ಟಿ-20 ವಿಶ್ವಕಪ್: ಮೊದಲ ಪಂದ್ಯದಲ್ಲಿ ದ.ಆಫ್ರಿಕಾ ಎದುರಿಸಲಿರುವ ಭಾರತ

Team Udayavani, Jan 29, 2019, 7:10 AM IST

ಸಿಡ್ನಿ: ಆಸ್ಟ್ರೇಲಿಯಾದಲ್ಲಿ 2020ರ ಅಕ್ಟೋಬರ್ ನಲ್ಲಿ ನಡೆಯಲಿರುವ ಪುರುಷರ ಟಿ-20 ವಿಶ್ವಕಪ್ ನಲ್ಲಿ ಭಾರತ ತನ್ನ ಮೊದಲ ಪಂದ್ಯವನ್ನು ದಕ್ಷಿಣ ಆಫ್ರಿಕಾ ವಿರುದ್ಧ ಆಡಲಿದೆ. ಮಹಿಳಾ ವಿಶ್ವಕಪ್ ನಲ್ಲಿ ಭಾರತೀಯ ಮಹಿಳಾ ತಂಡ ಉದ್ಘಾಟನಾ ಪಂದ್ಯದಲ್ಲೇ ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ. 

ಮಂಗಳವಾರ ಬೆಳಗ್ಗೆ ಸಿಡ್ನಿಯಲ್ಲಿ ವಿಶ್ವಕಪ್ ವೇಳಾಪಟ್ಟಿ ಐಸಿಸಿ ಬಿಡುಗಡೆಗೊಳಿಸಿತು. ಇದೇ ಮೊದಲ ಬಾರಿಗೆ ಮಹಿಳಾ ಮತ್ತು ಪುರುಷರ ಟಿ-20 ವಿಶ್ವಕಪ್ ಒಂದೇ ವರ್ಷ ಒಂದೇ ದೇಶದಲ್ಲಿ ನಡೆಯಲಿದೆ. 2020ರ ಫೆಬ್ರವರಿ 21ರಿಂದ ಮಾರ್ಚ್ 8 ರವರೆಗೆ ಮಹಿಳಾ ವಿಶ್ವಕಪ್ ನಡೆದರೆ, ಅದೇ ವರ್ಷ ಅಕ್ಟೋಬರ್ 18ರಿಂದ ನವೆಂಬರ್ 15 ರವರೆಗೆ ಪುರುಷರ ವಿಶ್ವಕಪ್ ನಡೆಯಲಿದೆ. 

*  16 ಪುರುಷ ತಂಡಗಳು ಒಟ್ಟು 45 ಪಂದ್ಯಗಳನ್ನು ಈ ವಿಶ್ವಕಪ್ ನಲ್ಲಿ ಆಡಲಿದೆ. 
* ಡಿಸೆಂಬರ್ 31, 2018ಕ್ಕೆ ಸರಿಯಾಗಿ ಐಸಿಸಿ ಟಿ-20 ರ‍್ಯಾಂಕಿಂಗ್ ನ ಅಗ್ರ 8 ತಂಡಗಳು ವಿಶ್ವಕಪ್ ಗೆ ನೇರ ಪ್ರವೇಶ ಪಡೆದಿವೆ. ಪಾಕಿಸ್ತಾನ ಮತ್ತು ಭಾರತ ಮೊದಲೆರಡು ಸ್ಥಾನದಲ್ಲಿರುವುದರಿಂದ ವಿಶ್ವಕಪ್ ನಲ್ಲಿ ಬೇರೆ ಬೇರೆ ಗುಂಪಿನಲ್ಲಿ ಸೆಣೆಸಲಿವೆ. 
*  ಎರಡೂ ವಿಶ್ವಕಪ್ ಫೈನಲ್ ಪಂದ್ಯಗಳು ಮೆಲ್ಬೋರ್ನ್ ನಲ್ಲಿ ನಡೆಯಲಿದೆ. 
*  ಮಾರ್ಚ್ 8 ರಂದು ಮಹಿಳಾ ಫೈನಲ್ ನಡೆದರೆ, ನವೆಂಬರ್ 15 ರಂದು ಪುರುಷರ ಫೈನಲ್ ಪಂದ್ಯ ನಡೆಯಲಿದೆ. 
*  ಮಹಿಳಾ ಫೈನಲ್ ಪಂದ್ಯ ಹೊಸ ದಾಖಲೆ ಬರೆಯುವ ಸಾಧ್ಯತೆಯಿದೆ. ಎಲ್ಲಾ ಮಹಿಳಾ ಕ್ರೀಡೆಯ ಫೈನಲ್ ಗಿಂತ ಹೆಚ್ಚು ಜನರು ಈ ಫೈನಲ್ ವೀಕ್ಷಿಸುವ ಸಾಧ್ಯತೆ ಇದೆ. 
* ಮಹಿಳಾ ಕೂಟದ ಮೊದಲ ಪಂದ್ಯ ಸಿಡ್ನಿಯಲ್ಲಿ ವಿಜೃಂಭಣೆಯಿಂದ ನಡೆಯಲಿದೆ. ಮೊದಲ ಪಂದ್ಯದಲ್ಲಿ ಭಾರತ ತಂಡ ಆತಿಥೇಯ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ. 
* ಪುರುಷರ ವಿಶ್ವಕಪ್ ನ ಮೊದಲ ಪಂದ್ಯ ಕೂಡಾ ಸಿಡ್ನಿಯಲ್ಲಿ ನಡೆಯಲಿದ್ದು, ಆಸ್ಟ್ರೇಲಿಯಾ  ತಂಡ ಟಿ-20 ಅಗ್ರ ಕ್ರಮಾಂಕದ ತಂಡ ಪಾಕಿಸ್ತಾನವನ್ನು ಎದುರಿಸಲಿದೆ. 
* ಭಾರತ ಪುರುಷರ ತಂಡ ತನ್ನ ಮೊದಲ ಪಂದ್ಯವನ್ನು ದ.ಆಪ್ರಿಕಾ ವಿರುದ್ಧ ಆಡಲಿದೆ. ಇದು ಅಕ್ಟೋಬರ್ 24ರಂದು ಪರ್ತ್ ನಲ್ಲಿ ನಡೆಯಲಿದೆ.
* ಅಂತಾರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ಭರವಸೆ ಮೂಡಿಸುತ್ತಿರುವ ಅಫಘಾನಿಸ್ತಾನ ತಂಡ ಕೂಟಕ್ಕೆ ನೇರ ಅರ್ಹತೆ ಪಡೆದಿದೆ. 

ಪುರುಷರ ಗುಂಪು:
ಗ್ರೂಪ್ ‘ಎ’ : ಪಾಕಿಸ್ತಾನ, ಆಸ್ಟ್ರೇಲಿಯಾ , ವೆಸ್ಟ್ ಇಂಡೀಸ್, ನ್ಯೂಜಿಲ್ಯಾಂಡ್, 2 ಅರ್ಹತಾ ತಂಡಗಳು.
ಗ್ರೂಪ್ ‘ಬಿ’ : ಭಾರತ, ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ, ಅಫಘಾನಿಸ್ತಾನ, 2 ಅರ್ಹತಾ ತಂಡಗಳು. 

ಮಹಿಳಾ ಗುಂಪು
ಗ್ರೂಪ್ ‘ಎ’; ಆಸ್ಟ್ರೇಲಿಯಾ , ನ್ಯೂಜಿಲ್ಯಾಂಡ್, ಭಾರತ, ಶ್ರೀಲಂಕಾ, ಒಂದು ಅರ್ಹತಾ ತಂಡ.
ಗ್ರೂಪ್ ‘ಬಿ’: ಇಂಗ್ಲೆಂಡ್, ವೆಸ್ಟ್ ಇಂಡೀಸ್, ದ.ಆಫ್ರಿಕಾ, ಪಾಕಿಸ್ತಾನ, ಒಂದು ಅರ್ಹತಾ ತಂಡ.