ಮುನ್ನಡೆ ಬಳಿಕ ಕುಸಿದ ಮುಂಬಯಿ

Team Udayavani, Dec 1, 2018, 6:00 AM IST

ಮುಂಬಯಿ: ಗುಜರಾತ್‌ ವಿರುದ್ಧ “ವಾಂಖೇಡೆ ಸ್ಟೇಡಿಯಂ’ನಲ್ಲಿ ನಡೆಯುತ್ತಿರುವ ರಣಜಿ ಪಂದ್ಯದಲ್ಲಿ ಮುಂಬಯಿ ತಂಡ 16 ರನ್ನುಗಳ ಮಹತ್ವದ ಮುನ್ನಡೆ ಸಾಧಿಸಿದೆ. ಮುಂಬಯಿಯ 297 ರನ್ನುಗಳ ಮೊದಲ ಇನ್ನಿಂಗ್ಸಿಗೆ ಜವಾಬು ನೀಡಿದ ಗುಜರಾತ್‌ 3ನೇ ದಿನವಾದ ಶುಕ್ರವಾರ 281ಕ್ಕೆ ಆಲೌಟ್‌ ಆಯಿತು.

ಮುನ್ನಡೆ ಬಳಿಕ ತೀವ್ರ ಬ್ಯಾಟಿಂಗ್‌ ಕುಸಿತ ಅನುಭವಿಸಿದ ಮುಂಬಯಿ ಒಂದು ಹಂತದಲ್ಲಿ 66 ರನ್ನಿಗೆ 6 ವಿಕೆಟ್‌ ಉದುರಿಸಿಕೊಂಡು ಭಾರೀ ಸಂಕಟಕ್ಕೆ ಸಿಲುಕಿತ್ತು. ಆದರೆ ಆದಿತ್ಯ ತಾರೆ (59), ಶಿವಂ ದುಬೆ (ಬ್ಯಾಟಿಂಗ್‌ 40) ನೆರವಿನಿಂದ 7 ವಿಕೆಟಿಗೆ 156 ರನ್‌ ಗಳಿಸಿದೆ. ಮುನ್ನಡೆ 172ಕ್ಕೆ ಏರಿದೆ. ಸಿ.ಟಿ. ಗಜ 4 ವಿಕೆಟ್‌ ಕಿತ್ತು ಮುಂಬಯಿಗೆ ಬೆದರಿಕೆಯೊಡ್ಡಿದರು.

8ಕ್ಕೆ 232 ರನ್‌ ಮಾಡಿದಲ್ಲಿಂದ ಗುಜರಾತ್‌ ದಿನದಾಟ ಮುಂದುವರಿಸಿತ್ತು. 60 ರನ್‌ ಮಾಡಿ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದ ವಿಕೆಟ್‌ ಕೀಪರ್‌ ಧುರ್ವ್‌ ರಾವಲ್‌ 99 ರನ್‌ ತನಕ ಸಾಗಿ ಶತಕ ತಪ್ಪಿಸಿಕೊಂಡರು. ಮುಂಬಯಿ ಪರ ಶಿವಂ ದುಬೆ, ಧವಳ್‌ ಕುಲಕರ್ಣಿ ಮತ್ತು ರಾಯ್‌ಸ್ಟನ್‌ ಡಯಾಸ್‌ ತಲಾ 3 ವಿಕೆಟ್‌ ಉರುಳಿಸಿದರು.