ಕಾಮನ್‌ ಸೆನ್ಸ್‌ ಇದೆಯಾ? ಬಿಜೆಪಿ ಸಂಸದರ ಬಹಿರಂಗ ಕಿತ್ತಾಟ!

Team Udayavani, Dec 25, 2018, 1:08 PM IST

ಬೆಳಗಾವಿ: ಬಿಜೆಪಿ ಸಂಸದ ಸುರೇಶ್‌ ಅಂಗಡಿ ಮತ್ತು ರಾಜ್ಯಸಭಾ ಸದಸ್ಯ ಪ್ರಭಾಕರ ಕೋರೆ ಅವರು ಸಾರ್ವಜನಿಕವಾಗಿ ನೂರಾರು ಜನರ ಎದುರೇ ವಾಗ್ವಾದ ನಡೆಸಿದ್ದಾರೆ.

ಮಂಗಳವಾರ  ಬೆಳಗಾವಿಯಲ್ಲಿ ನಡೆದ ರೈಲ್ವೇ ಓವರ್‌ ಬ್ರಿಡ್ಜ್ ಉದ್ಘಾಟನಾ ಸಮಾರಂಭದಲ್ಲಿ ಈ ಘಟನೆ ನಡೆದಿದ್ದು, ಇಬ್ಬರ ಜಗಳಕ್ಕೆ ಸಚಿವ ಸತೀಶ್‌ ಜಾರಕಿಹೊಳಿ ಅವರು ಸಾಕ್ಷಿಯಾಗಿದ್ದಾರೆ.

ಸಮಾರಂಭಕ್ಕೆ ಆಗಮಿಸಿದ್ದ ರಾಜ್ಯಸಭಾ ಸದಸ್ಯ ಕೋರೆ ಅವರು ಉದ್ದೇಶ ಪೂರ್ವಕವಾಗಿ ಆಮಂತ್ರಣ ಪತ್ರಿಕೆಯಲ್ಲಿ ನನ್ನ ಹೆಸರು ಹಾಕಿಲ್ಲ ಎಂದು ವೇದಿಕೆಗೆ ಬರಲು ನಿರಾಕರಿಸಿದ್ದಾರೆ. 

ಈ ವೇಳೆ ಸಂಸದ ಅಂಗಡಿ ಅವರು ಕಾಮನ್‌ ಸೆನ್ಸ್‌ ಇದೆಯಾ ನಿಮಗೆ ಬನ್ರೀ ಎಂದು ಗದರಿದ್ದಾರೆ.  ಇದಕ್ಕುತ್ತರವಾಗಿ ಕೋರೆ ಅವರು ನಾನು ಬರಲ್ಲ, ಏನು ದಾದಾಗಿರಿ ಮಾಡುತ್ತಿರಾ ಎಂದಿದ್ದಾರೆ. 

ಇಬ್ಬರು ಕೆಲ ಹೊತ್ತು ವಾಗ್ವಾದ ಕೆಲವರಿಗೆ ಪುಕ್ಕಟೆ ಮನೋರಂಜನೆ ನೀಡಿದರೆ ಇನ್ನು ಕೆಲವರಿಗೆ ಇಬ್ಬರನ್ನು ವೇದಿಕೆಗೆ ಕರೆಯುವುದೂ ಸವಾಲೆನಿಸಿತು. ಸಚಿವ ಸತೀಶ್‌ ಜಾರಕಿ ಹೊಳಿ ಅವರು ನಗುತ್ತಾ ಕುಳಿತಿದ್ದರು.ಈ ವೇಳೆ ಕೋರೆ ಅವರನ್ನು ಸಂಸದ ಅಂಗಡಿ ವೇದಿಕೆ ಒತ್ತಾಯ ಪೂರ್ವಕವಾಗಿ ಎಳೆದೊಯ್ದರು. 

ವೇದಿಕೆಯಲ್ಲೂ ಟಾಂಗ್‌

ಸಮಾರಂಭದ ವೇದಿಕೆಯಲ್ಲೂ ಟಾಂಗ್‌ ನೀಡಿದ ಕೋರೆ, ಈ ಬ್ರಿಡ್ಜ್‌ಗೆ ಸುರೇಶ್‌ ಅಂಗಡಿ ಅವರ ಸ್ಮರಣಾರ್ಥ ಅವರ ಹೆಸರು ಇಡಬೇಕು ಅನ್ನುವುದು ನನ್ನ ವೈಯಕ್ತಿಕ ಅಭಿಪ್ರಾಯ.ಅವರು ಇನ್ನೂ ಜೀವಂತವಾಗಿದ್ದಾರೆ ಎಂದು ಟಾಂಗ್‌ ನೀಡಿದರು. 

ಫ್ರೆಂಡ್ಲಿ ಫೈಟ್‌

ಈ ಬಗ್ಗೆ ಮಾಧ್ಯಮಗಳು ಕೇಳಿದಾಗ ಪ್ರತಿಕ್ರಿಯೆ ನೀಡಿದ ಸಂಸದ ಅಂಗಡಿ ನಾವಿಬ್ಬರು ನಿತ್ಯವೂ ಜಗಳ ಆಡುತ್ತೇವೆ, ಕೋರೆ ಅವರು ನಮ್ಮ ಹಿರಿಯ ನಾಯಕರು. ಇದು ಫ್ರೆಂಡ್ಲಿ ಫೈಟ್‌ ಎಂದಿದ್ದಾರೆ.