ಕೃಷಿ ಸಚಿವ ಶಿವಶಂಕರಗೆ ಭೀಕರ ಬರದ ದರ್ಶನ

Team Udayavani, Dec 23, 2018, 3:27 PM IST

ಕುಷ್ಟಗಿ: ತಾಲೂಕಿಗೆ ಅನಿರೀಕ್ಷರಿತವಾಗಿ ಭೇಟಿ ನೀಡಿದ ಕೃಷಿ ಸಚಿವ ಶಿವಶಂಕರ ರಡ್ಡಿ ಅವರಿಗೆ ಇಲ್ಲಿನ ರೈತರು ಎದುರಿಸುತ್ತಿರುವ ಭೀಕರ ಬರದ ದರ್ಶನವಾಯಿತು. ಶನಿವಾರ ಹುನಗುಂದ ತಾಲೂಕಿಗೆ ಖಾಸಗಿ ಕಾರ್ಯಕ್ರಮದಲ್ಲಿ ಭಾಗವಹಿಸಲು ತೆರಳುವ ಸಂದರ್ಭದಲ್ಲಿ ತಾಲೂಕಿನ ಕೃಷಿ ಇಲಾಖೆಯ ಕಾಮಗಾರಿಗಳನ್ನು ಪರಿಶೀಲಿಸಿದರು. ತಾಲೂಕಿನ ಚಳಗೇರಾ, ಅಡವಿಬಾವಿ ಗ್ರಾಮದ ವ್ಯಾಪ್ತಿಯಲ್ಲಿ ಇಲಾಖೆ ಕೈಗೊಂಡಿರುವ ಗೋಕಟ್ಟು, ಕೃಷಿ ಹೊಂಡ, ಬದು ನಿರ್ಮಾಣ, ಚೈಕ್‌ ಡ್ಯಾಮ್‌ ಕಾಮಗಾರಿ ಪರಿಶೀಲಿಸಿದರು.

ಈ ಭಾಗದಲ್ಲಿ ಅಂತರ್ಜಲ ವೃದ್ಧಿಪಡಿಸಲು ಆದಷ್ಟು ಹೆಚ್ಚಾಗಿ ಗೋಕಟ್ಟು, ಕೃಷಿ ಹೊಂಡಗಳನ್ನು ನಿರ್ಮಿಸಲು ಆದ್ಯತೆ ನೀಡುವಂತೆ ಇಲಾಖಾ ಅಧಿಕಾರಿಗಳಿಗೆ ಸೂಚಿಸಿದರು. ಕಳೆದ ಅಕ್ಟೋಬರ್‌ ತಿಂಗಳಿನಲ್ಲಿ ಕೇವಲ ಒಮ್ಮೆ ಮಳೆಯಾಗಿದ್ದರೂ ಇಷ್ಟು ಪ್ರಮಾಣದಲ್ಲಿ ನೀರು ನಿಂತಿದೆ. ಇನ್ನಷ್ಟು ಮಳೆಯಾಗಿದ್ದರೆ ಗೋಕಟ್ಟು, ಕೃಷಿ ಹೊಂಡ ಭರ್ತಿಯಾಗುವ ಸಾಧ್ಯತೆಗಳಿದ್ದವು. ಮಳೆ ತೀವ್ರ ಕೊರತೆಯಾಗಿದ್ದರಿಂದ ಕೃಷಿ ಹೊಂಡ, ಗೋಕಟ್ಟುಗಳಲ್ಲಿ ನೀರಿನ ಸಂಗ್ರಹ ಕಡಿಮೆಯಾಗಿದೆ. ಪ್ರಧಾನಮಂತ್ರಿ ಕೃಷಿ ಸಿಂಚಾಯಿ ಯೋಜನೆ (ಪಿಎಂಕೆಎಸ್‌ವೈ) ಯೋಜನೆಯಲ್ಲಿ ಗೋಕಟ್ಟುಗಳನ್ನು ನಿರ್ಮಿಸಿ, ಮಳೆಗಾಲದ ವೇಳೆ ಹಳ್ಳದ ನೀರನ್ನು ಈ ಗೋಕಟ್ಟೆಗೆ ತಿರುಗಿಸುವ ವ್ಯವಸ್ಥೆಯಿಂದ ಗೋಕಟ್ಟು ಭರ್ತಿಯಾದರೆ ಅಂತರ್ಜಲ ಹೆಚ್ಚಿಸಲು ಪೂರಕವಾಗಿದೆ. ಮಳೆಗಾಲದ ಹಿಡಿದಿಟ್ಟುಕೊಂಡ ನೀರನ್ನು ಬೇಸಿಗೆಯ ಬೆಳೆಗೂ ಬಳಸಿಕೊಳ್ಳಲು ಸಾಧ್ಯವಿರುವ ಹಿನ್ನೆಲೆಯಲ್ಲಿ ಈ ಭಾಗದಲ್ಲಿ ಗೋಕಟ್ಟು, ಕೃಷಿ ಹೊಂಡ ಹೆಚ್ಚಿಸುವಂತೆ ಇಲಾಖೆ ಅಧಿಕಾರಿಗಳಿಗೆ ಸೂಚನೆ ನೀಡಿದ ಅವರು, ಕೃಷಿ ಇಲಾಖೆಯ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ಇದೇ ವೇಳೆ ಹಿಂಗಾರು ಹಂಗಾಮಿನ ಕಡಲೆ, ಬಿಳಿಜೋಳ ಸೇರಿದಂತೆ ಇತರೇ ಬೆಳೆಯ ಒಣಗಿದ ಭೀಕರ ಪರಿಸ್ಥಿತಿ ಅವಲೋಕಿಸಿದ ಸಚಿವರು, ಈ ಭಾಗದಲ್ಲಿ ಮಳೆ ಪ್ರಮಾಣ ಇಷ್ಟೊಂದು ಕನಿಷ್ಟ ಪ್ರಮಾಣದಲ್ಲಿರುವುದು ಬೇಸರ ವ್ಯಕ್ತಪಡಿಸಿದರು. ಕುಷ್ಟಗಿ ತಾಲೂಕು ಬರಗಾಲ ಪೀಡಿತ ಘೋಷಣೆ ಹಿನ್ನೆಲೆಯಲ್ಲಿ ಕೈಗೊಂಡಿರುವ ಪೂರ್ವಸಿದ್ಧತೆ ಇಲಾಖೆ ಕ್ರಮಗಳ ಕುರಿತು ಮಾಹಿತಿ ಪಡೆದುಕೊಂಡರು. ಇಲಾಖೆಯ ಮುಂದುವರಿದ ಯೋಜನೆಗಳಿಗೆ ಹಣಕಾಸಿನ ಕೊರತೆ ಇಲ್ಲ, ಹನಿ ನೀರಾವರಿ, ತುಂತುರು ನೀರಾವರಿ ಯೋಜನೆ ಸದುಯೋಗಕ್ಕೆ ಸಹಕರಿಸಲು ನಿರ್ದೇಶನ ನೀಡಿದರು. ಇದೇ ವೇಳೆ ಕೃಷಿಕ ಸಮಾಜದ ಅಧ್ಯಕ್ಷ ಚಂದಪ್ಪ ತಳವಾರ, ಪ್ರಸಕ್ತ ವರ್ಷ ಬರಗಾಲ ಭೀಕರವಾಗಿದ್ದು ಜಾನುವಾರುಗಳಿಗೆ ನೀರು, ಮೇವಿನ ತೊಂದರೆಯಾಗುವ ಸಾಧ್ಯತೆಗಳಿವೆ. ಕೂಡಲೇ ಬರಗಾಲದ ಕಾಮಗಾರಿಗಳನ್ನು ಕೈಗೆತ್ತಿಕ್ಕೊಳ್ಳುವಂತೆ ಮನವಿ ಮಾಡಿದರು. ಕೃಷಿ ಇಲಾಖೆಯ ಜಂಟಿ ನಿರ್ದೇಶಕಿ ಶಭನಾ ಶೇಖ್‌, ಸಹಾಯಕ ಕೃಷಿ ನಿರ್ದೇಶಕ ವೀರಣ್ಣ ಕಮತರ, ಎಎಒ ಕಮ್ಮಾರ, ರಾಘವೇಂದ್ರ ಕೊಂಡಗುರಿ, ಶೇಖರಯ್ಯ ಹಿರೇಮಠ ಮತ್ತಿತರಿದ್ದರು.