಡು ಹೋಬಳಿ ಮತ್ತು ಆಸುಪಾಸಿನ ಹಲವು ಹಳ್ಳಿಗಳಲ್ಲಿ ಅಂತರ್ಜಲ ಬತ್ತುವ ಸಾಧ್ಯತೆ ಜನರನ್ನು ಚಿಂತೆಗೀಡು ಮಾಡಿದ್ದು, ಜನಾಂದೋಲನ ಹಾಗೂ ಕಾನೂನು ಹೋರಾಟ ನಡೆಸಲು ನಿರ್ಧರಿಸಿದ್ದಾರೆ.

ಮೊದಲ ಹಂತ ಬಹುತೇಕ ಪೂರ್ಣ
ಮೊದಲ ಹಂತದಲ್ಲಿ, ಯೋಜನೆ ಜಾರಿಯಾದ ಸಕಲೇಶಪುರ ಭಾಗದಲ್ಲಿ ನದಿಯನ್ನು ಅಡ್ಡಗಟ್ಟಿ ವಿತರಣ ತೊಟ್ಟಿ, ಪಂಪ್‌ಹೌಸ್‌ ನಿರ್ಮಿಸಿ ಪೈಪ್‌ಲೈನ್‌ ಅಳವಡಿಸಲಾಗಿದೆ. ಹೊಂಗಡ ಹಳ್ಳ, ಎತ್ತಿನಹೊಳೆ, ಕಾಡುಮನೆ ಹೊಳೆ, ಕೇರಿಹೊಳೆಗಳಿಗೆ ಒಂಬತ್ತು ಕಡೆ ಒಡ್ಡುಗಳನ್ನು ನಿರ್ಮಿಸಿ ಮೋಟರ್‌ ಅಳವಡಿಸಿ ಅರಣ್ಯದೊಳಗೆ 129 ಕಿ.ಮೀ. ಉದ್ದಕ್ಕೆ ಭಾರೀ ಪೈಪುಗಳ ಮೂಲಕ ನೀರೆತ್ತಿ ಸಕಲೇಶಪುರ ತಾಲೂಕಿನ ಹರವನಹಳ್ಳಿ ಬಳಿ ದೊಡ್ಡ ತೊಟ್ಟಿಗೆ ಬಿಡುವ ಕಾಮಗಾರಿ ನಡೆಸಲಾಗಿದೆ. ಅರಣ್ಯದೊಳಗೆ ಭೂಗತ ಪೈಪ್‌ ಅಳವಡಿಕೆ ಅರ್ಧದಷ್ಟು ನಡೆದಿದ್ದು, ಆಗಸ್ಟ್‌ನಲ್ಲಿ ಭಾರೀ ಮಳೆಯ ಪರಿಣಾಮ ಭೂಕುಸಿತದಿಂದಾಗಿ ಕಾಮಗಾರಿ ಸ್ಥಗಿತಗೊಂಡಿದೆ.

ಅಧಿಕಾರಿಗಳ ಮಾಹಿತಿ ಪ್ರಕಾರ ಮೊದಲ ಹಂತದಲ್ಲಿ ಶೇ. 80ರಷ್ಟು ಕಾಮಗಾರಿ ಪೂರ್ಣಗೊಂಡಿದೆ. ಈಗಾಗಲೇ ಎರಡನೇ ಹಂತಕ್ಕೆ ಚಾಲನೆ ನೀಡಲಾಗಿದೆ. ಈ ಹಂತದಲ್ಲಿ ಪೈಪ್‌ ಬದಲಿಗೆ ತೆರೆದ ಕಾಲುವೆಯ ಮೂಲಕ ನೀರು ಹರಿಸಲಾಗುತ್ತದೆ. ಆದರೆ ಬೆಳಗೋಡು ಹೋಬಳಿ ವ್ಯಾಪ್ತಿಯಲ್ಲಿ ಸ್ಥಳೀಯರು ವಿರೋಧ ವ್ಯಕ್ತಪಡಿಸಿದ್ದು, ಕಾಮಗಾರಿ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿದೆ.

ಅವೈಜ್ಞಾನಿಕ ಕಾಮಗಾರಿ
ಎತ್ತಿನಹೊಳೆ ಯೋಜನೆ ಎಂಬುದೇ ಅವೈಜ್ಞಾನಿಕ. ಕಾಮಗಾರಿ ವೇಳೆ ಸ್ಫೋಟಕಗಳನ್ನು ಬಳಸಲಿದ್ದಾರೆ ಎಂಬ ಮಾಹಿತಿ ಇದೆ. ಯೋಜನೆಯಿಂದ ಪರಿಸರಕ್ಕೆ ಹಾನಿ ಆಗುವುದು ನಿಸ್ಸಂಶಯ. ಇದನ್ನು ವಿರೋಧಿಸಿ ದೊಡ್ಡ ಮಟ್ಟದ ಜನಾಂದೋಲನ, ಕಾನೂನು ಹೋರಾಟ ನಡೆಸಲಾಗುವುದು.
ಕವನ್‌ ಗೌಡ, ವಕೀಲರು ಮತ್ತು ಎಪಿಎಂಸಿ ಸದಸ್ಯ, ಸಕಲೇಶಪುರ

ಮೊದಲ ಹಂತ ಬಹುತೇಕ ಪೂರ್ತಿಗೊಂಡಿದೆ. ಎರಡನೇ ಹಂತಕ್ಕೆ ಚಾಲನೆ ದೊರಕಿದೆ. ಯೋಜನೆಯೊಂದು ಜಾರಿಗೆ ಬಂದಾಗ ವಿರೋಧಗಳು ಸಹಜ. ಸಾಧಕ-ಬಾಧಕಗಳು ಇರುತ್ತವೆ. ಕಾನೂನಿನ ಚೌಕಟ್ಟಿನಲ್ಲಿ ಅನುಮತಿ ಪಡೆದು ಪೂರ್ಣಗೊಳಿಸುತ್ತೇವೆ.
ಜಯಣ್ಣ, ಎಂಜಿನಿಯರ್‌, ಎತ್ತಿನಹೊಳೆ ಯೋಜನೆ

ತಜ್ಞರ ಸಭೆ ಕರೆದು ಚರ್ಚೆ
ಸಕಲೇಶಪುರ ತಾಲೂಕಿನಲ್ಲಿ ಎತ್ತಿನಹೊಳೆ ಯೋಜನೆ ಕಾಮಗಾರಿ ವೇಳೆ ತೆರೆದ ಕಾಲುವೆ ನಿರ್ಮಿಸಲು ಅಲ್ಲಿನ ಸ್ಥಳೀಯರ ವಿರೋಧ ವ್ಯಕ್ತಪಡಿಸಿದ್ದಾರೆ. ಪರಿಸರಕ್ಕೆ ಹಾನಿಯಾಗದ ರೀತಿಯಲ್ಲಿ ನಿಯಮಗಳನ್ನು ರೂಪಿಸಿಕೊಂಡೇ ಕಾಮಗಾರಿಗೆ ಅವಕಾಶ ನೀಡಲಾಗಿದೆ. ಈ ಕುರಿತು ತಜ್ಞರ ಸಮಿತಿ ಮತ್ತೂಮ್ಮೆ ಸಭೆ ನಡೆಸಿ ನಿರ್ಧಾರ ಕೈಗೊಳ್ಳಲಿದೆ.
ಆರ್‌. ಶಂಕರ್‌, ಅರಣ್ಯ ಸಚಿವರು

ಬಾಲಕೃಷ್ಣ ಭೀಮಗುಳಿ