ಸೆನ್ಸಾರ್‌ ಅಂಗಳದಲ್ಲಿ “ಮಜ್ಜಿಗೆ ಹುಳಿ’ 

Team Udayavani, Jan 30, 2019, 5:56 AM IST

ಇಲ್ಲಿಯವರೆಗೆ “ಮಜ್ಜಿಗೆ ಹುಳಿ’ ರುಚಿಯನ್ನ ಊಟದಲ್ಲಿ ಸವಿದಿದ್ದೀರಿ. ಈಗ ಅದನ್ನು ತೆರೆಮೇಲೆ ನೋಟದಲ್ಲೂ ಸವಿಯಬಹುದು. ಹೌದು, ಎಸ್‌.ಎಲ್‌ ಆರ್ಟ್ಸ್ ಲಾಂಛನದಲ್ಲಿ ಎಸ್‌.ರಾಮಚಂದ್ರ ನಿರ್ಮಿಸಿರುವ “ಮಜ್ಜಿಗೆ ಹುಳಿ’ ಚಿತ್ರದ ಪ್ರಥಮ ಪ್ರತಿ ಸಿದ್ದವಾಗಿದ್ದು, ಚಿತ್ರ ಸದ್ಯ ಪ್ರಾದೇಶಿಕ ಸೆನ್ಸಾರ್‌ ಮಂಡಳಿ ಮುಂದಿದೆ. ಶೀಘ್ರದಲ್ಲಿಯೇ ಸೆನ್ಸಾರ್‌ ವೀಕ್ಷಣೆಗೆ ಬರಲಿರುವ “ಮಜ್ಜಿಗೆ ಹುಳಿ’ ಚಿತ್ರಕ್ಕೆ ಗ್ರೀನ್‌ ಸಿಗ್ನಲ್‌ ಸಿಗುತ್ತಿದ್ದಂತೆ ಚಿತ್ರವನ್ನು ಪ್ರೇಕ್ಷಕರ ಮುಂದೆ ತರುವ ಯೋಜನೆಯಲ್ಲಿದೆ ಚಿತ್ರತಂಡ.

ರವೀಂದ್ರ ಕೊಟಕಿ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು, ಗೀತರಚನೆ ಮಾಡಿ ನಿರ್ದೇಶನವನ್ನು ಮಾಡಿರುವ ಈ ಚಿತ್ರಕ್ಕೆ ಬೆಂಗಳೂರು, ಕಾರವಾರದಲ್ಲಿ ಚಿತ್ರೀಕರಣವಾಗಿದೆ. ಮೂರು ಹಾಡುಗಳಿರುವ ಈ ಚಿತ್ರಕ್ಕೆ ಎಂ.ಸಂಜೀವ್‌ ರಾವ್‌ ಸಂಗೀತ ಸಂಯೋಜಿಸಿದ್ದಾರೆ. ಚಿತ್ರದ ಹಾಡುಗಳಿಗೆ ಹೈಟ್‌ ಮಂಜು, ರಾಜು, ಅರವಿಂದ್‌ ನೃತ್ಯ ನಿರ್ದೇಶನವಿದೆ.

ಸಂಜೀವ್‌ ರೆಡ್ಡಿ ಸಂಕಲನ ಕಾರ್ಯ ನಿರ್ವಹಿಸಿದ್ದಾರೆ. ದೀಕ್ಷಿತ್‌ ನಾಯಕರಾಗಿ ನಟಿಸಿರುವ ಈ ಚಿತ್ರದಲ್ಲಿ ರೂಪಿಕಾ, ಸುಚೀಂದ್ರ ಪ್ರಸಾದ್‌, ರಮೇಶ್‌ ಭಟ್‌,ಮಿಮಿಕ್ರಿ ದಯಾನಂದ್‌, ಮೋಹನ್‌ ಜುನೇಜ, ವಿಶ್ವ, ಕೆಂಪೇಗೌಡ, ಯತಿರಾಜ್‌, ಶಂಕರ್‌ ನಾರಾಯಣ್‌, ಕುರಿ ಸುನೀಲ್‌, ಶಿವ ಮಂಜು ಮುಂತಾದವರು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.