ಸೂಪರ್‌ಸ್ಟಾರ್‌ ರಜನಿಗೆ 68!; ತಲೈವಾಗೆ ಡಬಲ್‌ ಸಂಭ್ರಮ

Team Udayavani, Dec 12, 2018, 12:07 PM IST

ಚೆನ್ನೈ: ವಿಶ್ವಾದ್ಯಂತ ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿರುವ ಸೂಪರ್‌ ಸ್ಟಾರ್‌ ರಜನಿ ಕಾಂತ್‌ ಅವರು ಬುಧವಾರ 68 ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. 

ರಜನಿ ಕಾಂತ್‌ ಅವರ ಮುಂಬರುವ ಪೆಟ್ಟಾ ಚಿತ್ರದ ಟೀಸರನ್ನು ಬರ್ತ್‌ಡೇ ಸ್ಪೆಷಲ್‌ ಆಗಿ ಬಿಡುಗಡೆ ಮಾಡಲಾಗಿದ್ದು, ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದೆ. 

ಪೆಟ್ಟಾ  ಚಿತ್ರದಲ್ಲಿ ಬಹುತಾರಾಗಣವಿದ್ದು, ಸಿಮ್ರಾನ್‌, ತ್ರಿಶಾ, ವಿಜಯ್‌ ಸೇತುಪತಿ, ಶಶಿಕುಮಾರ್‌, ನವಾಜುದ್ದೀನ್‌ ಸಿದ್ಧಿಕಿ ಮತ್ತು ಬಾಬಿ ಸಿಂಹ ಅವರಿದ್ದಾರೆ.

ತಮಿಳುನಾಡು ಸೇರಿದಂತೆ ವಿವಿಧೆಡೆ ರಜನಿ ಅವರ ಅಭಿಮಾನಿಗಳು ಬರ್ತ್‌ಡೇ ಸಂಭ್ರಮವನ್ನು ಆಚರಿಸಿಕೊಳ್ಳುತ್ತಿದ್ದು, ವರ್ಷಪ್ರಂತಿಯಂತೆ ನೇತ್ರದಾನ ಮತ್ತು ರಕ್ತದಾನವನ್ನು ಮಾಡುವ ಮೂಲಕ ಮಾದರಿಯಾಗಿದ್ದಾರೆ.

ಇತ್ತೀಚೆಗೆ ಬಿಡುಗಡೆಯಾಗಿರುವ ರಜನಿ ಅಭಿನಯದ 2.0 ಚಿತ್ರ ಭರ್ಜರಿ ಯಶಸ್ಸು ಪಡೆದು ದಾಖಲೆಯ ಕಲೆಕ್ಷನ್‌ ಗಳಿಸುತ್ತಿದೆ. ಚಿತ್ರದ ಭರ್ಜರಿ ಯಶಸ್ಸಿನ ಸಂಭ್ರಮದಲ್ಲಿರುವ ರಜನಿ ಅವರ ಸಂಭ್ರಮ ದುಪ್ಪಟ್ಟಾಗಿದೆ. 

ರಜನಿಕಾಂತ್‌ ಅವರು ಬೆಂಗಳೂರಿನಲ್ಲಿ ಮರಾಠಿ ಕುಟುಂಬವೊಂದರಲ್ಲಿ ಜನಿಸಿದ್ದು, ಅವರ ಬಾಲ್ಯದ ಹೆಸರು ಶಿವಾಜಿ ರಾವ್‌ ಗಾಯಕ್‌ವಾಡ್‌. ತಳಮಟ್ಟದಿಂದ ಬೆಳೆದವರಾಗಿದ್ದು,ಬಿಎಂಟಿಸಿ ಬಸ್‌ನಲ್ಲಿ ಕಂಡಕ್ಟರ್‌ ಆಗಿ ವೃತ್ತಿ ಆರಂಭಿಸಿದ್ದರು.

ರಜನಿಕಾಂತ್‌ ಅವರು ಅತೀ ಹೆಚ್ಚು ಸಂಭಾವನೆ ಪಡೆಯುವ ಭಾರತೀಯ ನಟ.2007 ರಲ್ಲಿ ಶಿವಾಜಿ ಚಿತ್ರದ ಭಾರೀ ಯಶಸ್ಸಿನ ನಂತರ ಅವರ ಸಂಭಾವನೆ ದುಪ್ಪಟ್ಟು ಏರಿಕೆಯಾಗಿತ್ತು.  ಜಾಕಿ ಜಾನ್‌ ಅವರ ಬಳಿಕ ಏಷ್ಯಾದಲ್ಲೇ 2 ನೇ ಅತೀ ಹೆಚ್ಚು ಸಂಭಾವನೆ ಪಡೆಯುವ ಖ್ಯಾತಿಯೂ ಅವರದ್ದಾಗಿದೆ.