ಕಂಬಳ ಕುರಿತು ಪ್ರತಿಕ್ರಿಯೆ ನೀಡಲು ಸುಪ್ರೀಂ ಸೂಚನೆ

Team Udayavani, Dec 8, 2018, 6:55 AM IST

ನವದೆಹಲಿ: ಕಂಬಳಕ್ಕೆ ಅನುಮತಿ ನೀಡಿ ಕರ್ನಾಟಕ ಸರ್ಕಾರ ಹೊರಡಿಸಿರುವ ಕಾನೂನು ಮಾನ್ಯತೆಯನ್ನು ಪ್ರಶ್ನಿಸಿ ಪ್ರಾಣಿ
ದಯಾ ಸಂಘಟನೆ ಪೆಟಾ ಸಲ್ಲಿಸಿರುವ ಅರ್ಜಿಯ ಹಿನ್ನೆಲೆಯಲ್ಲಿ ಪ್ರತಿಕ್ರಿಯೆ ನೀಡುವಂತೆ ಕೇಂದ್ರ ಸರ್ಕಾರ ಹಾಗೂ ಕರ್ನಾಟಕಕ್ಕೆ ಸುಪ್ರೀಂಕೋರ್ಟ್‌ ನೋಟಿಸ್‌ ಹೊರಡಿಸಿದೆ.

ಶುಕ್ರವಾರ ಈ ಅರ್ಜಿಯನ್ನು ನ್ಯಾಯ ಮೂರ್ತಿಗಳಾದ ಮದನ್‌ ಲೋಕೂರ್‌ ಹಾಗೂ ದೀಪಕ್‌ ಗುಪ್ತಾ ಅವರಿದ್ದ ಪೀಠ ವಿಚಾರಣೆಗೆ ಕೈಗೆತ್ತಿಕೊಂಡಿತು. ಕಳೆದ ಫೆಬ್ರವರಿಯಲ್ಲೇ ಈ ಪ್ರಕರಣವನ್ನು ತಮಿಳುನಾಡಿನ ಜಲ್ಲಿಕಟ್ಟು ಹಾಗೂ ಮಹಾರಾಷ್ಟ್ರದ ಎತ್ತಿನ ಗಾಡಿ ರೇಸ್‌ ವಿರೋಧಿಸಿ ಸಲ್ಲಿಸಲಾದ ಬಾಕಿ ಅರ್ಜಿಗಳೊಂದಿಗೆ ಸೇರಿಸಿತ್ತು.

1960 ರ ಪ್ರಾಣಿಗಳ ಮೇಲಿನ ಹಿಂಸೆ ತಡೆ ಕಾನೂನಿನ ಮೂಲ ಅಂಶಕ್ಕೆ ಕರ್ನಾಟಕ ಹೊರಡಿಸಿರುವ ಕಾನೂನು ವಿರುದ್ಧವಾಗಿದೆ. ಈ ಕಾಯ್ದೆಯಲ್ಲಿ ಪ್ರಾಣಿಗಳ ಮೇಲೆ ಕ್ರೌರ್ಯ ನಡೆಸುವುದನ್ನು ಅನುಮೋದಿಸಲಾಗಿದೆ ಎಂದು ಪೆಟಾ ತನ್ನ ಅರ್ಜಿಯಲ್ಲಿ ಆರೋಪಿಸಿದೆ. ಕಂಬಳಕ್ಕೆ ಅನುಮತಿ ನೀಡಿ ಪ್ರಾಣಿಗಳ ಮೇಲೆ ಹಿಂಸೆ ತಡೆ ಕಾಯ್ದೆ 2017ಕ್ಕೆ ಕರ್ನಾಟಕ ಸರ್ಕಾರ ತಿದ್ದುಪಡಿ ತಂದಿತ್ತು.