ಅಂಡಮಾನ್‌ ನಿಕೋಬಾರ್‌ನಲ್ಲಿ ಐಎನ್‌ಎಸ್‌ ಕೊಹಾಸಾ ಗೆ ಚಾಲನೆ

Team Udayavani, Jan 24, 2019, 1:52 PM IST

ಹೊಸದಿಲ್ಲಿ : ಅಂಡಮಾನ್‌ ನಿಕೋಬಾರ್‌ ದೂರ-ಸಮುದ್ರದಲ್ಲಿನ ತನ್ನ ಮೂರನೇ ನೆಲೆಯಾಗಿ ಭಾರತೀಯ ನೌಕಾಪಡೆ ಇಂದು ಗುರುವಾರ ಶಿವಪುರ (Shibpur) ದಲ್ಲಿನ ನೌಕಾ ವಾಯು ಕೇಂದ್ರವನ್ನು ದಿಗ್ಲಿಪುರದಲ್ಲಿ ಐಎನ್‌ಎಸ್‌ ಕೊಹಾಸಾ ಹೆಸರಿನಲ್ಲಿ ಚಾಲನೆಗೊಳಿಸಿದೆ.

ಭಾರತೀಯ ನೌಕಾ ಪಡೆಯ ಚೀಫ್ ಅಡ್ಮಿರಲ್‌ ಸುನಿಲ್‌ ಲಾಂಬಾ ಅವರು ಐಎನ್‌ಎಸ್‌ ಕೊಹಾಸಾವನ್ನು ವಿಧ್ಯುಕ್ತವಾಗಿ ಆರಂಭಿಸಿದರು. ಅತ್ಯಂತ ಅದ್ದೂರಿಯಾಗಿ ಮತ್ತು ವರ್ಣರಂಜಿತವಾಗಿ ನಡೆದ ಈ ಕಾರ್ಯಕ್ರಮದಲ್ಲಿ ಅನೇಕ ಗಣ್ಯರು, ಹಿರಿಯ ಅಧಿಕಾರಿಗಳು ಪಾಲ್ಗೊಂಡಿದ್ದರು. 

ಅಂಡಮಾನ್‌ ನಿಕೋಬಾರ್‌ ದ್ವೀಪ ಸಮೂಹದ ಉತ್ತರ ಭಾಗದಲ್ಲಿನ ರನ್‌ ವೇ ಪಟ್ಟಿಯನ್ನು ಮೇಲ್ಮಟ್ಟಕ್ಕೇರಿಸಿ ಪೂರ್ಣ ಪ್ರಮಾಣದ ವಾಯು ನೆಲೆಯನ್ನಾಗಿ ಪರಿವರ್ತಿಸಿ ಅದಕ್ಕೆ ಐಎನ್‌ಎಸ್‌ ಕೊಹಾಸಾ ಎಂದು ನಾಮಕರಣ ಮಾಡಲಾಗಿದೆ. 

ಈ ಹೊಸ ವಾಯು ನೆಲೆಯ ಮೇಲೆ ಭಾರತೀಯ ನೌಕಾ ಪಡೆಗೆ ಪೂರ್ಣ ನಿಯಂತ್ರಣ ಇರುತ್ತದೆ. ಹಿಂದೂ ಮಹಾಸಾಗರದ ಈ ಭಾಗದಲ್ಲಿ ಭಾರತೀಯ ನೌಕಾಪಡೆಯ ಬಲವರ್ಧನೆ ಮತ್ತು ವಿಚಕ್ಷಣೆ ಸಾಮರ್ಥ್ಯವನ್ನು ಹೆಚ್ಚಿಸುವಲ್ಲಿ  ಈ ವಾಯು ನೆಲೆಯು ಮಹತ್ತರ ಪಾತ್ರವನ್ನು ವಹಿಸುತ್ತದೆ ಎಂದು ನೌಕಾ ಪಡೆ ಮೂಲಗಳು ಹೇಳಿವೆ.