ಒಂದೇ ದಿನ 1000 ವಿಮಾನ!

Team Udayavani, Dec 10, 2018, 9:25 AM IST

ಮುಂಬಯಿ: ರಿಲಯನ್ಸ್‌ ಇಂಡಸ್ಟ್ರೀಸ್‌ ಮಾಲೀಕ ಮುಕೇಶ್‌ ಅಂಬಾನಿ ಪುತ್ರಿ ಇಶಾ ಅಂಬಾನಿ ವಿವಾಹ ಕಾರ್ಯಕ್ರಮದ ಸಂಭ್ರಮ ಮುಂಬೈ ವಿಮಾನ ನಿಲ್ದಾಣಕ್ಕೂ ಸೋಕಿತ್ತು. ಶನಿವಾರ ಒಂದೇ ದಿನ ಮುಂಬಯಿನ ಛತ್ರಪತಿ ಶಿವಾಜಿ ಮಹಾರಾಜ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ 1007 ವಿಮಾನಗಳು ಹಾರಾಟ ನಡೆಸಿ, ದಾಖಲೆ ಬರೆದಿವೆ.

ರಾಜಸ್ಥಾನದ ಉದಯಪುರದಲ್ಲಿ ವಿವಾಹ ಸಮಾರಂಭ ನಡೆಯುತ್ತಿದ್ದು, ಇದಕ್ಕಾಗಿ ಹಲವು ಗಣ್ಯರು, ರಾಜಕಾರಣಿಗಳು, ಕಾರ್ಪೊರೇಟ್‌ ವಲಯದ ವ್ಯಕ್ತಿಗಳು ವಿಮಾನದಲ್ಲಿ ಪ್ರಯಾಣಿಸಿದ್ದಾರೆ. ಶುಕ್ರವಾರದಿಂದಲೇ ಗಣ್ಯರ ಪ್ರವಾಸ ಆರಂಭವಾಗಿತ್ತು. ಈ ಹಿಂದೆ ಜೂನ್‌ 6 ರಂದು 1003 ವಿಮಾನಗಳು ಹಾರಾಟ ನಡೆಸಿದ್ದು ದಾಖಲೆಯಾಗಿತ್ತು. ಈ ಬಾರಿ ಹೆಚ್ಚಿನ ಸಂಖ್ಯೆಯಲ್ಲಿ ಚಾರ್ಟರ್‌ ವಿಮಾನಗಳೇ ಹಾರಾಟ ನಡೆಸಿವೆ ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ಹೇಳಿದ್ದಾರೆ.