ಇಬ್ಬರು ವಂಚಕರ ಬಂಧನ

Team Udayavani, Nov 25, 2018, 12:33 PM IST

ಬೆಂಗಳೂರು: ತಮ್ಮಲ್ಲಿ ಹಣ ಹೂಡಿಕೆ ಮಾಡಿದರೆ ನೂರು ಪಟ್ಟು ಅಧಿಕ ಲಾಭ ನೀಡುವುದಾಗಿ ಹೇಳಿ ಸಾರ್ವಜನಿಕರನ್ನು ವಂಚಿಸುತ್ತಿದ್ದ ಇಬ್ಬರು ಆರೋಪಿಗಳನ್ನು ವರ್ತೂರು ಪೊಲೀಸರು ಬಂಧಿಸಿದ್ದಾರೆ. ದೇವನಹಳ್ಳಿಯ ನಾಗೇಶ್‌ (45), ಶಿವಕುಮಾರ್‌ (34) ಬಂಧಿತರು.

ಆರೋಪಿಗಳಿಂದ 1 ಲಕ್ಷ್ಮೀನರಸಿಂಹ ಸ್ವಾಮಿ ವಿಗ್ರಹ, 1 ಫೋರ್ಡ್‌ ಕಾರು ವಶಕ್ಕೆ ಪಡೆಯಲಾಗಿದೆ. ಉದ್ಯಮಿಗಳು ಮತ್ತು ಶ್ರೀಮಂತ ವ್ಯಕ್ತಿಗಳನ್ನು ಗುರುತಿಸುತ್ತಿದ್ದ ಆರೋಪಿಗಳು, ಅವರನ್ನು ಪರಿಚಯಿಸಿಕೊಂಡು, ತಮ್ಮ ಬಳಿ ರೈಸ್‌ಪುಲ್ಲಿಂಗ್‌ ಮಾಡುವ ಪುರಾತನ ವಿಗ್ರಹಗಳಿವೆ ಎಂದು ನಂಬಿಸುತ್ತಿದ್ದರು.

ವಿಗ್ರಹದ ಸುತ್ತ ಅಕ್ಕಿ ಹಾಕಿದರೆ ವಿಗ್ರಹಗಳು ಅಕ್ಕಿಯನ್ನು ತನ್ನೆಡೆಗೆ ಸೆಳೆದುಕೊಳ್ಳುತ್ತವೆ. ಈ ವಿಗ್ರಹಗಳಿಗೆ ವಿದೇಶದಲ್ಲಿ ಬಾರೀ ಬೇಡಿಕೆಯಿದ್ದು, ಸಾವಿರಾರು ಕೋಟಿ ರೂ.ಗೆ ಖರೀದಿಸುತ್ತಾರೆ. ನಮ್ಮಲ್ಲಿ ಹಣ ಹೂಡಿಕೆ ಮಾಡಿದರೆ, ಹೂಡಿಕೆಗಿಂತ ನೂರು ಪಟ್ಟು ಅಧಿಕ ಲಾಭ ನೀಡುತ್ತೇವೆ ಎಂದು ನಂಬಿಸುತ್ತಿದ್ದರು.