ಹಿಮಪಾತ: ಪ್ರವಾಸಿಗರ ರಕ್ಷಣೆ

Team Udayavani, Dec 30, 2018, 12:30 AM IST

ಸಿಲಿಗುರಿ: ಭಾರತ-ಚೀನಾ ಗಡಿ ಭಾಗದಲ್ಲಿರುವ ನಾಥುಲಾ ಎಂಬಲ್ಲಿ ಇತ್ತೀಚೆಗೆ ಉಂಟಾಗಿದ್ದ ಹಿಮಪಾತದಿಂದಾಗಿ ಈ ಭಾಗದಲ್ಲಿ ಸಿಲುಕಿಕೊಂಡಿದ್ದ ಪ್ರವಾಸಿಗರನ್ನು ಸೇನಾ ಕಾರ್ಯಾಚರಣೆಯ ಮೂಲಕ ರಕ್ಷಿಸಲಾಗಿದೆ. ರಕ್ಷಿಸಲ್ಪಟ್ಟ ಪ್ರವಾಸಿಗರಿಗೆ ವಸತಿ ಸೌಕರ್ಯ ನೀಡುವ ಉದ್ದೇಶದಿಂದ ಸೈನಿಕರಿದ್ದ ಕ್ಯಾಂಪ್‌ಗ್ಳಲ್ಲಿನ ಬರಾಕ್‌ಗಳನ್ನು ಖಾಲಿ ಮಾಡಿಸಲಾಗಿದ್ದು, ಸೈನಿಕರಿದ್ದ ಬಿಡಾರಗಳಲ್ಲೇ ಪ್ರವಾಸಿಗರಿಗೆ ಉಳಿದುಕೊಳ್ಳಲು ಆಶ್ರಯ ಕಲ್ಪಿಸ ಲಾಗಿದೆ. 

“ಸುಮಾರು 13,000 ಅಡಿಗಳ ಎತ್ತರದಲ್ಲಿರುವ ಪ್ರದೇಶದಲ್ಲಿ ಸುಮಾರು 90 ಪ್ರವಾಸಿಗರು ಸಿಲುಕಿದ್ದರು. ಇವರಲ್ಲಿ ಹೆಚ್ಚಿನವರು ಹಿರಿಯ ನಾಗರಿಕರು ಹಾಗೂ ಮಕ್ಕಳಿದ್ದರು. ಅವರನ್ನು ವಿಶೇಷ ಕಾರ್ಯಾಚರಣೆಗಳ ಮೂಲಕ 9,000 ಅಡಿಗಳಷ್ಟು ಎತ್ತರ ಪ್ರದೇಶಕ್ಕೆ ಕರೆತರಲಾಯಿತು. ಶುಕ್ರವಾರ ಸಂಜೆಯಿಂದ ಆರಂಭಗೊಂಡಿದ್ದ ಕಾರ್ಯಾಚರಣೆ ಶನಿವಾರ ಮಧ್ಯಾಹ್ನ ಮುಗಿದಿತ್ತು. ತೀವ್ರ ಹಿಮಬಾಧೆಯಿಂದಾಗಿ ಹಲವಾರು ಮಂದಿ ಅಸ್ವಸ್ಥರಾಗಿದ್ದು, ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ’ ಎಂದು ಸೇನಾಧಿಕಾರಿ ಬ್ರಿಗೇಡಿಯರ್‌ ಧನ್ವಾಲ್‌ ತಿಳಿಸಿದ್ದಾರೆ. 

ಕಾರ್ಯಾಚರಣೆ ಬಗ್ಗೆ ಮತ್ತಷ್ಟು ವಿವರಣೆ ನೀಡಿದ ಸಿಕ್ಕಿಂನ ಹಿರಿಯ ಪೊಲೀಸ್‌ ಅಧಿಕಾರಿಯೊಬ್ಬರು, “ಇದು ನಮ್ಮ ರಾಜ್ಯದಲ್ಲಿ ಇತ್ತೀಚೆಗೆ ಸೇನೆ ಕೈಗೊಂಡ ಅತಿ ದೊಡ್ಡ ಕಾರ್ಯಾಚರಣೆಯಾಗಿದೆ’ ಎಂದಿದ್ದಾರೆ. ಪ್ರವಾಸಿಗರ ಸುರಕ್ಷತೆಯ ಬಗ್ಗೆ ಮಾತನಾಡಿದ ಸಿಕ್ಕಿಂ ಜಿಲ್ಲಾಧಿಕಾರಿ ಕಪಿಲ್‌ ಮೀನಾ, “ಸದ್ಯಕ್ಕೆ ಸೈನಿಕರ ಶಿಬಿರಗಳಲ್ಲಿ ವಿಶ್ರಾಂತಿ ಪಡೆಯುತ್ತಿರುವ ಎಲ್ಲಾ ಪ್ರವಾಸಿಗರನ್ನು ಶನಿವಾರ ರಾತ್ರಿ ವೇಳೆಗೆ ಗ್ಯಾಂಗ್‌ಟಾಕ್‌ಗೆ ಕರೆತರಲಾಗುತ್ತದೆ’ ಎಂದಿದ್ದಾರೆ.