ಬದುಕು ಕಲಿಸುವ ಭಾಷೆ ತಾಯಿಗಿಂತ ಮಿಗಿಲು: ಸರಸ್ವತಿ

Team Udayavani, Feb 8, 2019, 9:46 AM IST

ವಿಜಯಪುರ: ಭಾಷೆ ಇಲ್ಲದಿದ್ದರೆ ಮಾತು, ವ್ಯವಹಾರ, ಸಾಹಿತ್ಯ, ಸಂಸ್ಕೃತಿ ಯಾವುದೂ ಇಲ್ಲ. ಭಾಷೆಯ ಜೊತೆಗೆ ಬದುಕನ್ನು ಕಲಿಸುವ ತಾಯಿಗಿಂತ ಮಿಗಿಲಾದವರು ಯಾರೂ ಇಲ್ಲ ಎಂದು ಡಾ| ಸರಸ್ವತಿ ಚಿಮ್ಮಲಗಿ ಅಭಿಪ್ರಾಯಪಟ್ಟರು.

ಜಿಲ್ಲಾ ಕದಳಿ ವೇದಿಕೆ ಚಟುವಟಿಕೆಗಳ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಅವರು, ಭಾಷೆಯ ಮೂಲಕ ಬದುಕು ರೂಪಿಸಿಕೊಳ್ಳುವಲ್ಲಿ ವಚನಕಾರ್ತಿಯರು ನಮ್ಮ ಆದರ್ಶವಾಗಿದ್ದಾರೆ. ಹೆಣ್ಣು ತಾಯಿ, ತಂಗಿ, ಹೆಂಡತಿಯಾಗಿ ಬಾಳನ್ನು ಬೆಳಗುವ ನಂದಾದೀಪ. ಅದಕ್ಕಾಗಿ ಶರಣರು ಹೆಣ್ಣು ಸಾಕ್ಷಾತ್‌ ಕಪಿಲಸಿದ್ಧ ಮಲ್ಲಿಕಾರ್ಜುನ ಎಂದು ಹೇಳಿ ಹೆಣ್ಣನ್ನು ದೈವ ಸ್ಥಾನಕ್ಕೇರಿಸಿದ್ದಾರೆ ಎಂದು ವಿಶ್ಲೇಷಿದರು.

ಭಾರತಿ ಪಾಟೀಲ ಮಾತನಾಡಿ, ಕದಳಿ ವೇದಿಕೆಯಂತ ಸಂಘಟನೆಯಿಂದ ಹೆಣ್ಣು ಮಕ್ಕಳಲ್ಲಿ ಆತಸ್ಥೈರ್ಯ ಹೆಚ್ಚಾಗಿದೆ. ಪುರುಷರಿಗೆ ಸಮಾನವಾಗಿ ನಿಲ್ಲಲು ಸಂಘಟನೆಗಳು ಕಾರಣವಾಗಿವೆ ಎಂದರು.

ಪ್ರಭಾವತಿ ದೇಸಾಯಿ ಅವರ ನೀನಾದ ಗಜಲ್‌ ಕೃತಿ ಲೋಕಾರ್ಪಣೆ ಮಾಡಿದ ಜಂಬುನಾಥ ಕಂಚ್ಯಾಣಿ ಅವರು, ಕಾವ್ಯ ಸುಖಾಸುಮ್ಮನೆ ಹುಟ್ಟುವುದಿಲ್ಲ. ಅದು ಕವಿಯ ತಪಸ್ಸಿನ ಫಲದಿಂದ ಅಭಿವ್ಯಕ್ತಗೊಳ್ಳುವ ಅದ್ಭುತ್‌ ಸರ್ವಸೃಷ್ಟಿ ಎಂದು ಬಣ್ಣಿಸಿದರು. ಹೇಮಲತಾ ವಸ್ತ್ರದ ಕೃತಿ ಪರಿಚಯಿಸಿದರು. ದಿ| ಶಿವಗಂಗಮ್ಮ ದತ್ತಿ ಕುರಿತು ಮಲ್ಲಮ್ಮ ಬಿರಾದಾರ ಉಪನ್ಯಾಸ ನೀಡಿ, 12ನೇ ಶತಮಾನದಲ್ಲಿ ಬಸವಾದಿ ಶರಣರ ಸಾಲಿನಲ್ಲಿ ಸಮಾನವಾಗಿ ತಮ್ಮ ವಚನಗಳ ಮೂಲಕ ಅಭಿಪ್ರಾಯ ಮಂಡಿಸುವಲ್ಲಿ ಸಮರ್ಥರಾಗಿದ್ದ ಸಂಕವ್ವೆ, ಸತ್ಯಕ್ಕ, ಬೊಂತಾದೇವಿ, ಲಕ್ಕಮ್ಮ, ಅಕ್ಕಮಹಾದೇವಿ, ನೀಲಾಂಬಿಕೆ, ಮುಕ್ತಾಯಕ್ಕ ಅವರಂಥ ಶಿವಶರಣೆಯರ ಕಾಯಕನಿಷ್ಠೆ, ವ್ರತಾಚರಣೆ ಇಂದಿನ ನಮಗೆ ಆದರ್ಶ ಎಂದರು.

ಸಿದ್ಧಲಿಂಗ ಹದಿಮೂರ, ರಾಜಶೇಖರ ಉಮರಾಣಿ, ಮಹಾಂತ ಗುಲಗಂಜಿ, ಎಸ್‌.ಎಸ್‌. ತುಪ್ಪದ, ಸೋಮನಗೌಡ ಪಾಟೀಲ, ಎಸ್‌.ಡಿ. ಮಾದನಶೆಟ್ಟಿ, ವಿ.ಸಿ. ನಾಗಠಾಣ, ಬಿ.ಎಚ್. ಬಾದರಬಂಡಿ, ಈರಣ್ಣ ತೊಂಡಿಕಟ್ಟಿ, ಶರಣಗೌಡ ಪಾಟೀಲ, ಎ.ಎಸ್‌. ಕೋರಿ, ಜಿ.ಎನ್‌. ತೆಗ್ಗಳ್ಳಿ, ನಿರಂಜನ ದೇಸಾಯಿ, ಸುಭಾಸ ಯಾದವಾಡ, ಎಂ.ಎಂ. ಅಂಗಡಿ ಇದ್ದರು.

ಮ.ಗು.ಯಾದವಾಡ, ದತ್ತಿದಾನಿ ಪ್ರೊ| ಜಯಶ್ರೀ ಸಜ್ಜನ ಇದ್ದರು. ದಾಕ್ಷಾಯಣಿ ಬಿರಾದಾರ ಮಾತನಾಡಿದರು. ಗಂಗಾಬಾಯಿ ಗಲಗಲಿ ಸ್ವಾಗತಿಸಿದರು. ಕಾಶೀಬಾಯಿ ಬಿರಾದಾರ ವಂದಿಸಿದರು. ಸುನಂದಾ ಕೋರಿ, ಕೆ.ಸುನಂದಾ ನಿರೂಪಿಸಿದರು.