ದಿಂಬಂ ಘಾಟಿಯಲ್ಲಿ ರಾತ್ರಿ ವೇಳೆ ಸರಕು ವಾಹನ ನಿಷೇಧ

Team Udayavani, Feb 10, 2019, 1:29 AM IST

ಚಾಮರಾಜನಗರ: ರಾಜ್ಯದಿಂದ ತಮಿಳುನಾಡು ಪ್ರವೇಶಿಸುವ ಬಣ್ಣಾರಿ ದಿಂಬಂ ಘಟ್ಟ ಪ್ರದೇಶದಲ್ಲಿ ವನ್ಯಜೀವಿಗಳ ಸಂರಕ್ಷಣಾ ಹಿತದೃಷ್ಟಿಯಿಂದ ವಾಣಿಜ್ಯ, ಸರಕು ಸಾಗಣೆ ವಾಹನಗಳ ಸಂಚಾರವನ್ನು ಸಂಜೆ 6 ರಿಂದ ಬೆಳಗ್ಗೆ 6 ಗಂಟೆಯವರೆಗೆ ನಿಷೇಧಿಸಲಾಗಿದೆ. ಅಲ್ಲದೆ, 12 ಚಕ್ರಗಳಿಗಿಂತ ಮೇಲ್ಪಟ್ಟ ಭಾರೀ ವಾಹನಗಳ ಸಂಚಾರವನ್ನು ಸಂಪೂರ್ಣ ನಿಷೇಧಿಸಲಾಗಿದೆ.

ತಮಿಳುನಾಡು ರಾಜ್ಯ ಈರೋಡ್‌ ಜಿಲ್ಲಾಧಿಕಾರಿಯವರು ರಸ್ತೆ ಸುರಕ್ಷತಾ ಸಮಿತಿಯ ತೀರ್ಮಾನದಂತೆ ಈ ಮಾರ್ಗದಲ್ಲಿ ವಾಹನ ಸಂಚಾರ ಸಂಬಂಧ ಹಲವು ಕ್ರಮಗಳನ್ನು ಕೈಗೊಂಡಿದ್ದಾರೆ. ಇದೇ ವೇಳೆ, ಸತ್ಯಮಂಗಲ ಹುಲಿ ಸಂರಕ್ಷಿತ ಅರಣ್ಯ ಚೆಕ್‌ಪೋಸ್ಟ್‌ನಲ್ಲಿ ವಾಹನಗಳ ಪ್ರವೇಶ ಶುಲ್ಕ ನಿಗದಿಪಡಿಸಲಾಗಿದೆ.

ಪ್ರಯಾಣಿಕರ 4 ಚಕ್ರದ ವಾಹನಗಳಿಗೆ 20 ರೂ.ಹಾಗೂ ವ್ಯಾನ್‌ಗಳಿಗೆ 30 ರೂ.ನಂತೆ ಶುಲ್ಕ ನಿಗದಿಗೊಳಿಸಲಾಗಿದೆ. ಲಘು ಮತ್ತು ಭಾರೀ ವಾಣಿಜ್ಯದ 4 ಚಕ್ರದ ವಾಹನ ಹಾಗೂ ಚಿಕ್ಕ ಲಾರಿ 407 ಇತ್ಯಾದಿಗಳಿಗೆ 20 ರೂ., 6 ಚಕ್ರಗಳ ವಾಹನಕ್ಕೆ 50 ರೂ., 8 ಚಕ್ರದ ವಾಹನಗಳಿಗೆ 60 ರೂ., 10 ಚಕ್ರಗಳ ವಾಹನಗಳಿಗೆ 80 ರೂ. ಹಾಗೂ 12 ಚಕ್ರದ ವಾಹನಗಳಿಗೆ 100 ರೂ.ಗಳ ಶುಲ್ಕ ನಿಗದಿಪಡಿಸಲಾಗಿದೆ. ಸರ್ಕಾರಿ, ಸಾರ್ವಜನಿಕ ಹಾಗೂ ತುರ್ತು ವಾಹನ (ಆ್ಯಂಬುಲೆನ್ಸ್‌)ಗಳಿಗೆ ಪ್ರವೇಶ ಶುಲ್ಕದಲ್ಲಿ ರಿಯಾಯಿತಿ ನೀಡಲಾಗಿದೆ.