ಅಪಘಾತ ತಡೆಗೆ ಬ್ಯಾರಿಕೇಡ್‌ ಒಂದೇ ಪರಿಹಾರವಲ್ಲ

Team Udayavani, Dec 2, 2018, 1:15 PM IST

ನಗರದ ರಸ್ತೆಗಳಲ್ಲಿ ಅಪಘಾತ ಪ್ರಮಾಣ ಕಡಿಮೆ ಮಾಡುವ ದೃಷ್ಟಿ ಯಿಂದ ಸಾರಿಗೆ ಇಲಾಖೆ ಹಲವಾರು ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಅದರಲ್ಲಿಯೂ ಪ್ರಮುಖವಾಗಿ ನಗರ ಸೇರಿದಂತೆ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಬ್ಯಾರಿಕೇಡ್‌ ಅಳವಡಿಸಲಾಗುತ್ತಿದೆ. ಆದರೆ, ಇದೇ ಅನಾಹುತಕ್ಕೆ ಕಾರಣವಾಗುವಂತಿದೆ. ಅದರಲ್ಲಿಯೂ ರಾಷ್ಟ್ರೀಯ ಹೆದ್ದಾರಿ 66 ಹಾಗೂ 75 ರಲ್ಲಿ ಅಲ್ಲಲ್ಲಿ ಬ್ಯಾರಿಕೇಡ್‌ ಗಳನ್ನು ಹಾಕಲಾಗಿದೆ.

ಸಾಮಾನ್ಯವಾಗಿ ಶಾಲೆ, ಕಾಲೇಜುಗಳು, ಆಸ್ಪತ್ರೆ, ಪಾದಚಾರಿಗಳು ರಸ್ತೆ ದಾಟುವಿಕೆ ಪ್ರಮಾಣ ಜಾಸ್ತಿ ಇರುವ ಪ್ರದೇಶಗಳಲ್ಲಿ ವಾಹನಗಳ ವೇಗ ನಿಯಂತ್ರಿಸುವ ಸಲುವಾಗಿ ಬ್ಯಾರಿಕೇಡ್‌ಗಳನ್ನು ಅಳವಡಿಸಲಾಗುತ್ತದೆ. ಆದರೆ ಬ್ಯಾರಿಕೇಡ್‌ಗಳಲ್ಲಿ ರಿಫ್ಲೆಕ್ಟರ್‌ ಅಳವಡಿಸಲಾಗಿಲ್ಲ. ವಾಹನ ಚಾಲಕರಿಗೆ ಮಾಹಿತಿ ನೀಡುವ ಸೂಚನಾ ಫಲಕಗಳಿಲ್ಲ. ವಾಹನ ಚಾಲಕರು ಪ್ರಯಾಸ ಪಟ್ಟು ಇದರ ನಡುವೆ ನುಸುಳಿಕೊಂಡು ಹೋಗಬೇಕಾದ ಪರಿಸ್ಥಿತಿ ಇದೆ. ಇದರಿಂದ ಅಪಘಾತಗಳು ಸಂಭವಿಸುತ್ತಿವೆ.

ಹಾಗಾಗಿ ಅಪಘಾತವನ್ನು ತಡೆಯುವ ನಿಟ್ಟಿನಲ್ಲಿ ಇದೊಂದೇ ಪರಿಹಾರವಲ್ಲ. ಹೆದ್ದಾರಿಯನ್ನು ಮೇಲ್ವರ್ಜೆಗೇರಿಸುವ ಸಂದರ್ಭದಲ್ಲಿ ಯೋಜನೆ ರೂಪಿಸುವವರು, ಆ ಪ್ರದೇಶಗಳ ಸ್ಥಳೀಯಾಡಳಿ ವ್ಯವಸ್ಥೆ, ಜನಪ್ರತಿನಿಧಿಗಳು ಇದನ್ನು ಪರಿಗಣಿಸಬೇಕಾಗಿತ್ತು. ಅವಶ್ಯ ಇರುವ ಕಡೆ ಅಂಡರ್‌ಪಾಸ್‌, ಫ್ಲೈ ಓವರ್‌ಗಳಿಗೆ ಯೋಜನೆ ರೂಪಿಸಬೇಕಾಗಿತ್ತು.

ಸುರತ್ಕಲ್‌ನ ಗೋವಿಂದದಾಸ ಕಾಲೇಜು, ಎನ್‌ಐಟಿಕೆ ಮುಂತಾದ ಕಡೆಗಳಲ್ಲಿ ಮಾಡಿರುವ ಅಂಡರ್‌ಪಾಸ್‌, ಕುಂಟಿಕಾನ, ತೊಕ್ಕೊಟ್ಟು, ಪಂಪ್‌ ವೆಲ್‌, ಕೊಟ್ಟಾರ ಚೌಕಿ, ಮರೋಳಿ ಕೈಕಂಬ, ಕುಳೂರು ಮುಂತಾದ ಕಡೆಗಳಲ್ಲಿ ಫ್ಲೈ ಓವರ್‌ಸಾಧ್ಯವಿರುವ ಕಡೆಗಳಲ್ಲಿ ಪರ್ಯಾಯ ವ್ಯವಸ್ಥೆಗಳನ್ನು ಕಲ್ಪಿಸಿ ಅಪಘಾತ ಗಳ ನಿಯಂತ್ರಣ ಕ್ರಮಗಳನ್ನು ಕೈಗೊಳ್ಳಬೇಕಾಗಿದೆ.

 ನವೀನ್‌ ಭಟ್‌ ಇಳಂತಿಲ