ಸೆಕೆಂಡ್‌ ಇನ್ನಿಂಗ್ಸ್‌ನತ್ತ ಶ್ರೀಮತಿ ಪ್ರಿಯಾಮಣಿ ಚಿತ್ತ!

Team Udayavani, Dec 30, 2018, 12:30 AM IST

ಚಿತ್ರರಂಗದಲ್ಲಿ ನಾಯಕ ನಟಿಯರು ಮದುವೆಯಾದರೆ ಅವರಿಗೆ ಅವಕಾಶಗಳು ಸಹಜವಾಗಿಯೇ ಕಡಿಮೆಯಾಗುತ್ತವೆ. ಹಾಗೇನಾದರೂ ಅವಕಾಶಗಳು ಮತ್ತೆ ಅವರನ್ನು ಹುಡುಕಿಕೊಂಡು ಬಂದರೂ, ಅದು ಪೋಷಕ ಪಾತ್ರಗಳು, ಮತ್ತಿತರ ಪಾತ್ರಗಳಿಗಷ್ಟೇ ಸೀಮಿತವಾಗಿರುತ್ತವೆ ಎಂಬುದು ಚಿತ್ರರಂಗದಲ್ಲಿ ಚಾಲ್ತಿಯಲ್ಲಿರುವ ಮಾತು. ಬಹುತೇಕ ನಟಿಮಣಿಯರ ವಿಷಯದಲ್ಲಿ ಈ ಮಾತು ನಿಜವಾಗಿರುವುದರಿಂದ ಚಿತ್ರರಂಗ ಮತ್ತು ಸಿನಿಪ್ರಿಯರು ಕೂಡ ಮರುಮಾತಿಲ್ಲದೆ ಈ ಮಾತನ್ನು ಒಪ್ಪಿಕೊಳ್ಳುತ್ತಾರೆ. ಆದರೆ ಕೆಲವು ನಾಯಕ ನಟಿಯರ ವಿಷಯದಲ್ಲಿ ಈ ಮಾತು ಸುಳ್ಳಾಗಿರುವುದು ಅಷ್ಟೇ ನಿಜ! ಮದುವೆಯಾಗಿ, ಮಕ್ಕಳಾದ ನಂತರವೂ ಬಣ್ಣದ ಬದುಕಿನಲ್ಲಿ ಬೇಡಿಕೆಯನ್ನು ಉಳಿಸಿಕೊಂಡು ವೃತ್ತಿಜೀವನವನ್ನು ಮುಂದುವರೆಸಿದ ಉದಾಹರಣೆಗಳು ಚಿತ್ರರಂಗದಲ್ಲಿ ಸಾಕಷ್ಟಿದೆ. ಆದರೆ, ಕನ್ನಡ ಚಿತ್ರರಂಗದಲ್ಲಿ ಈ ಬಗ್ಗೆ ಹೇಳುವುದಾದರೆ ಅಂತಹ ನಾಯಕಿಯರ ಸಂಖ್ಯೆಯಂತೂ ತುಂಬಾ ವಿರಳ. ಇನ್ನು ಕನ್ನಡದಲ್ಲಿ ಇತ್ತೀಚೆಗೆ ವೈವಾಹಿಕ ಬದುಕಿಗೆ ಕಾಲಿಟ್ಟ ನಂತರವೂ ಒಂದಷ್ಟು ಬೇಡಿಕೆಯನ್ನು ಉಳಿಸಿಕೊಂಡಿರುವ ನಟಿ ಎಂದರೆ ಪ್ರಿಯಾಮಣಿ. 

ಮೂಲತಃ ಕನ್ನಡದ ಹುಡುಗಿಯಾದರೂ ಪ್ರಿಯಾಮಣಿ ನಾಯಕ ನಟಿಯಾಗಿ ಪ್ರವರ್ಧಮಾನಕ್ಕೆ ಬಂದಿದ್ದು ತೆಲುಗು ಮತ್ತು ತಮಿಳು ಚಿತ್ರರಂಗದಲ್ಲಿ. ರಾಮ್‌ ಚಿತ್ರದಲ್ಲಿ ನಾಯಕ ನಟಿಯಾಗಿ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ ಪ್ರಿಯಾಮಣಿ, ಕನ್ನಡದ ಹಲವು ಸ್ಟಾರ್‌ ನಟರ ಚಿತ್ರಗಳಿಗೆ ನಾಯಕಿಯಾದರು. ಪುನೀತ್‌ ರಾಜಕುಮಾರ್‌, ಸುದೀಪ್‌, ಉಪೇಂದ್ರ, ದರ್ಶನ್‌, ಶಿವರಾಜಕುಮಾರ್‌, ಗಣೇಶ್‌, ದುನಿಯಾ ವಿಜಯ್‌ ಹೀಗೆ ಕನ್ನಡ ಹಲವು ಸ್ಟಾರ್‌ ನಾಯಕರ ಚಿತ್ರಗಳಲ್ಲಿ ಅಭಿನಯಿಸಿ ಸ್ಟಾರ್‌ ಹೀರೋಯಿನ್‌ ಎನಿಸಿಕೊಂಡರು. 

ಕನ್ನಡದಲ್ಲಿ ಬೇಡಿಕೆಯ ಹೀರೋಯಿನ್‌ ಆಗಿರುವಾಗಲೇ, ಉದ್ಯಮಿ ಮುಸ್ತಫಾ ರಾಜ್‌ ಅವರನ್ನು ವರಿಸುವ ಮೂಲಕ ವೈವಾಹಿಕ ಬದುಕಿಗೆ ಪ್ರಿಯಾಮಣಿ ಅಡಿಯಿಟ್ಟರು. ಇನ್ನೇನು ಪ್ರಿಯಾಮಣಿ ಫ್ಯಾಮಿಲಿ ಲೈಫ್ ಅಂತ ಅಲ್ಲೇ ಸೆಟಲ್‌ ಆಗುತ್ತಾರೆ. ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುವುದು ಅನುಮಾನ ಎನ್ನುತ್ತಿರುವಾಗಲೇ ಪ್ರಿಯಾಮಣಿ, ಚಿತ್ರರಂಗದಲ್ಲಿ ಮತ್ತೆ ಆ್ಯಕ್ಟಿವ್‌ ಆಗುವ, ಕಂ ಬ್ಯಾಕ್‌ ಆಗುವ ಸುಳಿವನ್ನು ನೀಡಿದ್ದಾರೆ. 

ಹೌದು, ಪ್ರಿಯಾಮಣಿ ಮದುವೆಯಾದ ಬಳಿಕ ಸದ್ಯ ಕನ್ನಡದಲ್ಲಿ ನನ್ನ ಪ್ರಕಾರ, ದಶರಥ, ಡಿಆರ್‌ 56 ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಇದರೊಂದಿಗೆ ತಮಿಳಿನಲ್ಲಿ ಕುತ್ತರಪಾಯಿಚ್ಚಿ, ತೆಲುಗಿನಲ್ಲಿ ಸಿರಿವೆನಿಲ್ಲಾ ಚಿತ್ರದಲ್ಲಿ ಅಭಿನಯಿಸುತ್ತಿದ್ದಾರೆ. ಇವೆಲ್ಲದರ ಜೊತೆ ತೆಲುಗಿನ ಸ್ಟಾರ್‌ ನಿರ್ದೇಶಕ ಎಸ್‌.ಎಸ್‌ ರಾಜಮೌಳಿ ನಿರ್ದೇಶನದ ಆರ್‌ಆರ್‌ಆರ್‌ ಚಿತ್ರದಲ್ಲೂ ಪ್ರಿಯಾ ಪ್ರಮುಖ ಪಾತ್ರವೊಂದನ್ನು ನಿರ್ವಹಿಸಲಿದ್ದಾರೆ ಎನ್ನಲಾಗುತ್ತಿದೆ. ಇನ್ನು ಕನ್ನಡ ಮತ್ತು ತೆಲುಗಿನಲ್ಲಿ ಒಂದೆರಡು ಹೊಸ ಚಿತ್ರಗಳಲ್ಲಿ ಪ್ರಿಯಾಮಣಿ ಅಭಿನಯಿಸುತ್ತಿದ್ದಾರೆ ಎಂಬ ಸುದ್ದಿಗಳು ಇದ್ದರೂ, ಆ ಚಿತ್ರದ ಬಗ್ಗೆ ಇನ್ನಷ್ಟೇ ಹೆಚ್ಚಿನ ಮಾಹಿತಿಗಳು ಹೊರಬೀಳಬೇಕಿದೆ. 

ಒಟ್ಟಾರೆ ಹೀರೋಯಿನ್‌ಗಳು ಮದುವೆಯ ಬಳಿಕ ಚಿತ್ರರಂಗಕ್ಕೆ ಗುಡ್‌ ಬೈ ಹೇಳುತ್ತಾರೆ, ಬೇಡಿಕೆ ಕಳೆದುಕೊಳ್ಳುತ್ತಾರೆ ಎಂಬ ಮಾತುಗಳ ನಡುವೆಯೇ ಚಿತ್ರರಂಗದಲ್ಲಿ ಸೆಕೆಂಡ್‌ ಇನ್ನಿಂಗ್ಸ್‌ ಶುರು ಮಾಡಲು ತಯಾರಿ ನಡೆಸಿರುವ ಪ್ರಿಯಾಮಣಿ, 2019ರಲ್ಲಿ ಸಾಲು ಸಾಲು ಚಿತ್ರಗಳ ಮೂಲಕ ಪ್ರೇಕ್ಷಕರ ಮುಂದೆ ಬರೋದಂತೂ ಗ್ಯಾರೆಂಟಿ. ಹೊಸಚಿತ್ರಗಳು, ಪ್ರಿಯಾಮಣಿ ಹೊಸ ಗೆಟಪ್‌ ಪ್ರೇಕ್ಷಕರಿಗೆ ಎಷ್ಟರ ಮಟ್ಟಿಗೆ ಇಷ್ಟವಾಗಲಿದೆ ಎಂಬುದು ಈ ಚಿತ್ರಗಳು ಬಿಡುಗಡೆಯಾದ ಮೇಲಷ್ಟೇ ಗೊತ್ತಾಗಲಿದೆ. ಬಾಲಿವುಡ್‌ನ‌ಲ್ಲಿ ಐಶ್ವರ್ಯಾ ರೈ, ಅನುಷ್ಕಾ ಶರ್ಮ, ಕರೀನಾ ಕಪೂರ್‌ ಅವರಂತೆ ಚಂದನವನ ಚೆಲುವೆ ಪ್ರಿಯಾಮಣಿ ಕೂಡ ಸಿನಿಕೆರಿಯರ್‌ನ ಸೆಕೆಂಡ್‌ ಇನ್ನಿಂಗ್ಸ್‌ ನಲ್ಲಿ ಸಕ್ಸಸ್‌ ಆಗುತ್ತಾರಾ..? ಎಂಬುದನ್ನು ಕಾದು ನೋಡಬೇಕು.