ಸೇನೆಗೆ 3,000ಕ್ಕೂ ಅಧಿಕ ಮಿಲಾನ್‌ ಆ್ಯಂಟಿ ಟ್ಯಾಂಕ್‌ ಗೈಡೆಡ್‌ ಮಿಸೈಲ್

Team Udayavani, Jan 21, 2019, 9:46 AM IST

ಹೊಸದಿಲ್ಲಿ : ಭಾರತೀಯ ಸೇನೆಯ ಪದಾತಿದಳವನ್ನು ಬಲಿಷ್ಠಗೊಳಿಸುವ ನಿಟ್ಟಿನಲ್ಲಿ ಫ್ರಾನ್ಸ್‌ನಿಂದ 1,000 ಕೋಟಿ ರೂ. ವೆಚ್ಚದಲ್ಲಿ 3,000ಕ್ಕೂ ಅಧಿಕ ಮಿಲಾನ್‌ 2ಟಿ ಆ್ಯಂಟಿ ಟ್ಯಾಂಕ್‌ ಗೈಡೆಡ್‌ ಮಿಸೈಲ್‌ಗ‌ಳನ್ನು  ಖರೀದಿಸಲು ನಿರ್ಧರಿಸಲಾಗಿದೆ. 

ಈ ಖರೀದಿ ಪ್ರಸ್ತಾವವು ರಕ್ಷಣಾ ಸಚಿವಾಲಯದ ಉಚ್ಚ ಮಟ್ಟದ ಸಭೆಯಲ್ಲಿ ಶೀಘ್ರವೇ ಚರ್ಚೆಗೆ ಬರಲಿದೆ. ಟ್ಯಾಂಕ್‌ ನಿಗ್ರಹ ನಿರ್ದೇಶಿತ ಕ್ಷಿಪಣಿಗಳನ್ನು ಖರೀದಿಸುವಲ್ಲಿ ಫ್ರೆಂಚ್‌ ಸಂಸ್ಥೆಯೊಂದಿಗೆ ಭಾರತ್‌ ಡೈನಾಮಿಕ್ಸ್‌ ಲಿಮಿಟೆಡ್‌ (ಬಿಡಿಎಲ್‌) ಭಾಗೀದಾರಿಕೆಯನ್ನು ಹೊಂದಲಿದೆ ಎಂದು ರಕ್ಷಣಾ ಸಚಿವಾಲಯದ ಮೂಲಗಳು ಎಎನ್‌ಐ ಸುದ್ದಿಸಂಸ್ಥೆಗೆ ತಿಳಿಸಿವೆ. 

ನಿಜಕ್ಕಾದರೆ ಭಾರತೀಯ ಸೇನೆಗೆ ವಿವಿಧ ಬಗೆಯ ಸುಮಾರು 7,000 ಟ್ಯಾಂಕ್‌ ನಿಗ್ರಹ ನಿರ್ದೇಶಿತ ಕ್ಷಿಪಣಿಗಳು ಬೇಕಿವೆ. ಜತೆಗೆ ಸುಮಾರು 850 ವಿವಿಧ ನಮೂನೆಯ ಲಾಂಚರ್‌ಗಳು ಬೇಕಿವೆ.

ಭಾರತೀಯ ಸೇನೆ ಮೂರನೇ ತಲೆಮಾರಿನ ಎಟಿಜಿಂ ಗಳನ್ನು ಖರೀದಿಸಲು ಬಯಸಿದೆ. ಈಗ ಸೇನೆಯ ಬಳಿಯಿರುವ ಮಿಲಾನ್‌ 2ಟಿ ಮತ್ತು ಕಾಂಕರ್ ಎಟಿಜಿಎಂ ಗಳಿಗಿಂತ ದೂರ ವ್ಯಾಪ್ತಿ ಹೊಂದಿರುವ  ಮೂರನೇ ತಲೆಮಾರಿನ ಎಟಿಜಿಎಂ ಗಳು ಹೆಚ್ಚು ಪರಿಣಾಮಕಾರಿಯೂ ಅಧಿಕ ದಾಳಿ ಸಾಮರ್ಥ್ಯದವುಗಳೂ ಆಗಿರುತ್ತವೆ ಎಂದು ಸೇನಾ ಮೂಲಗಳು ತಿಳಿಸಿವೆ.