“ಮಾಲ್ಗುಡಿ ಡೇಸ್‌’ನಲ್ಲಿ ವಿಜಯ ರಾಘವೇಂದ್ರ

Team Udayavani, Feb 6, 2019, 5:53 AM IST

ಶಂಕರ್‌ನಾಗ್‌ ನಿರ್ದೇಶನದ “ಮಾಲ್ಗುಡಿ ಡೇಸ್‌’ ಧಾರಾವಾಹಿ ಎಂದರೆ ಇಂದಿಗೂ ಅದೆಷ್ಟೋ ಜನರ ಕಿವಿ ನೆಟ್ಟಗಾಗುತ್ತದೆ. ಖ್ಯಾತ ಕಾದಂಬರಿಕಾರ ಆರ್‌.ಕೆ ನಾರಾಯಣ್‌ ಅವರ ಕಥೆಗಳನ್ನು ಅದ್ಭುತವಾಗಿ ತೆರೆಮೇಲೆ ಜೋಡಿಸಿ ಕೊಟ್ಟ “ಮಾಲ್ಗುಡಿ ಡೇಸ್‌’ಗೆ ಫಿದಾ ಆಗದವರೇ ಇಲ್ಲ. ಈಗ ಯಾಕೆ “ಮಾಲ್ಗುಡಿ ಡೇಸ್‌’ ವಿಷಯ ಅಂತೀರಾ? ಅದಕ್ಕೊಂದು ಕಾರಣವಿದೆ.

ಸುಮಾರು ಮೂರೂವರೆ ದಶಕಗಳ ಹಿಂದೆ ಬಂದಿದ್ದ “ಮಾಲ್ಗುಡಿ ಡೇಸ್‌’ ಹೆಸರು ಈಗ ಮತ್ತೆ ತೆರೆಮೇಲೆ ಬರುತ್ತಿದೆ. ಅದೂ ಹಿರಿತೆರೆಮೇಲೆ! ಹೌದು, “ಮಾಲ್ಗುಡಿ ಡೇಸ್‌’ ಹೆಸರಿನಲ್ಲಿ ಚಿತ್ರವೊಂದು ತಯಾರಾಗಲು ಸಿದ್ಧತೆ ನಡೆಸುತ್ತಿದೆ. ವಿಜಯ ರಾಘವೇಂದ್ರ ಈ ಚಿತ್ರದಲ್ಲಿ ನಾಯಕನಾಗಿ ಕಾಣಿಸಿಕೊಳ್ಳುತ್ತಿದ್ದು, ಕಿಶೋರ್‌ ಮೂಡಬಿದ್ರೆ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ.

ಕೆ. ರತ್ನಾಕರ್‌ ಕಾಮತ್‌ ಬಂಡವಾಳ ಹೂಡಿ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಸದ್ದಿಲ್ಲದೆ ಬಹುತೇಕ ಸ್ಕ್ರಿಪ್ಟ್ ಕೆಲಸಗಳನ್ನು ಪೂರ್ಣಗೊಳಿಸಿರುವ ಚಿತ್ರತಂಡ ನಿನ್ನೆ ಚಿತ್ರದ ಟೈಟಲ್‌ನ್ನು ಬಿಡುಗಡೆಗೊಳಿಸಿದೆ. ಇನ್ನು “ಮಾಲ್ಗುಡಿ ಡೇಸ್‌’ ಟೈಟಲ್‌ ಪೋಸ್ಟರ್‌ನ್ನು ಪವರ್‌ಸ್ಟಾರ್‌ ಪುನೀತ್‌ ರಾಜಕುಮಾರ್‌ ಬಿಡುಗಡೆಗೊಳಿಸಿ ಚಿತ್ರತಂಡಕ್ಕೆ ಶುಭಾಶಯ ಕೋರಿದ್ದಾರೆ.

ಸದ್ಯ ತನ್ನ ಟೈಟಲ್‌ ಬಿಡುಗಡೆ ಮಾಡುವ ಮೂಲಕ ಸಿನಿಪ್ರಿಯರಲ್ಲಿ ಕುತೂಹಲ ಮೂಡಿಸಿರುವ “ಮಾಲ್ಗುಡಿ ಡೇಸ್‌’ ಇದೇ ಫೆಬ್ರವರಿ ಅಂತ್ಯದಿಂದ ತನ್ನ ಚಿತ್ರೀಕರಣ ಆರಂಭಿಸಲಿದೆ. ಚಿತ್ರದಲ್ಲಿ ಬಹುತೇಕ  ಮಾಲ್ಗುಡಿಯ ಕಥೆಗಳನ್ನೇ ತೆರೆಯ ಮೇಲೆ ತರಲಾಗುತ್ತಿದ್ದು, ಹಸಿರು ಜನ-ಜೀವನದ ವಿಭಿನ್ನ ಚಿತ್ರಣ ಇರಲಿದೆ ಎನ್ನಲಾಗುತ್ತಿದೆ. ಒಟ್ಟಾರೆ ಕಿರುತೆರೆಯಲ್ಲಿ ಮಾಡಿದಂತೆ “ಮಾಲ್ಗುಡಿ ಡೇಸ್‌’ ಹಿರಿತೆರೆಯಲ್ಲೂ ಕಮಾಲ್‌ ಮಾಡಲಿದೆಯಾ ಅನ್ನೋದಕ್ಕೆ ಚಿತ್ರ ತೆರೆಮೇಲೆ ಬಂದ ಮೇಲಷ್ಟೇ ಉತ್ತರ ಸಿಗಲಿದೆ.