ಮತ್ತೆ ಶತಕ: ಮಿಂಚಿದ ಮಾರ್ಟಿನ್‌ ಗಪ್ಟಿಲ್‌

Team Udayavani, Feb 17, 2019, 12:30 AM IST

ಕ್ರೈಸ್ಟ್‌ಚರ್ಚ್‌: ಆರಂಭಿಕಕಾರ ಮಾರ್ಟಿನ್‌ ಗಪ್ಟಿಲ್‌ ಅವರ ಸತತ 2ನೇ ಶತಕದ ನೆರವಿನಿಂದ ನ್ಯೂಜಿಲ್ಯಾಂಡ್‌ ತಂಡ ಬಾಂಗ್ಲಾದೇಶದ ವಿರುದ್ಧ ನಡೆದ 2ನೇ ಏಕದಿನ ಪಂದ್ಯದಲ್ಲಿ 8 ವಿಕೆಟ್‌ಗಳ ಜಯ ಸಾಧಿಸಿದೆ. ಮೊದಲ ಪಂದ್ಯದಲ್ಲಿ 117 ರನ್‌ ಬಾರಿಸಿ ಕಿವೀಸ್‌ಗೆ ಜಯ ದೊರಕಿಸಿಕೊಟ್ಟಿದ್ದ ಗಪ್ಟಿಲ್‌ ಈ ಪಂದ್ಯದಲ್ಲಿ 118 ರನ್‌ ಗಳಿಸಿ ಮತ್ತೂಮ್ಮೆ ನ್ಯೂಜಿಲ್ಯಾಂಡ್‌ ತಂಡದ ಗೆಲುವಿನ ರೂವಾರಿಯಾಗಿ ಕಾಣಿಸಿಕೊಂಡರು. ಈ ಗೆಲುವಿನೊಂದಿಗೆ ಕಿವೀಸ್‌ 3 ಪಂದ್ಯಗಳ ಸರಣಿಯಲ್ಲಿ 2-0 ಮುನ್ನಡೆ ಸಾಧಿಸಿ ಸರಣಿ ತನ್ನದಾಗಿಸಿಕೊಂಡಿದೆ.

ಟಾಸ್‌ ಸೋತು ಬ್ಯಾಟಿಂಗ್‌ಗಿಳಿದ ಬಾಂಗ್ಲಾದೇಶ 49.4 ಓವರ್‌ಗಳಲ್ಲಿ 226 ರನ್ನಿಗೆ ಆಲೌಟಾದರೆ, ನ್ಯೂಜಿಲ್ಯಾಂಡ್‌ 36.1 ಓವರ್‌ಗಳಲ್ಲಿ ಕೇವಲ 2 ವಿಕೆಟ್‌ ನಷ್ಟಕ್ಕೆ 229 ರನ್‌ ಗಳಿಸಿ ಜಯಭೇರಿ ಬಾರಿಸಿದೆ. ನಾಯಕ ಕೇನ್‌ ವಿಲಿಯಮ್ಸನ್‌ 65 ರನ್‌, ರಾಸ್‌ ಟಯ್ಲರ್‌ 21 ರನ್‌ ಗಳಿಸಿ ಅಜೇಯರಾಗಿ ಉಳಿದಿರ‌ು.

ಕಿವೀಸ್‌ ಬ್ಯಾಟಿಂಗ್‌ ಪರಾಕ್ರಮ
ಗೆಲ್ಲಲು 227 ರನ್‌ ಗುರಿ ಬೆನ್ನಟ್ಟಿದ ನ್ಯೂಜಿಲ್ಯಾಂಡ್‌ ಮೊದಲ 3 ಓವರ್‌ಗಳಲ್ಲೇ 23 ರನ್‌ ಕಲೆ ಹಾಕಿತ್ತು. 14 ರನ್‌ ಗಳಿಸಿದ್ದ ಹೆನ್ರಿ ನಿಕೋಲ್ಸ್‌ ವಿಕೆಟ್‌ ಕಿತ್ತ ಮುಸ್ತಾಫಿಜುರ್‌ ರೆಹಮಾನ್‌ ಆರಂಭಿಕ ಜೋಡಿಯನ್ನು ಬೇರ್ಪಡಿಸುವಲ್ಲಿ ಯಶಸ್ವಿಯಾದರು. ಆ ಬಳಿಕ ಜತೆಯಾದ ಗಪ್ಟಿಲ್‌, ನಾಯಕ ವಿಲಿಯಮ್ಸನ್‌ ಜೋಡಿ ಬಾಂಗ್ಲಾ ಬೌಲರ್‌ಗಳ ಬೆವರಿಳಿಸುವಲ್ಲಿ ಯಶಸ್ವಿಯಾಯಿತು. ಅವರಿಬ್ಬರು 2ನೇ ವಿಕೆಟಿಗೆ 143 ರನ್‌ ಜತೆಯಾಟವಾಡಿದರು. ಗಪ್ಟಿಲ್‌ 88 ಎಸೆತಗಳಲ್ಲಿ 118 ರನ್‌ ಬಾರಿಸಿದರು. ಇದರಲ್ಲಿ 14 ಬೌಂಡರಿ, 4 ಸಿಕ್ಸರ್‌ಗಳು ಸೇರಿವೆ. ಇದು ಅವರ 16ನೇ ಶತಕವಾಗಿದ್ದು, ಈ ಋತುವಿನ 3ನೇ ಶತಕವಾಗಿದೆ. ಜನವರಿಯಲ್ಲಿ ಶ್ರೀಲಂಕಾ ವಿರುದ್ಧದ ಮೊದಲ ಪಂದ್ಯದಲ್ಲಿ ಗಪ್ಟಿಲ್‌ 138 ರನ್‌ ಬಾರಿಸಿದ್ದರು. ಗಪ್ಟಿಲ್‌ ಔಟಾದ ವೇಳೆ ಕಿವೀಸ್‌ 2 ವಿಕೆಟಿಗೆ 188 ರನ್‌ ಗಳಿಸಿ ಗೆಲುವಿನ ಸನಿಹದಲ್ಲಿತು. ಅನಂತರ ಕೇನ್‌ ವಿಲಿಯಮ್ಸನ್‌ ನಾಯಕನ ಆಟವಾಡಿ ಅಜೇಯ 65 ರನ್‌ ಬಾರಿಸಿ ತಂಡಕ್ಕೆ ಸುಲಭ ಗೆಲುವು ತಂದುಕೊಟ್ಟರು. ಇದು ಅವರ 37ನೇ ಏಕದಿನ ಅರ್ಧಶತಕವಾಗಿದೆ. ಸತತ ಎರಡು ಶತಕ ಬಾರಿಸಿದ ಗಪ್ಟಿಲ್‌ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಕಿವೀಸ್‌ ಬೌಲರ್‌ಗಳ ನಿಖರ ದಾಳಿ ಯಿಂದಾಗಿ ಬಾಂಗ್ಲಾ ಆಟಗಾರರು ರನ್‌ ಗಳಿಸಲು ಒದ್ದಾಡಿದರು. ಮಾತ್ರ ವಲ್ಲದೇ ಆಗಾಗ್ಗೆ ವಿಕೆಟ್‌ ಕಳೆದು ಕೊಳ್ಳುತ್ತ ಒತ್ತಡಕ್ಕೆ ಸಿಲುಕು
ವಂತಾಯಿತು. ಆರಂಭಿಕರು ಬೇಗನೇ ಔಟಾದ ಕಾರಣ ಬಾಂಗ್ಲಾ ನಿಧಾನಗತಿಯ ಆರಂಭ ಪಡೆಯಿತು. ಇದರಿಂದಾಗಿ ಮೊದಲ 21 ಓವರ್‌ಗಳಲ್ಲಿ ತಂಡ 5 ವಿಕೆಟಿಗೆ 93 ರನ್‌ ಗಳಿಸಲಷ್ಟೇ ಶಕ್ತವಾಗಿತ್ತು.

ಆಬಳಿಕ ಬಾಂಗ್ಲಾಕ್ಕೆ ಆಸರೆ ಯಾದವರು ಮೊಹ ಮ್ಮದ್‌ ಮಿಥುನ್‌ ಹಾಗೂ ಸಬೀರ್‌ ರೆಹಮನ್‌. ಮಿಥುನ್‌ ಬಾಂಗ್ಲ ಪರ ಅತ್ಯಧಿಕ ರನ್‌ ಗಳಿಸಿದ ಆಟಗಾರ ಎನಿಸಿಕೊಂಡರು. ಅವರು 69 ಎಸೆತಗಳಲ್ಲಿ 57 ರನ್‌ ಬಾರಿಸಿದರು. 6ನೇ ವಿಕೆಟಿಗೆ ಸಬೀರ್‌ ರೆಹಮನ್‌ ಅವರೊಂದಿಗೆ 75 ರನ್‌ ಜತೆಯಾಟವಾಡಿ ಬಾಂಗ್ಲಾದೇಶದ ಮೊತ್ತ 200 ಗಡಿ ದಾಟಿಸುವಲ್ಲಿ ಯಶಸ್ವಿಯಾದರು. ಆದರೆ ಕೊನೆಯ 5 ವಿಕೆಟ್‌ಗಳನ್ನು ಬಾಂಗ್ಲಾ 58 ರನ್‌ಗಳ ಅಂತರದಲ್ಲಿ ಕಳೆದುಕೊಂಡು ನಿರಾಸೆ ಮೂಡಿಸಿತು. ಲಾಕಿ ಫ‌ರ್ಗ್ಯುಸನ್‌ 3 ವಿಕೆಟ್‌ ಕಿತ್ತ‌ರು.

ಸಂಕ್ಷಿಪ್ತ ಸ್ಕೋರ್‌: ಬಾಂಗ್ಲಾದೇಶ- 49.4 ಓವರ್‌ಗಳಲ್ಲಿ 226 (ಮಿಥುನ್‌ 57, ಸಬೀರ್‌ ರೆಹಮನ್‌ 43, ಫ‌ರ್ಗ್ಯುಸನ್‌ 43ಕ್ಕೆ 3, ಜೇಮ್ಸ್‌ ನಿಶಾಮ್‌ 21ಕ್ಕೆ 2, ಟಾಡ್‌ ಆಸ್ಟಲ್‌ 52ಕ್ಕೆ 2), ನ್ಯೂಜಿ ಲ್ಯಾಂಡ್‌- 36.1 ಓವರ್‌ಗಳಲ್ಲಿ 2 ವಿಕೆಟಿಗೆ 229 (ಗಪ್ಟಿಲ್‌ 118, ವಿಲಿಯಮ್ಸನ್‌ ಔಟಾಗದೆ 65, ಟಯ್ಲರ್‌ 21).
ಪಂದ್ಯಶ್ರೇಷ್ಠ: ಮಾರ್ಟಿನ್‌ ಗಪ್ಟಿಲ್‌.