ಟಾಟಾ ಓಪನ್‌ ಬ್ಯಾಡ್ಮಿಂಟನ್‌: ಲಕ್ಷ್ಯ,ಅಶ್ಮಿತಾ ಚಾಂಪಿಯನ್ಸ್‌

Team Udayavani, Dec 3, 2018, 6:35 AM IST

ಮುಂಬಯಿ: ಕಳೆದ ತಿಂಗಳಷ್ಟೇ ವಿಶ್ವ ಜೂನಿಯರ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಫೈನಲ್‌ನಲ್ಲಿ ಥಾಯ್ಲೆಂಡ್‌ನ‌ ಕುನವತ್‌ ವಿತಿಸರ್ನ್ ವಿರುದ್ಧ ಸೋಲನುಭವಿಸಿದ ಭಾರತದ ಬ್ಯಾಡ್ಮಿಂಟನ್‌ ತಾರೆ ಲಕ್ಷ್ಯ ಸೇನ್‌ “ಟಾಟಾ ಓಪನ್‌ ಇಂಡಿಯಾ ಬ್ಯಾಡ್ಮಿಂಟನ್‌ ಚಾಲೆಂಜರ್‌’ ಟೂರ್ನಿಯ ಫೈನಲ್‌ನಲ್ಲಿ ನೇರ ಗೇಮ್‌ಗಳಿಂದ ವಿತಿಸರ್ನ್ ಅವರನ್ನು ಸೋಲಿಸುವ ಮೂಲಕ ಸೇಡು ತೀರಿಸಿಕೊಂಡಿದ್ದಾರೆ.

ಪುರುಷರ ಸಿಂಗಲ್ಸ್‌ನ ಫೈನಲ್‌ ಪಂದ್ಯದಲ್ಲಿ ಲಕ್ಷ್ಯ ಸೇನ್‌ 21-15, 21-10 ನೇರ ಗೇಮ್‌ಗಳಿಂದ ಗೆಲುವು ದಾಖಲಿಸಿದರು. ಪಂದ್ಯದುದ್ದಕ್ಕೂ ವಿತಿಸರ್ನ್ ತಪ್ಪು ಹೊಡೆತಗಳಿಂದ ಅಂಕಗಳ ಬರಗಾಲ ಅನುಭವಿಸಿದರು. ಪುರುಷರ ಡಬಲ್ಸ್‌ ವಿಭಾಗದ ಫೈನಲ್‌ನಲ್ಲಿ ಎಂ.ಆರ್‌. ಅರ್ಜುನ್‌- ಸುಮೀತ್‌ ಬಿ. ರೆಡ್ಡಿ ಜೋಡಿ 21-10, 21-16 ಗೇಮ್‌ಗಳಿಂದ ಮಲೇಶ್ಯದ ಗೊ ಝೆ ಫೆಯಿ-ನೂರ್‌ ಇಜಾಜುದ್ದೀನ್‌ ಜೋಡಿಯನ್ನು ಸೋಲಿಸಿ ಪ್ರಶಸ್ತಿ ತನ್ನದಾಗಿಸಿಕೊಂಡಿದೆ.

ಅಶ್ಮಿತಾಗೆ ಜಯ
ವನಿತಾ ಸಿಂಗಲ್ಸ್‌ನ ಫೈನಲ್‌ನಲ್ಲಿ ಅಶ್ಮಿತಾ ಚಲಿಹ ಭಾರತದವರೇ ಆದ  ವೃಶಾಲಿ ಗುಮ್ಮಡಿ ಅವರನ್ನು 21-16, 21-13 ನೇರ ಗೇಮ್‌ಗಳಿಂದ ಸೋಲಿಸಿ ಪ್ರಶಸ್ತಿ ಜಯಿಸಿದರು. ವೃಶಾಲಿ ವಿರುದ್ಧ ಸತತವಾಗಿ ಸೋಲುಂಡಿದ್ದ ಅಶ್ಮಿತಾ ಇದೇ ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವರ್ಷಾಲಿ ವಿರುದ್ಧ ಗೆಲುವು ದಾಖಲಿಸಿದರು.

ವನಿತಾ ಡಬಲ್ಸ್‌ ವಿಭಾಗದ ಫೈನಲ್‌ನಲ್ಲಿ ಮೇಘನಾ ಜಕ್ಕಂಪುಡಿ- ಪೂರ್ವಿಶಾ ಎಸ್‌. ರಾಮ್‌ ಜೋಡಿ ಹಾಂಕಾಂಗ್‌ನ ವಿಂಗ್‌ ಯಾಂಗ್‌-ಯೆಂಗ್‌ ಗಾ ಟಿಂಗ್‌ ವಿರುದ್ಧ 10-21, 11-21 ಗೇಮ್‌ಗಳಿಂದ ಮುಗ್ಗರಿಸಿತು.