ಕಾರು ಚಾಲಕನ ಅಪಹರಿಸಿದ್ದ ಐವರ ಬಂಧನ

Team Udayavani, Nov 24, 2018, 11:39 AM IST

ಬೆಂಗಳೂರು: ಕಾರು ಚಾಲಕನನ್ನು ಅಪಹರಣ ಮಾಡಿ ಹಣ ಸುಲಿಗೆ ಮಾಡಿದ್ದ ತಮಿಳುನಾಡು ಮೂಲದ ಐವರು ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಡೆಂಕಣಿಕೋಟೆ ಮೂಲದ ರಮೇಶ್‌(20), ಶಶಿಕುಮಾರ್‌(22), ಅರುಣ್‌ ಕುಮಾರ್‌(20) ಕೃಷ್ಣ ನಾಯಕ್‌(24), ಯಶವಂತ್‌ ಕುಮಾರ್‌(23) ಬಂಧಿತರು.

ಹೊಂಗಸಂದ್ರದ ನಿವಾಸಿ ಹರಿಬಾಬು ಅ.16ರಂದು ರಾತ್ರಿ ತನ್ನ ಟಾಟಾ ಇಂಡಿಕಾ ಕಾರಿನಲ್ಲಿ ಬಾಡಿಗೆಗೆ ಹೋಗಿದ್ದ. ಆ ವೇಳೆ ಬೊಮ್ಮನಹಳ್ಳಿಯ ಗುರುಮೂರ್ತಿ ರೆಡ್ಡಿ ಲೇಔಟ್‌ನಲ್ಲಿ ಆರೋಪಿಗಳು ಈತನನ್ನು ಅಡ್ಡಗಟ್ಟಿದ್ದು ಆತನನ್ನು ಕಾರಿನ ಸಮೇತ ಅಪಹರಿಸಿ ಶಿವನ ಸಮುದ್ರದ ಸಮೀಪ ಕರೆದೊಯ್ದಿದ್ದರು.

ಅ.18ರಂದು ಬೆಳಗ್ಗೆ 7.30ರ ಸಮಯದಲ್ಲಿ ಹರಿಬಾಬು ಅಣ್ಣನಿಗೆ ಕರೆ ಮಾಡಿಸಿದ್ದ ಆರೋಪಿಗಳು, 50 ಸಾವಿರ ರೂ.ಗಳನ್ನು ಬ್ಯಾಂಕ್‌ ಅಕೌಂಟ್‌ಗೆ ಹಾಕದಿದ್ದರೆ ಕೊಲೆ ಮಾಡುವುದಾಗಿ ಹೇಳಿಸಿದ್ದರು. ಇದರಿಂದ ಹೆದರಿದ ಹರಿಬಾಬು ಅಣ್ಣ ಅಶೋಕ್‌, ಆರೋಪಿಗಳ ಬ್ಯಾಂಕ್‌ ಖಾತೆಗೆ 50 ಸಾವಿರ ರೂ. ಹಣ ಜಮಾ ಮಾಡಿದ್ದ.

ಇದಾದ ಮೂರು ದಿನಗಳ ಬಳಿಕ ಹರಿಬಾಬುವನ್ನು ನಗರಕ್ಕೆ ತಂದ ಬಿಟ್ಟ ಆರೋಪಿಗಳು, ಈತನ ಕಾರನ್ನು ಹಿಂದಿರುಗಿಸಿರಲಿಲ್ಲ. ತಮ್ಮನ ಅಪಹರಣಕ್ಕೆ ಸಂಬಂಧಿಸಿದಂತೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದ ಬೊಮ್ಮನಹಳ್ಳಿ ಹಾಗೂ ಸುದ್ದಗುಂಟೆ ಪಾಳ್ಯ ಠಾಣೆ ಪೊಲೀಸರು ಕಾರ್ಯಾಚರಣೆ ನಡೆಸಿ ಬಂಧಿಸಿದ್ದಾರೆ.

ಅವರ ಬಂಧನದಿಂದ ಕೋಣನಕುಂಟೆ, ಹುಳಿಮಾವು, ಬೇಗೂರು ಪೊಲೀಸ್‌ ಠಾಣೆ ಸೇರಿ ನಗರದ ವಿವಿಧ ಪೊಲೀಸ್‌ ಠಾಣೆಗಳಲ್ಲಿ ದಾಖಲಾಗಿದ್ದ 8 ದರೋಡೆ ಪ್ರಕರಣಗಳು ಬೆಳಕಿಗೆ ಬಂದಿವೆ. ಆರೋಪಿಗಳಿಂದ ಮಾರಕಾಸ್ತ್ರ, ಮೊಬೈಲ್‌, ಆಟೋರಿûಾ, ಟಾಟಾ ಇಂಡಿಕಾ ಕಾರು ಸೇರಿ 3,63,500 ರೂ. ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.