ಮಿತಿ ಮೀರಿದ ಮಾಲಿನ್ಯ

Team Udayavani, Dec 26, 2018, 9:43 AM IST

ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿಯ ವಾಯು ಗುಣಮಟ್ಟ ದಿನದಿಂದ ದಿನಕ್ಕೆ ಕುಸಿಯುತ್ತಿದ್ದು, ವಿಪರೀತ ವಾಯುಮಾಲಿನ್ಯ ಹಾಗೂ ದಟ್ಟ ಮಂಜಿನಿಂದಾಗಿ ದಿಲ್ಲಿಯ ಜನಜೀವನ ಸಂಪೂರ್ಣ ಅಸ್ತವ್ಯಸ್ತವಾಗಿದೆ. ದೀಪಾವಳಿಯ ನಂತರ ದಿಲ್ಲಿಯಲ್ಲಿ ಮಾಲಿನ್ಯದ ಪ್ರಮಾಣ ತೀವ್ರಗೊಂಡಿದ್ದು, ಮತ್ತೂಮ್ಮೆ ಸಮ-ಬೆಸ ಸಂಖ್ಯೆ ಯೋಜನೆ ಜಾರಿಗೆ ಸಿಎಂ ಅರವಿಂದ ಕೇಜ್ರಿವಾಲ್‌ ಚಿಂತನೆ ನಡೆಸಿದ್ದಾರೆ.

ಸಮ ಸಂಖ್ಯೆಯಿಂದ ಕೊನೆಗೊಳ್ಳುವ ವಾಹನಗಳ ಸಂಚಾರಕ್ಕೆ ಒಂದು ದಿನ ಅವಕಾಶ, ಮಾರನೇ ದಿನ ಬೆಸ ಸಂಖ್ಯೆಯ ವಾಹನಗಳಿಗೆ ಸಂಚಾರಕ್ಕೆ ಅವಕಾಶ ಕಲ್ಪಿಸುವ ಯೋಜನೆ ಇದಾಗಿದೆ. ಹಿಂದೊಮ್ಮೆ ಈ ನಿಯಮ ಜಾರಿ ಮಾಡಿದ ಬಳಿಕ ಸ್ವಲ್ಪಮಟ್ಟಿಗೆ ಮಾಲಿನ್ಯ ಸಮಸ್ಯೆ ತಗ್ಗಿತ್ತು. ಈಗ ಮತ್ತೆ ಇದನ್ನು ಜಾರಿ ಮಾಡಲು ಸರ್ಕಾರ ಮುಂದಾಗಿದೆ.

84 ವಿಮಾನಗಳ ಸಂಚಾರ ವಿಳಂಬ: ಮಂಗಳ ವಾರ ದಟ್ಟ ಮಂಜಿನಿಂದಾಗಿ ದೃಷ್ಟಿ ಗೋಚರವು 50 ಮೀಟರ್‌ಗೆ ಇಳಿದ ಪರಿಣಾಮ, ವಿಮಾನ ಗಳ ಸಂಚಾರಕ್ಕೂ ತೊಂದರೆಯಾಯಿತು. ದಿಲ್ಲಿ ಏರ್‌ಪೋರ್ಟ್‌ನಲ್ಲಿ 2 ವಿಮಾನಗಳ ಸಂಚಾರ ರದ್ದಾದರೆ, 5 ವಿಮಾನಗಳ ಪಥ ಬದಲಿಸಲಾಯಿತು. 84 ವಿಮಾನಗಳ ಸಂಚಾರ ವಿಳಂಬವಾಯಿತು.

ವಿಮಾನ ಟೇಕಾಫ್ ಆಗಬೇಕೆಂದರೆ, ಕನಿಷ್ಠ 125 ಮೀಟರ್‌ ಗೋಚರತೆ ಇರಬೇಕಾಗುತ್ತದೆ. ಈಗಂತೂ ಮಂಜು ಹಾಗೂ ಮಾಲಿನ್ಯದಿಂದ ಪರಸ್ಪರ ಸಮೀಪದಲ್ಲಿದ್ದರೂ ಒಬ್ಬರಿಗೊಬ್ಬರು ಕಾಣದಂಥ ಸ್ಥಿತಿ ನಿರ್ಮಾಣವಾಗಿದೆ.
ಇನ್ನೊಂದೆಡೆ, ಮಾಲಿನ್ಯ ತೀವ್ರಗೊಂಡಿರುವ ಕಾರಣ ಉಸಿರಾಟದ ಸಮಸ್ಯೆಯನ್ನು ಹೊತ್ತು ಆಸ್ಪತ್ರೆಗಳಿಗೆ ಭೇಟಿ ನೀಡುತ್ತಿರುವವರ ಸಂಖ್ಯೆ ಗಣನೀಯವಾಗಿ ಏರಿಕೆಯಾಗಿದೆ ಎಂದು ಏಮ್ಸ್‌ ನಿರ್ದೇಶಕರು ಹೇಳಿದ್ದಾರೆ.