ಆದಷ್ಟು ಬೇಗ ಮಂದಿರ ನಿರ್ಮಾಣ ಆಗಲಿ: ಶಾ

Team Udayavani, Feb 3, 2019, 1:02 AM IST

ಡೆಹ್ರಾಡೂನ್‌: ಎಷ್ಟು ಬೇಗ ಸಾಧ್ಯವೋ ಅಷ್ಟು ಬೇಗ ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣವಾಗಬೇಕು. ಈ ವಿಚಾರದಲ್ಲಿ ಕಾಂಗ್ರೆಸ್‌ ತನ್ನ ನಿಲುವನ್ನು ಸ್ಪಷ್ಟಪಡಿಸಬೇಕು ಎಂದು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಹೇಳಿದ್ದಾರೆ.

ಲೋಕಸಭೆ ಚುನಾವಣೆಗಾಗಿ ಉತ್ತರಾಖಂಡದಲ್ಲಿ ಅಧಿಕೃತವಾಗಿ ಪ್ರಚಾರಕ್ಕೆ ಶನಿವಾರ ಚಾಲನೆ ನೀಡಿದ ಶಾ ಅವರು ಪಕ್ಷದ ಬೂತ್‌ ಮಟ್ಟದ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದ್ದಾರೆ. ಕುಂಭಮೇಳ ನಡೆಯುತ್ತಿರುವ ಕಾರಣ, ರಾಮಮಂದಿರ ನಿರ್ಮಾಣಕ್ಕೆ ಒತ್ತಾಯ ಕೇಳಿಬರುವುದು ಸಹಜ. ಮಂದಿರ ವಿಚಾರದಲ್ಲಿ ಬಿಜೆಪಿಯ ನಿಲುವು ಯಾವತ್ತೂ ಸ್ಪಷ್ಟವಾಗಿಯೇ ಇದೆ. ಅಯೋಧ್ಯೆಯಲ್ಲಿ ಮಂದಿರ ತಲೆಎತ್ತಲೇಬೇಕು ಎಂದು ನಾನು ಘೋಷಿಸುತ್ತೇನೆ. ಈಗ ರಾಹುಲ್‌ ಗಾಂಧಿ ಅವರೂ ತಮ್ಮ ನಿಲುವನ್ನು ಸ್ಪಷ್ಟಪಡಿಸುತ್ತಾರಾ ಎಂದು ಪ್ರಶ್ನಿಸಿದ್ದಾರೆ ಶಾ. ಅಲ್ಲದೆ, ಅಯೋಧ್ಯೆ ವಿವಾದದ ವಿಚಾರಣೆಗೆ ಕಾಂಗ್ರೆಸ್‌ ತನ್ನ ವಕೀಲರ ಮೂಲಕ ಅಡ್ಡಿಪಡಿಸುತ್ತಲೇ ಬಂದಿದೆ. ಪ್ರತಿ ಬಾರಿಯೂ ವಿಚಾರಣೆ ಮುಂದೂಡುವಂತೆ ಕೋರುತ್ತಿರುವುದು ಏಕೆ ಎಂದು ಕಾಂಗ್ರೆಸ್‌ ವಿವರಿಸಬೇಕು ಎಂದೂ ಶಾ ಆಗ್ರಹಿಸಿದ್ದಾರೆ. ಇದೇ ವೇಳೆ, ಪ್ರಧಾನಿ ಮೋದಿ ಅವರನ್ನು ಏಕಾಂಗಿಯಾಗಿ ಎದುರಿಸಲಾಗದ ಕಾರಣ ಪ್ರತಿಪಕ್ಷಗಳು ಮೈತ್ರಿಗೆ ಮುಂದಾಗಿವೆ ಎಂದೂ ಹೇಳಿದ್ದಾರೆ.