ಪೇಪರ್‌ ಸಹಿತ ಆರೋಗ್ಯ ಸೇವೆ

Team Udayavani, Dec 30, 2018, 12:30 AM IST

ಬೆಂಗಳೂರು: ನಿಮ್ಮ ಮನೆಯಲ್ಲಿ ಗರ್ಭಿಣಿಯರಿದ್ದಾರೆಯೇ? ಐದು ವರ್ಷದೊಳಗಿನ ಮಕ್ಕಳಿದ್ದಾರೆಯೇ? ಹೊಸ ವರ್ಷ ಆರಂಭದಿಂದ ಆರೋಗ್ಯ ಕೇಂದ್ರಗಳ ಕಿರಿಯ ಮಹಿಳಾ ಸಹಾಯಕಿಯರು ರಾಜ್ಯಾದ್ಯಂತ ಹಳ್ಳಿ ಹಳ್ಳಿಗಳಲ್ಲಿ ಟ್ಯಾಬ್‌ ಹಿಡಿದುಕೊಂಡು ಮನೆ ಬಾಗಿಲಿಗೆ ಬರಲಿದ್ದಾರೆ. ಗರ್ಭಿಣಿಯರಿಗೆ ಕಾಲಕಾಲಕ್ಕೆ ನೀಡಬೇಕಾದ ಚುಚ್ಚುಮದ್ದು, ಮಕ್ಕಳಿಗೆ ನೀಡಬೇಕಾದ ಲಸಿಕೆ ಇತ್ಯಾದಿ ವಿವರಗಳನ್ನು ಅವರೇ ಕಾಲಕಾಲಕ್ಕೆ ನೆನಪು ಮಾಡಿಕೊಡಲಿದ್ದಾರೆ. 

ರಾಜ್ಯದಲ್ಲಿ ನವಜಾತ ಶಿಶುಗಳ ಮತ್ತು ತಾಯಂದಿರ ಮರಣ ಪ್ರಮಾಣ ಕುಗ್ಗಿಸುವ ನಿಟ್ಟಿನಲ್ಲಿ ಆರೋಗ್ಯ ಕೇಂದ್ರಗಳ ಕಿರಿಯ ಮಹಿಳಾ ಆರೋಗ್ಯ ಸಹಾಯಕಿಯರ ಕಾರ್ಯಚಟುವಟಿಕೆಯನ್ನು ಜ.1ರಿಂದ ಕಾಗದ ಮುಕ್ತಗೊಳಿಸಲು (ಪೇಪರ್‌ಲೆಸ್‌) ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಮುಂದಾಗಿದೆ. ರಾಷ್ಟ್ರೀಯ ಆರೋಗ್ಯ ಅಭಿಯಾನದಡಿ ರಾಜ್ಯಾದ್ಯಂತ 7,737 ಕಿರಿಯ ಆರೋಗ್ಯ ಸಹಾಯಕಿಯರಿಗೆ ಟ್ಯಾಬ್‌ಗಳನ್ನು ಒದಗಿಸಿದೆ.

ಈ ಟ್ಯಾಬ್‌ಗಳಲ್ಲಿ ಗರ್ಭಿಣಿ, ಬಾಣಂತಿಯರು ಹಾಗೂ ನವಜಾತ ಶಿಶುಗಳ ಆರೋಗ್ಯ ಮಾಹಿತಿ ಒಳಗೊಂಡ ಕೇಂದ್ರ ಸರ್ಕಾರದ ಅನ್ಮೋಲ್‌ ಆ್ಯಪ್‌ ಅಳವಡಿಸಿದ್ದು, ಆರೋಗ್ಯ ಸಹಾಯಕಿಯರು ತಾವು ಸಂಗ್ರಹಿಸುವ ಮಾಹಿತಿಗಳನ್ನು ನೇರವಾಗಿ ಡಿಜಿಟಲ್‌ ರೂಪದಲ್ಲಿ ಅನ್ಮೋಲ್‌ ಆ್ಯಪ್‌ಗೆ ಸೇರ್ಪಡೆಗೊಳಿಸಲಿದ್ದಾರೆ. ಪ್ರಸ್ತುತ ಟ್ಯಾಬ್‌ ಬಳಕೆಯ ಕುರಿತು ತಾಲೂಕು ಹಾಗೂ ಜಿಲ್ಲಾ ಕೇಂದ್ರಗಳಲ್ಲಿ ತರಬೇತಿ ನೀಡಲಾಗುತ್ತಿದೆ. 

ಇಲಾಖೆಯಿಂದ 5,000 ಜನಸಂಖ್ಯೆಗೆ ಒಬ್ಬ ಕಿರಿಯ ಆರೋಗ್ಯ ಸಹಾಯಕಿಯರನ್ನು ನಿಯೋಜಿಸಲಾಗಿರುತ್ತದೆ. ಅವರು ತಮ್ಮ ವ್ಯಾಪ್ತಿಯಲ್ಲಿರುವ ಪ್ರತಿ ಮನೆಗೂ ಭೇಟಿ ನೀಡಿ ಗರ್ಭಿಣಿಯರ, ನವಜಾತ ಶಿಶುಗಳ ಆರೋಗ್ಯ ಸಂಬಂಧಿಸಿದ ಎಲ್ಲಾ ಮಾಹಿತಿಗಳನ್ನು ಬರೆದುಕೊಂಡು, ಆನಂತರ ದಾಖಲಾತಿ ಪುಸ್ತಕಕ್ಕೆ ಸೇರಿಸಿ ತಿಂಗಳ ನಂತರ ಅದನ್ನು ತಾಲೂಕು ಅಥವಾ ಜಿಲ್ಲಾಸ್ಪತ್ರೆಗೆ ಕಳುಹಿಸಿ ಕಂಪ್ಯೂಟರ್‌ಗೆ ಸೇರಿಸಬೇಕಿತ್ತು. ಇಲ್ಲಿ ದತ್ತಾಂಶಗಳು ಕೈತಪ್ಪುವ ಸಾಧ್ಯತೆ ಹೆಚ್ಚಿತ್ತು. ಅಲ್ಲದೇ ಸಹಾಯಕಿಯರಿಗೆ ಬರೆಯುವುದೇ ಸಾಕಷ್ಟು ಶ್ರಮವಾಗುತ್ತಿತ್ತು. ಈಗ ಟ್ಯಾಬ್‌ ವಿತರಣೆಯಿಂದ ಮಾಹಿತಿ ಸಂಗ್ರಹಣೆ, ಸಂರಕ್ಷಣೆ ಹಾಗೂ ಸಂವಹನಕ್ಕೆ ಸಹಾಯಕವಾಗಲಿದೆ. ಈ ಟ್ಯಾಬ್‌ಗ ಅವಶ್ಯಕವಿರುವ ಇಂಟರ್‌ನೆಟ್‌ಗೆ ಸ್ಥಳೀಯ ಉತ್ತಮ ಸಿಮ್‌ ಖರೀದಿಸಿಲು ಇಲಾಖೆ ಸೂಚಿಸಿದ್ದು, ಪ್ರತಿ ತಿಂಗಳು ತಲಾ 190 ರೂ. ಇಂಟರ್‌ನೆಟ್‌ ಶುಲ್ಕ ನೀಡಲಿದೆ.

ಆರೋಗ್ಯ ಸಹಾಯಕಿಯರು ಟ್ಯಾಬ್‌ನಲ್ಲಿ ದತ್ತಾಂಶ ದಾಖಲಿಸುವುದರಿಂದ ಗರ್ಭಿಣಿಯ ಆರೋಗ್ಯ ಸ್ಥಿತಿಗತಿ, ತಾಯಿ ಹಾಗೂ ಮಗುವಿಗೆ ನೀಡಬೇಕಾದ ಚಿಕಿತ್ಸೆ, ಚುಚ್ಚುಮದ್ದು, ಪೌಷ್ಠಿಕತೆಗಳ ಕುರಿತಾದ ಎಲ್ಲಾ ಮಾಹಿತಿಯೂ ಕ್ಷಣ ಮಾತ್ರದಲ್ಲಿ ಸಿಗುತ್ತದೆ. ಇದರಿಂದಾಗಿ ಅವರ ಆರೋಗ್ಯ ಕುರಿತು ಹೆಚ್ಚಿನ ನಿಗಾವಹಿಸಿ ಗರ್ಭಿಣಿ, ನವಜಾತ ಶಿಶುಗಳ ಮತ್ತು ತಾಯಂದಿರ ಮರಣ ಪ್ರಮಾಣ ಕುಗ್ಗಿಸಬಹುದು ಎನ್ನುತ್ತಾರೆ ಮಕ್ಕಳ ಆರೋಗ್ಯ ಘಟಕದ ಉಪ ನಿರ್ದೇಶಕರು.

ಈ ಟ್ಯಾಬ್‌ ಕೇವಲ ಗರ್ಭಿಣಿ, ತಾಯಿ ಹಾಗೂ ಮಕ್ಕಳ ಮಾಹಿತಿ ಸಂಗ್ರಹಣೆಗೆ ಸೀಮಿತವಾಗದೇ, ಬದಲಾದ ಜೀವನ ಶೈಲಿಯಿಂದ ಗ್ರಾಮೀಣ ಭಾಗದಲ್ಲಿ ಹೆಚ್ಚಾಗುತ್ತಿರುವ ರಕ್ತದೊತ್ತಡ, ಮಧುಮೇಹ, ಕ್ಯಾನ್ಸರ್‌ನಂತಹ ಅಸಾಂಕ್ರಾಮಿಕ ರೋಗಗಳ ಸಮೀಕ್ಷೆಗೆ ನೆರವಾಗಲಿದೆ. ಗ್ರಾಮೀಣ ಭಾಗದ 30 ವರ್ಷ ಮೇಲ್ಪಟ್ಟವರನ್ನು ಅಸಾಂಕ್ರಾಮಿಕ ರೋಗಗಳ ಪರೀಕ್ಷೆ ನಡೆಸಿ ರೋಗ ಪತ್ತೆಯಾದಲ್ಲಿ ಅವರ ಮಾಹಿತಿಯನ್ನು ದಾಖಲಿಸಿಕೊಂಡು ನಿರಂತರವಾಗಿ ಅವರ ಆರೋಗ್ಯ ಹಾಗೂ ಚಿಕಿತ್ಸೆಯ ಮಾಹಿತಿ ಪಡೆಯಲು ಕೂಡಾ ಈ ಟ್ಯಾಬ್‌ಗಳನ್ನು ಉಪಯೋಗಿಸಲಾಗುತ್ತದೆ ಎಂದು ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದರು.

ಒಂದಂಕಿ ಇಳಿದ ನವಜಾತ ಶಿಶು ಮರಣ ದರ
ರಾಜ್ಯದಲ್ಲಿ ನವಜಾತ ಶಿಶುಗಳ ಮರಣ ಪ್ರಮಾಣ ಕಳೆದ 3 ವರ್ಷಕ್ಕಿಂತ ಕಡಿಮೆಯಾಗಿದೆ. ಹುಟ್ಟಿದ ದಿನದಿಂದ 28 ದಿನಗಳ ಒಳಗೆ ಮರಣ ಹೊಂದುವ ಮಕ್ಕಳ ಪ್ರಮಾಣವನ್ನು ನವಜಾತ ಶಿಶುಗಳ ಮರಣ ಪ್ರಮಾಣ ಎಂದು ಪರಿಗಣಿಸಲಾಗುತ್ತದೆ. ಸಾವಿರ ಮಕ್ಕಳಿಗೆ ಎಷ್ಟು ಮಕ್ಕಳು ಮೃತಪಟ್ಟಿದ್ದಾರೆ ಎಂಬುದರ ಮೇಲೆ ಸರಾಸರಿ ಲೆಕ್ಕ ಹಾಕಲಾಗುತ್ತದೆ. ಆರೋಗ್ಯ ಇಲಾಖೆ ವರದಿಯಂತೆ (ಎಚ್‌ಎಂಐಎಸ್‌) ಕಳೆದ 3 ವರ್ಷ ನವಜಾತ ಶಿಶುಗಳ ಮರಣ ಪ್ರಮಾಣ 13 (ಒಂದು ಸಾವಿರಕ್ಕೆ) ಇತ್ತು, ಆದರೆ, ಈ ವರ್ಷ 12ಕ್ಕೆ ಇಳಿದಿದೆ. ಜಿಲ್ಲಾವಾರು ಕಲಬುರಗಿ ಮತ್ತು ಹಾಸನ ಪ್ರಥಮ ಸ್ಥಾನದಲ್ಲಿದ್ದರೆ, ಬೆಂಗಳೂರು ನಗರ ಕೊನೆಯ ಸ್ಥಾನದಲ್ಲಿದೆ.

ಮನೆ ಹೆರಿಗೆ ಕಡಿಮೆಯಾಗಿದೆ. ಗ್ರಾಮಾಂತರ ಪ್ರದೇಶದಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಆಶಾ ಕಾರ್ಯಕರ್ತೆಯರು, ಆರೋಗ್ಯ ಸಹಾಯಕಿಯರ ನಿರಂತರವಾಗಿ ಗರ್ಭಿಣಿಯರಿಗೆ ಮಾಹಿತಿ ನೀಡುತ್ತಿದ್ದಾರೆ. ಇದರಿಂದಾಗಿ ಶಿಶು ಮತ್ತು ತಾಯಿ ಮರಣ ಪ್ರಮಾಣ ಕಡಿಮೆಯಾಗಿದೆ. ಟ್ಯಾಬ್‌ ವಿತರಣೆಯು ಆರೋಗ್ಯ ಸಹಾಯಕಿಯರಿಗೆ ಸಾಕಷ್ಟು ನೆರವಾಗಲಿದೆ. ಪ್ರಸ್ತುತ ತರಬೇತಿ ನೀಡುತ್ತಿದ್ದು, ಜ.1ರಿಂದ ಟ್ಯಾಬ್‌ ಬಳಕೆ ಆರಂಭವಾಗಲಿದ್ದು, ಇಲಾಖೆಯ ಹೊಸ ಯೋಜನೆಗಳ ಡಿಜಿಟಲ್‌ ಮಾಹಿತಿ ಸಂಗ್ರಹಣೆಗೂ ಇದನ್ನು ಬಳಕೆ ಮಾಡಿಕೊಳ್ಳಲಾಗುತ್ತದೆ.
– ಡಾ.ಪ್ರಭುದೇವ್‌ ಗೌಡ, ಮಕ್ಕಳ ಆರೋಗ್ಯ ವಿಭಾಗ ಉಪನಿರ್ದೆಶಕರು

– ಜಯಪ್ರಕಾಶ್‌ ಬಿರಾದಾರ್‌