ಮತ್ತೆ ಕುಶಲಕರ್ಮಿಗಳಿಗೆ ನೆರವಾದ ರೈಲ್ವೆ ಮಂಡಳಿ

Team Udayavani, Jan 30, 2019, 12:50 AM IST

ಹೊಸದಿಲ್ಲಿ: ಇತ್ತೀಚೆಗೆ, ವಾರಾಣಸಿ ಮತ್ತು ರಾಯ್‌ಬರೇಲಿಯ ರೈಲು ನಿಲ್ದಾಣಗಳಲ್ಲಿ ಚಹಾ ಮತ್ತಿತರ ಪಾನೀಯಗಳು ಹಾಗೂ ತಿಂಡಿಗಳ ಸರಬರಾಜನ್ನು ಮಣ್ಣಿನ ಕುಡಿಕೆ, ಲೋಟ ಹಾಗೂ ತಟ್ಟೆಗಳಲ್ಲೇ ಮಾಡಬೇಕೆಂದು ಆದೇಶ ನೀಡುವ ಮೂಲಕ ಆ ಪ್ರಾಂತ್ಯದ ಕುಂಬಾರರಿಗೆ ಹೊಸ ಉದ್ಯೋಗಾವಕಾಶ ಕಲ್ಪಿಸಿದ್ದ ರೈಲ್ವೆ ಮಂಡಳಿ, ಈಗ ಮತ್ತೂಂದು ಮಾದರಿ ಹೆಜ್ಜೆಯನ್ನಿಟ್ಟಿದೆ. 

ಎಲ್ಲಾ ರೈಲ್ವೆ ವಲಯಗಳು, ತಮ್ಮ ರೈಲುಗಳಲ್ಲಿ ಪ್ರಯಾಣಿಕರಿಗೆ ನೀಡುವ ಟವೆಲ್‌, ಬೆಡ್‌ಶೀಟ್‌, ದಿಂಬಿನ ಕವರ್‌ ಹಾಗೂ ಇನ್ನಿತರ ಬಟ್ಟೆ ಆಧಾರಿತ ಸಾಮಗ್ರಿಗಳನ್ನು ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ (ಕೆವಿಐಸಿ) ಅಥವಾ ಕೈಮಗ್ಗದ ಸಹಕಾರ ಸಂಘಗಳ ಒಕ್ಕೂಟ (ಎಸಿಎಎಸ್‌ಎಚ್‌)ಗಳ ಮೂಲಕವೇ ಪಡೆಯಬೇಕೆಂದು ಮಂಡಳಿ ಆದೇಶಿಸಿದೆ. ಇದರಿಂದ, ಪ್ರಾಂತೀಯ ಮಟ್ಟದ ನೇಕಾರರಿಗೆ ಹೊಸ ಉದ್ಯೋಗವಕಾಶ ನೀಡಲು ಮಂಡಳಿ ಮುಂದಾಗಿದೆ. ಈ ಮೂಲಕ, ಮುಂದಿನ ಹಣಕಾಸು ವರ್ಷ ದಲ್ಲಿ ಕೆವಿಐಸಿಗೆ 100 ಕೋಟಿ ರೂ.ಗಳ ಹೊಸ ಆರ್ಡರ್‌ ಸಿಗುವ ಸಾಧ್ಯತೆಯಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.