ಸೇನಾ ಹೆಲಿಕಾಪ್ಟರ್‌ ತುರ್ತು ಭೂ ಸ್ಪರ್ಶ

Team Udayavani, Feb 6, 2019, 6:39 AM IST

ರಾಮನಗರ: ಕಗ್ಗಲಿಪುರ ಪೊಲೀಸ್‌ ಠಾಣೆ ವ್ಯಾಪ್ತಿಗೆ ಬರುವ ಬೆಂಗಳೂರು ದಕ್ಷಿಣ ತಾಲೂಕು ತಟ್ಟಗುಪ್ಪೆ ಗ್ರಾಮದ ಜಮೀನೊಂದರಲ್ಲಿ ಸೇನಾ ಹೆಲಿಕಾಪ್ಟರ್‌ ಐಎ-2147ತುರ್ತು ಭೂ ಸ್ಪರ್ಶ ಮಾಡಿದೆ.

ಬೆಂಗಳೂರು ಎಚ್ಎಎಲ್‌ ವಿಮಾನ ನಿಲ್ದಾಣದಿಂದ ತರಬೇತಿ ಪಡೆಯುವ ಸಲುವಾಗಿ ಹಾರಾಟ ನಡೆಸುತ್ತಿದ್ದ ವೇಳೆ ಮಂಗಳವಾರ ಮಧ್ಯಾಹ್ನ 2.30ರ ವೇಳೆಗೆ ತಾಂತ್ರಿಕ ದೋಷ ಕಾರಣ ಹೆಲಿಕಾಪ್ಟರ್‌ನ ಪೈಲೆಟ್‌ಗಳಾದ ಕೇರಳ ಮೂಲದ ರಮೇಶ್‌ ಮತ್ತು ಹಿಮಾಚಲ ಪ್ರದೇಶ ಮೂಲದ ಪೂನ್‌ ತುರ್ತು ಭೂ ಸ್ಪರ್ಶ ಮಾಡಲು ನಿರ್ಧರಿಸಿ ರೈತರೊಬ್ಬರಿಗೆ ಸೇರಿದ ಜಮೀನಿನಲ್ಲಿ ಇಳಿಸಿದ್ದಾರೆ.

ಅದೃಷ್ಠವಶಾತ್‌ ಯಾವ ಅನಾಹುತವೂ ಸಂಭವಿಸಿಲ್ಲ. ಮಾಹಿತಿ ಸಿಕ್ಕ ಕೂಡಲೆ ಸ್ಥಳಕ್ಕೆ ಆಗಮಿಸಿದ ಸಂಬಂಧಿಸಿದ ಸೇನೆಯ ತಂತ್ರಜ್ಞರು ತಾಂತ್ರಿಕ ದೋಷವನ್ನು ಸರಿಪಡಿಸಿ ಸಂಜೆ ವೇಳೆಗೆ ಸ್ಥಳದಿಂದ ಹೆಲಿಕಾಪ್ಟರ್‌ ನಿರ್ಗಮಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.