ಎರಡು ಜಿಂಕೆ ಬೇಟೆ; 60 ಗುಂಡು-ವಾಹನ ವಶ

Team Udayavani, Feb 2, 2019, 7:36 AM IST

ಬಸವಕಲ್ಯಾಣ: ಬೇಲೂರು ಹಾಗೂ ಮಿರಖಲ ತಾಂಡಾದ ಮಧ್ಯ ಶುಕ್ರವಾರ ನಸುಕಿನ ವೇಳೆ ಎರಡು ಜಿಂಕೆಗಳನ್ನು ಬೇಟೆ ಆಡಿ ವಾಹನದಲ್ಲಿ ತೆಗೆದುಕೊಂಡು ಹೋಗುತ್ತಿದ್ದಾಗ ವಾಹನವನ್ನು ಹಿಡಿಯುವಲ್ಲಿ ಹುಸಲೂರು ಪೊಲೀಸರು ಯಶಸ್ವಿಯಾಗಿದ್ದಾರೆ. ಹುಲಸೂರು ಪೊಲೀಸ್‌ ಠಾಣೆಯ ಪ್ರೋಫೇಶನರಿ ಡಿವೈಎಸ್ಪಿ ಮಲ್ಲಿಕಾರ್ಜುನ ಸಾಲಿ ಅವರು ರಾತ್ರಿ ಸಮಯದಲ್ಲಿ ಗಸ್ತು ತಿರುಗುವಾಗ, ಪೊಲೀಸರ ವಾಹನ ಕಂಡು ಬೇಟೆಗಾರರು ಟವೇರಾ ವಾಹನ ಹಿಂತಿರುಗಿಸಿ ಹೋಗುವಾಗ ಅನುಮಾದಿಂದ ಪೊಲೀಸರು ಬೆನ್ನು ಹತ್ತಿದ್ದಾರೆ. ಆಗ ವಾಹನದ ಒಳಗೆ ಇದ್ದ ಐದಾರು ಜನ ವಾಹನ ಬಿಟ್ಟು ಪರಾರಿಯಾಗಿದ್ದಾರೆ. ನಂತರ ಕಾರನ್ನು ಪೊಲೀಸ್‌ ಠಾಣೆಗೆ ತಂದು ತನಿಖೆ ಮಾಡಿದಾಗ, ಕಾರಿನಲ್ಲಿ ಒಂದು ಗಂಡು- ಒಂದು ಹೆಣ್ಣು ಜಿಂಕೆಗಳ ಮೃತ ದೇಹ, 60 ಜೀವಂತ ಗುಂಡುಗಳು ಮತ್ತು ಎರಡು ಫೋಕಸ್‌ ಬ್ಯಾಟರಿಗಳು ಪತ್ತೆಯಾಗಿವೆ.

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಟಿ.ಶ್ರೀಧರ, ಹೆಚ್ಚುವರಿ ಪೊಲೀಸ್‌ ವರಿಷ್ಠಾಧಿಕಾರಿ ಶ್ರೀಹರಿಬಾಬು, ಬಸವಕಲ್ಯಾಣ ಸಿಪಿಐ ಮಲ್ಲಿಕಾರ್ಜುನ ಯಾತನೂರ ಪೊಲೀಸ್‌ ಠಾಣೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಈ ಸಂದರ್ಭದಲ್ಲಿ ತಾಪಂ ಇಒ ಮಡೋಳಪ್ಪಾ ಪಿ.ಎಸ್‌., ಪಶು ವೈದ್ಯಕೀಯ ಸಹಾಯಕ ನಿರ್ದೇಶಕ ಆನಂದ ಪಾಟೀಲ ಇದ್ದರು. ಈ ಕುರಿತು ಹುಲಸೂರು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಳ್ಳಲಾಗಿದೆ.