ಸಿದ್ಧಗಂಗಾ ಶ್ರೀಗಳ ಆರೋಗ್ಯ ಸ್ಥಿರ

Team Udayavani, Jan 12, 2019, 12:40 AM IST

ತುಮಕೂರು: ಸರ್ಕಾರದ ನಿರ್ದೇಶನದಂತೆ ಜಯದೇವ ಆಸ್ಪತ್ರೆಯ ನಿರ್ದೇಶಕ ಡಾ.ಮಂಜುನಾಥ್‌ ನೇತೃತ್ವದ ನುರಿತ ವೈದ್ಯರ ತಂಡ ಶುಕ್ರವಾರ ಸಿದ್ಧಗಂಗಾ ಮಠದ ಡಾ.ಶಿವಕುಮಾರ ಸ್ವಾಮೀಜಿಯವರ ಆರೋಗ್ಯದ ತಪಾಸಣೆ ನಡೆಸಿತು. 

ಸಿದ್ಧಗಂಗಾ ಮಠದ ಸಿದ್ಧಲಿಂಗ ಸ್ವಾಮೀಜಿಯವರಿಗೆ ಗುರುವಾರ ಕರೆ ಮಾಡಿ ಹಿರಿಯ ಶ್ರೀಗಳ ಆರೋಗ್ಯ ವಿಚಾರಿಸಿದ್ದ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ, ನುರಿತ ವೈದ್ಯರ ತಂಡವನ್ನು ಶ್ರೀಗಳ ತಪಾಸಣೆಗಾಗಿ ಕಳುಹಿಸುವುದಾಗಿ ಹೇಳಿದ್ದರು. ಅದರಂತೆ ಶುಕ್ರವಾರ ಬೆಂಗಳೂರಿನ ಜಯದೇವ ಆಸ್ಪತ್ರೆಯ ನಿರ್ದೇಶಕ ಡಾ.ಮಂಜುನಾಥ್‌ ನೇತೃತ್ವದ ಐವರು ವೈದ್ಯರ ತಂಡ ಸಿದ್ಧಗಂಗಾ ಆಸ್ಪತ್ರೆಗೆ ಆಗಮಿಸಿ, ಶ್ರೀಗಳ ಆರೋಗ್ಯ ತಪಾಸಣೆ ನಡೆಸಿತು.

ಕಾರ್ಡಿಯಾಲಾಜಿಸ್ಟ್‌ ಡಾ.ರವೀಂದ್ರನಾಥ್‌, ಕಿದ್ವಾಯಿ ಆಸ್ಪತ್ರೆಯ ಶಸ್ತ್ರಚಿಕಿತ್ಸಕ ಡಾ.ರವಿ ಅರ್ಜುನ್‌, ಜಯದೇವ ಆಸ್ಪತ್ರೆ ಅರವಳಿಕೆ ತಜ್ಞ ಡಾ.ಮಂಜುನಾಥ್‌, ಚೆಸ್ಟ್‌ ಫಿಜಿಶಿಯನ್‌ ಡಾ.ನಾಗರಾಜು ತಂಡದಲ್ಲಿದ್ದರು. ತಪಾಸಣೆ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಜಯದೇವ ಆಸ್ಪತ್ರೆಯ ನಿರ್ದೇಶಕ ಡಾ.ಮಂಜುನಾಥ್‌, ಶ್ರೀಗಳ ಶಕ್ತಿ ಕ್ಷೀಣಿಸಿದ್ದು, ಸ್ವಂತ ಉಸಿರಾಟದ ಶಕ್ತಿಯ ಕೊರತೆ ಇದೆ. ಶ್ರೀಗಳು ಕಣ್ಣು ಬಿಟ್ಟು ನೋಡುತ್ತಿರುವುದನ್ನು ನೋಡಿದರೆ ಅವರಿಗೆ ಗುಣವಾಗುತ್ತೆ ಎನ್ನುವ ಆಶಾಭಾವನೆ ಇದೆ. ಶ್ರೀಗಳ ದೇಹದಲ್ಲಿ ಪ್ರೋಟಿನ್‌ ಅಂಶ ಏರಿಕೆಯಾಗಿದ್ದು, ಸೋಂಕು ಸಹ ಕಡಿಮೆಯಾಗಿದೆ. ಅವರ ಬೆನ್ನು ಬಾಗಿರುವ ಹಿನ್ನೆಲೆಯಲ್ಲಿ ಲಂಗ್ಸ್‌ ಮೇಲೆ ಪರಿಣಾಮ ಬೀರುತ್ತಿದ್ದು, ಎಲ್ಲಾ ಸುಸಜ್ಜಿತ ವ್ಯವಸ್ಥೆ ಇರುವ ಸಿದ್ಧಗಂಗಾ ಆಸ್ಪತ್ರೆಯಲ್ಲಿಯೇ ಶ್ರೀಗಳಿಗೆ ಚಿಕಿತ್ಸೆ ಮುಂದುವರಿಯಲಿದೆ ಎಂದರು.