ಆಪ್ತ ಸ್ನೇಹಿತೆಗಾಗಿ ಕಿಡ್ನಿ ದಾನ?

Team Udayavani, Dec 2, 2018, 6:00 AM IST

ನವದೆಹಲಿ: ಮೂತ್ರಪಿಂಡದ ಸಮಸ್ಯೆಯಿಂದ ಬಳಲುತ್ತಿರುವ, ಮುಸ್ಲಿಂ ಧರ್ಮಕ್ಕೆ ಸೇರಿದ ತನ್ನ ಆಪ್ತ ಸ್ನೇಹಿತೆಯೊಬ್ಬರಿಗೆ ತನ್ನ ಕಿಡ್ನಿಯನ್ನೇ ದಾನ ಮಾಡಲು ಸಿಖ್‌ ಧರ್ಮದ ಯುವತಿಯೊಬ್ಬಳು ಮುಂದೆ ಬಂದಿದ್ದು, ಇದಕ್ಕೆ ತನ್ನ ಕುಟುಂಬ ವಿರೋಧ ವ್ಯಕ್ತಪಡಿಸಿರುವ ಹಿನ್ನೆಲೆಯಲ್ಲಿ ಆಕೆಯೀಗ ನ್ಯಾಯಾಲಯದ ಮೊರೆ ಹೋಗಿದ್ದಾಳೆ.

ಜಮ್ಮುವಿನ ಸಮ್ರಿನ್‌ ಅಕ್ತರ್‌(22) ಹಾಗೂ ಉಧಮ್‌ಪುರದ ಮನೊತ್‌ ಸಿಂಗ್‌ ಕೊಹ್ಲಿ(23) ಎಂಬಿಬ್ಬರು ಕಳೆದ ನಾಲ್ಕು ವರ್ಷಗಳಿಂದ ಸ್ನೇಹಿತೆಯರು. ಇತ್ತೀಚೆಗೆ, ಕಿಡ್ನಿ ವೈಫ‌ಲ್ಯದಿಂದ ಜಮ್ಮುವಿನ ಸಮ್ರಿನ್‌ ಅವರು ಆಸ್ಪತ್ರೆಗೆ ದಾಖಲಾಗಿದ್ದು, ಈ ವಿಚಾರವನ್ನು ಬೇರೆಯವರಿಂದ ತಿಳಿದು ಆಸ್ಪತ್ರೆಗೆ ಬಂದ ಮನೊತ್‌, ಸಮ್ರಿನ್‌ಗೆ ತನ್ನ ಕಿಡ್ನಿ ನೀಡಲು ಮುಂದೆ ಬಂದಿದ್ದಾರೆ. ಇದಕ್ಕೆ ತಮ್ಮ ಸಮ ರ್ಥನೆ ಯನ್ನೂ ನೀಡಿರುವ ಅವರು, “”ನನ್ನ ಕೆಲವು ಕಷ್ಟದ ಸನ್ನಿವೇಶದಲ್ಲಿ ಅಪಾರ ನೆರವು ನೀಡಿದ್ದ ಸಮ್ರಿನ್‌ಗೆ ತಾನು ಈ ಮಾನವೀಯ ರೀತಿಯಲ್ಲಿ ಋಣ ತೀರಿಸುತ್ತಿದ್ದೇನೆ” ಎಂದಿದ್ದಾರೆ. 

ಆದರೆ, ಇದನ್ನು ಮನೊತ್‌ ಮನೆಯವರೇ ವಿರೋಧಿಸಿರುವುದರಿಂದ ವೈದ್ಯರು ಶಸ್ತ್ರಚಿಕಿತ್ಸೆಗೆ ಹಿಂದೇಟು ಹಾಕುತ್ತಿದ್ದಾರೆ. ಹಾಗಾಗಿ, ಮನೊತ್‌ ನ್ಯಾಯಾಲಯದ ಮೊರೆ ಹೋಗಿದ್ದು, “ಸ್ವ ಇಚ್ಛೆಯಿಂದಲೇ ಮೂತ್ರಪಿಂಡ ದಾನಕ್ಕೆ ಮುಂದಾಗಿದ್ದು, ವೈದ್ಯರು ಹಿಂದೇಟು ಹಾಕುತ್ತಿರುವುದರಿಂದ ಶಸ್ತ್ರಚಿಕಿತ್ಸೆ ವಿಳಂಬವಾಗುತ್ತಿದೆ. ಇದನ್ನು ತಪ್ಪಿಸಿ ಸಮ್ರಿನ್‌ಳನ್ನು ಉಳಿಸಲು ಸಹಾಯ ಮಾಡಬೇಕು’ ಎಂದು ಮನವಿ ಸಲ್ಲಿಸಿದ್ದಾರೆ.