ಕಪಿಲ್‌ ದೇವ್‌ ಪಾತ್ರದಲ್ಲಿ ರಣವೀರ್‌ ನಟನೆ

Team Udayavani, Dec 28, 2018, 6:05 AM IST

ಮುಂಬಯಿ: ಕ್ರೀಡಾಪಟುಗಳು ಅಥವಾ ಕ್ರೀಡೆಗೆ ಸಂಬಂಧಿಸಿದ ವಿಚಾರಗಳನ್ನು ಬಳಸಿಕೊಂಡು ಸಿನಿಮಾ ಮಾಡುವ ಪರಿಪಾಠ ಬಾಲಿವುಡ್‌ನ‌ಲ್ಲಿ ಇತ್ತೀಚೆಗೆ ಜೋರಾಗಿದೆ. ಮೇರಿ ಕೋಮ್‌, ಧೋನಿ, ಮಿಲಾV ಸಿಂಗ್‌ ಜೀವನಾಧಾರಿತ ಸಿನಿಮಾ ತೆರೆಗೆ ಬಂದು ಭಾರೀ ಯಶಸ್ಸು ಗಳಿಸಿದ್ದು, ಈ ಯತ್ನಗಳು ಇನ್ನೂ ಜಾಸ್ತಿಯಾಗಲು ಕಾರಣವಾಯಿತು. 

ಇದೇ ಹಾದಿಯಲ್ಲಿ ಭಾರತ ಕ್ರಿಕೆಟ್‌ ತಂಡದ 1983ರ ಏಕದಿನ ವಿಶ್ವಕಪ್‌ ವಿಜಯವೂ ಸೇರಿಕೊಂಡಿದೆ. ಈ ಸಿನಿಮಾದಲ್ಲಿ ಇತ್ತೀಚೆಗಷ್ಟೇ ದೀಪಿಕಾ ಪಡುಕೋಣೆಯನ್ನು ವರಿಸಿದ, ರಣವೀರ್‌ ಸಿಂಗ್‌ ನಾಯಕನಾಗಿ ನಟಿಸುತ್ತಿದ್ದಾರೆ. ಅವರದ್ದಿಲ್ಲಿ ಕಪಿಲ್‌ ದೇವ್‌ ಪಾತ್ರ. ಸುದ್ದಿ ಹಳತೇ ಆದರೂ, ರಣವೀರ್‌ ಸಿಂಗ್‌ ಈ ಬಗ್ಗೆ ಟೀವಿ ವಾಹಿನಿಗೆ ಸಂದರ್ಶನ ನೀಡುವ ಮೂಲಕ ಅದು ಮತ್ತೂಮ್ಮೆ ಸದ್ದು ಮಾಡಿದೆ.

ರಣವೀರ್‌ ಸಿಂಗ್‌ ಸುದ್ದಿ ವಾಹಿನಿಯೊಂದಕ್ಕೆ ಸಂದರ್ಶನ ನೀಡಿ, ಒಂದು ದಿನ ತಾನು ಪಂದ್ಯ ನೋಡಲು ಲಾರ್ಡ್ಸ್‌ಗೆ ತೆರಳಿದ್ದೆ. ಆಗ ಭಾರೀ ಮಳೆ ಬಂದು ಒಂದೂ ಎಸೆತ ಸಾಧ್ಯವಾಗಿರಲಿಲ್ಲ. ಆಗ ಸಚಿನ್‌ ಮಾತಿಗೆ ಸಿಕ್ಕಿದ್ದರು. ಅಲ್ಲಿ ತಾನು ಕಪಿಲ್‌ ದೇವ್‌ ಪಾತ್ರ ನಿರ್ವಹಿಸುತ್ತಿರುವ ಬಗ್ಗೆ ಮಾಹಿತಿ ನೀಡಿದ್ದೆ. ಅದನ್ನು ಕೇಳಿ ತೆಂಡುಲ್ಕರ್‌ ಅಚ್ಚರಿಗೊಳಗಾಗಿದ್ದರು.  ಎಂದು ಅವರು ಹೇಳಿಕೊಂಡಿದ್ದಾರೆ. ಕಪಿಲ್‌ ದೇವ್‌ ಪಾತ್ರ ನಿರ್ವಹಿಸುತ್ತಿದ್ದರೂ, ಬೌಲಿಂಗ್‌ ಮಾಡುವುದು ಮಾತ್ರ ಬಹಳ ತಲೆಬಿಸಿಯಾಗಿದೆ. ಕಪಿಲ್‌ರಂತೆಯೇ ಚೆಂಡನ್ನು ಎಸೆಯುವುದು ಇನ್ನೂ ಕಷ್ಟ. ಅದಕ್ಕಾಗಿ ಕಠಿಣ ಶ್ರಮ ಹಾಕುತ್ತಿದ್ದೇನೆ ಎಂದು ಬಾಲಿವುಡ್‌ ದಿಗ್ಗಜ ಹೇಳಿಕೊಂಡಿದ್ದಾರೆ.