26/11: ದೃಢೀಕರಣ ಬೇಕಿಲ್ಲ: ಜ. ರಾವತ್‌

Team Udayavani, Dec 10, 2018, 8:55 AM IST

ಹೊಸದಿಲ್ಲಿ: 26/11ರ ಮುಂಬಯಿ ದಾಳಿಯಲ್ಲಿ ಪಾಕಿಸ್ಥಾನದ ಭಯೋತ್ಪಾದಕರ ಪಾತ್ರವಿತ್ತು ಎಂಬುದು ಇಡೀ ಅಂತಾರಾಷ್ಟ್ರೀಯ ಸಮುದಾಯಕ್ಕೇ ಗೊತ್ತಿದೆ. ಅದನ್ನು ಈಗ ಯಾರೂ ದೃಢಪಡಿಸಬೇಕಾದ ಅಗತ್ಯವಿಲ್ಲ ಎಂದು ಭೂಸೇನಾ ಮುಖ್ಯಸ್ಥ ಜ. ಬಿಪಿನ್‌ ರಾವತ್‌ ಹೇಳಿದ್ದಾರೆ. ‘ಮುಂಬೈ ದಾಳಿಯು ಭಯೋತ್ಪಾದಕರ ಕೃತ್ಯವಾಗಿದ್ದು, ಪಾಕಿಸ್ಥಾನದ ಹಿತಾಸಕ್ತಿಯಿಂದ ಈ ಕೇಸನ್ನು ಇತ್ಯರ್ಥಪಡಿಸುವುದು ನನ್ನ ಧ್ಯೇಯವಾಗಿದೆ’ ಎಂಬ ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌ ಹೇಳಿಕೆಗೆ ಪ್ರತಿಯಾಗಿ ಜ. ರಾವತ್‌ ಈ ರೀತಿ ಹೇಳಿದ್ದಾರೆ.

ಭಾನುವಾರ ಈ ಕುರಿತು ಪ್ರತಿಕ್ರಿಯಿಸಿದ ಜ.ರಾವತ್‌, ದಾಳಿ ನಡೆಸಿದ್ದು ಯಾರೆಂದು ಇಡೀ ವಿಶ್ವಕ್ಕೇ ಗೊತ್ತಿದೆ. ಅವರಿಗಿಂತಲೂ ಮೊದಲು, ಅದು ನಮಗೆ ಗೊತ್ತಿತ್ತು. ಈ ವಿಚಾರದಲ್ಲಿ ಯಾರ ಹೇಳಿಕೆಯೂ ನಮಗೆ ಅಗತ್ಯವಿಲ್ಲ ಎಂದು ಹೇಳಿದ್ದಾರೆ. ಜತೆಗೆ, 26/11ರ ದಾಳಿಯನ್ನು ಪಾಕಿಸ್ಥಾನ ಒಪ್ಪಿಕೊಂಡಿರುವುದು ಸ್ವಾಗತಾರ್ಹ ಎಂದೂ ತಿಳಿಸಿದ್ದಾರೆ. ಇತ್ತೀಚೆಗೆ ವಾಷಿಂಗ್ಟನ್‌ ಪೋಸ್ಟ್‌ಗೆ ನೀಡಿದ ಸಂದರ್ಶನದಲ್ಲಿ ಇಮ್ರಾನ್‌ ಖಾನ್‌ ಅವರು, 26/11ರ ದಾಳಿಗೆ ಲಷ್ಕರ್‌ ಉಗ್ರರೇ ಕಾರಣ. ಈ ಪ್ರಕರಣದ ಸ್ಥಿತಿಗತಿ ಅರಿಯುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ಅದೊಂದು ಭಯೋತ್ಪಾದಕ ಕೃತ್ಯವಾಗಿರುವ ಕಾರಣ ಅದನ್ನು ಆದಷ್ಟು ಬೇಗ ಇತ್ಯರ್ಥಗೊಳಿಸುವುದು ನಮ್ಮ ಉದ್ದೇಶ ಎಂದು ಹೇಳಿದ್ದರು. ಈ ಮೂಲಕ ಮುಂಬಯಿ ದಾಳಿ ನಡೆಸಿದ್ದು ಪಾಕಿಸ್ಥಾನದ ಉಗ್ರ ಸಂಘಟನೆಗಳು ಎಂಬುದನ್ನು ಅವರು ಒಪ್ಪಿಕೊಂಡಿದ್ದರು.

ಮತ್ತೂಂದು ದಾಳಿಗೆ ಹಿಂಜರಿಯಲ್ಲ: ಏತನ್ಮಧ್ಯೆ, ಡೆಹ್ರಾಡೂನ್‌ನಲ್ಲಿ ರವಿವಾರ ಮಾತನಾಡಿದ ವೈಸ್‌ ಚೀಫ್ ಆಫ್ ಆರ್ಮಿ ಸ್ಟಾಫ್ ಲೆ.ಜ. ದೇವರಾಜ್‌ ಅನ್ಬು, ನಮ್ಮ ಸೇನೆಯು ಅಗತ್ಯಬಿದ್ದರೆ ಇನ್ನೊಂದು ಸರ್ಜಿಕಲ್‌ ದಾಳಿ ನಡೆಸಲೂ ಹಿಂಜರಿಯುವುದಿಲ್ಲ ಎಂದು ಹೇಳಿದ್ದಾರೆ.