ವಿನಾಯಕ ರಿಕ್ಷಾ ನಿಲ್ದಾಣ ಸಮಸ್ಯೆ: ಎಸಿ ಭೇಟಿ

Team Udayavani, Dec 20, 2018, 2:15 AM IST

ಕುಂದಾಪುರ: ಇಲ್ಲಿನ ಪುರಸಭಾ ವ್ಯಾಪ್ತಿಯ ವಿನಾಯಕ ಚಿತ್ರಮಂದಿರ ಬಳಿ ರಿಕ್ಷಾ ನಿಲ್ದಾಣದ ಜಾಗದ ಸಮಸ್ಯೆ ಕುರಿತಂತೆ ಕುಂದಾಪುರ ಉಪ ವಿಭಾಗದ ಸಹಾಯಕ ಆಯುಕ್ತ ಟಿ. ಭೂಬಾಲನ್‌ ಬುಧವಾರ ಭೇಟಿ ನೀಡಿ ಪರಿಶೀಲಿಸಿದರು. ಹೆದ್ದಾರಿ ಕಾಮಗಾರಿಯಿಂದಾಗಿ ಮೊದಲಿದ್ದ ಜಾಗದಲ್ಲಿ ರಿಕ್ಷಾ ನಿಲ್ಲಿಸಲು ಸಾಧ್ಯವಿಲ್ಲ. ಈ ಹಿನ್ನೆಲೆಯಲ್ಲಿ ಪರ್ಯಾಯ ವ್ಯವಸ್ಥೆ ಕಲ್ಪಿಸುವ ನಿಟ್ಟಿನಲ್ಲಿ ಎಸಿ ಅವರಿಗೆ ಇಲ್ಲಿನ ರಿಕ್ಷಾ ಚಾಲಕರು ಮನವಿ ಸಲ್ಲಿಸಿದ್ದರು.

ಈ ಹಿನ್ನೆಲೆಭೇಟಿ ನೀಡಿದ ಎಸಿ ಅವರು, ಪುರಸಭೆ ಅಧೀನದ ಜಾಗದಲ್ಲಿ ಇರುವ ಅಂಗಡಿಯವರನ್ನು ಚರಂಡಿಯಿಂದ 2 ಮೀಟರ್‌ ಹಿಂದಕ್ಕೆ ಹೋಗಲು ತಿಳಿಸಿದ್ದು, ಇಲ್ಲಿ ರಿಕ್ಷಾ ಚಾಲಕರಿಗೆ ನಿಲ್ದಾಣದ ವ್ಯವಸ್ಥೆ ಮಾಡಿಕೊಳ್ಳಲು ತಿಳಿಸಲಾಗಿದೆ ಎಂದು ಹೇಳಿದ್ದಾರೆ. ಇದರಿಂದ ಈಗ ರಿಕ್ಷಾ ಚಾಲಕರ ಸಮಸ್ಯೆ ಸುಖಾಂತ್ಯಗೊಳ್ಳುವ ಲಕ್ಷಣಗಳು ಕಾಣಿಸಿಕೊಂಡಿವೆ. ಜಿ.ಪಂ. ಸದಸ್ಯೆ ಲಕ್ಷ್ಮೀ ಮಂಜು ಬಿಲ್ಲವ, ಬಿಜೆಪಿ ಮುಖಂಡ ಮಂಜು ಬಿಲ್ಲವ, ಕಾಂಗ್ರೆಸ್‌ ಮುಖಂಡ ಗಣೇಶ್‌ ಶೇರಿಗಾರ್‌, ರಿಕ್ಷಾ ಚಾಲಕರ ಸಂಘದ ಮಹೇಶ್‌ ಶೆಣೈ, ರಿಕ್ಷಾ ಚಾಲಕರು ಉಪಸ್ಥಿತರಿದ್ದರು.