ಪ್ರಿಯಕರನಿಗಾಗಿ ತನ್ನದೇ ಮನೆಯಲ್ಲಿ ದರೋಡೆ

Team Udayavani, Dec 17, 2018, 12:16 PM IST

ಬೆಂಗಳೂರು/ರಾಜ್‌ಕೋಟ್‌: “ಪ್ರೀತಿಗಾಗಿ ಏನು ಬೇಕಿದ್ದರೂ ಮಾಡಲು ಸಿದ್ಧ’ ಎನ್ನುವ ಹಲವು ಪ್ರೇಮಿಗಳು ಸಿಗುತ್ತಾರೆ. ಆದರೆ, ಇಲ್ಲೊಬ್ಬಳು ತನ್ನ ಪ್ರಿಯಕರನ ಆಸೆ ಈಡೇರಿಸಲು ತನ್ನ ಸ್ವಂತ ಮನೆಯನ್ನೇ ದರೋಡೆ ಮಾಡಿ, 1 ಕೋಟಿ ರೂ. ಮೌಲ್ಯದ ಚಿನ್ನಾಭರಣ, ನಗದನ್ನು ಕದ್ದೊಯ್ದಿದ್ದಾಳೆ. ಈ “ಸಾಹಸ’ ಮಾಡಿದ ಗುಜರಾತ್‌ನ ಜೋಡಿ ಬೆಂಗಳೂರಿನಲ್ಲಿ ಸಿಕ್ಕಿಬಿದ್ದಿದೆ.

ಗುಜರಾತ್‌ನ ರಾಜ್‌ಕೋಟ್‌ನ ಉದ್ಯಮಿ ಕಿಶೋರ್‌ ಪರ್ಸಾನಾ ಎಂಬವರ 20ರ ಹರೆಯದ ಪುತ್ರಿ ಪ್ರಿಯಾಂಕಾ ಕಳೆದ 2 ವರ್ಷಗಳಿಂದ ಹೇತ್‌ ಶಾ(20) ಎಂಬ ಯುವಕನನ್ನು ಪ್ರೀತಿಸುತ್ತಿದ್ದಳು. ಹೇತ್‌ಗೆ ಪೈಲಟ್‌ ಆಗಬೇಕೆಂಬ ಕನಸಿತ್ತು. ಹೀಗಾಗಿ, ಬೆಂಗಳೂರಿನಲ್ಲಿರುವ ಪೈಲಟ್‌ ತರಬೇತಿ ಅಕಾಡೆಮಿಗೆ ಸೇರಲು ಬಯಸಿದ್ದ. ಆದರೆ, ಶುಲ್ಕ ಪಾವತಿಸಲು ಅವನಲ್ಲಿ ಹಣವಿರಲಿಲ್ಲ. ಈ ವಿಷಯವನ್ನು ಆತ ಪ್ರಿಯಾಂಕಾಗೆ ತಿಳಿಸಿದ್ದ.

ಪ್ರಿಯಕರನ ಪೈಲಟ್‌ ಆಗುವ ಕನಸನ್ನು ಈಡೇರಿಸಲು ನಿರ್ಧರಿಸಿದ ಪ್ರಿಯಾಂಕಾ, ರಾಜ್‌ಕೋಟ್‌ನಲ್ಲಿರುವ ತನ್ನ ಮನೆಯನ್ನೇ ದರೋಡೆ ಮಾಡಿದ್ದಾಳೆ. ಯಾರೂ ಇಲ್ಲದ ವೇಳೆ, ಮನೆಯೊಳಗಿದ್ದ 90 ಲಕ್ಷ ರೂ. ಮೌಲ್ಯದ 3 ಕೆ.ಜಿ. ಚಿನ್ನಾಭರಣ, 2 ಕೆ.ಜಿ. ಬೆಳ್ಳಿಯ ಆಭರಣ ಹಾಗೂ 64 ಸಾವಿರ ರೂ. ನಗದನ್ನು ಎಗರಿಸಿದ್ದಾಳೆ. ಇದು ಯಾರೋ ದರೋಡೆಕೋರರ ಕೃತ್ಯ ಎಂಬ ಭಾವನೆ ಬರಬೇಕೆಂಬ ಉದ್ದೇಶದಿಂದ ಮನೆಯೊಳಗಿನ ವಸ್ತುಗಳನ್ನೆಲ್ಲ ಚೆಲ್ಲಾಪಿಲ್ಲಿಯಾಗಿಸಿ, ಅಲ್ಲಿಂದ ಕಾಲ್ಕಿತ್ತಿದ್ದಾಳೆ.

ಮನೆಗೆ ವಾಪಸಾದ ಬಳಿಕ ಕುಟುಂಬ ಸದಸ್ಯರಿಗೆ ದರೋಡೆಯ ವಿಚಾರ ಗೊತ್ತಾಗಿದ್ದು, ಕೂಡಲೇ ಪೊಲೀಸರಿಗೆ ದೂರು ನೀಡಿದ್ದಾರೆ. ಬೇರೆ ಬೇರೆ ಕೋನಗಳಿಂದ ತನಿಖೆ ನಡೆಸಿದ ಪೊಲೀಸರು, ಕೊನೆಗೂ ನೈಜ ಕಳ್ಳರನ್ನು ಹಿಡಿದಿದ್ದಾರೆ. ನಗರಕ್ಕೆ ಬಂದ ರಾಜ್‌ಕೋಟ್‌ ಪೊಲೀಸರು, 1 ಕೋಟಿ ರೂ. ಮೌಲ್ಯದ ಚಿನ್ನಾಭರಣ, ನಗದಿನೊಂದಿಗೆ ಹೇತ್‌ ಮತ್ತು ಪ್ರಿಯಾಂಕಾಳನ್ನು ವಶಕ್ಕೆ ಪಡೆದಿದ್ದಾರೆ.

ಅತ್ತ “ಮನೆಯ ದರೋಡೆ ಹಿಂದಿನ ಕೈ ನಿಮ್ಮ ಮಗಳೇ ಹೊರತು ಬೇರ್ಯಾರೂ ಅಲ್ಲ’ ಎಂದು ಪೊಲೀಸರು ಹೇಳುತ್ತಿದ್ದಂತೆ, ಪ್ರಿಯಾಂಕಾಳ ಹೆತ್ತವರಿಗೆ ಆಘಾತವಾಗಿದೆ. ಈಗ ಅವರು, ಎಫ್ಐಆರ್‌ ವಾಪಸ್‌ ಪಡೆಯಲು ನಿರ್ಧರಿಸಿದ್ದಾರೆ ಎಂದು ತಿಳಿದು ಬಂದಿದೆ.