ಹಂಪಿ ಕಲ್ಲುಕಂಬ ಮರು ಜೋಡಣೆ

Team Udayavani, Feb 18, 2019, 12:30 AM IST

ಹೊಸಪೇಟೆ: ಐತಿಹಾಸಿಕ ಹಂಪಿಯಲ್ಲಿ ಕಿಡಿಗೇಡಿಗಳು ಧ್ವಂಸಗೊಳಿಸಿದ್ದ ವಿಷ್ಣು ದೇವಾಲಯ ಮಂಟಪದ ಕಲ್ಲುಕಂಬಗಳನ್ನು ಭಾನುವಾರ ಮರು ಜೋಡಿಸಲಾಗಿದೆ.

ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯಿಂದ ಕಾಮಗಾರಿ ಕೈಗೊಂಡು ಧ್ವಂಸಗೊಂಡಿದ್ದ ಮಂಟಪದ ಕಲ್ಲುಗಳನ್ನು ಮರುಜೋಡಿಸಲಾಗಿದೆ. ಇಲಾಖೆ ಅಧಿಕಾರಿಗಳ ಸೂಚನೆಯಂತೆ ಕಾರ್ಮಿಕರು ಈ ಮೊದಲು ಇದ್ದಂತೆ ಕಂಬಗಳನ್ನು ನಿಲ್ಲಿಸಿದ್ದಾರೆ.

ಹಂಪಿ ವೀಕ್ಷಣೆಗೆ ಆಗಮಿಸಿದ್ದ ಕೆಲ ಕಿಡಿಗೇಡಿಗಳು ಈ ಮಂಟಪದ ಕಂಬಗಳನ್ನು ಧ್ವಂಸಗೊಳಿಸಿದ್ದರು.ಕಂಬಗಳನ್ನು ಉರುಳಿಸುವ ದೃಶ್ಯವನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸಿದ್ದರು. ಸಾಮಾಜಿಕ ಜಾಲತಾಣದಲ್ಲಿ ಈ ವಿಡಿಯೋ ವೈರಲ್‌ ಆಗಿತ್ತು. ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದ ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ, ವಿಷ್ಣು ದೇವಾಯಲದ ಬಳಿ ಇಬ್ಬರು ಕಾವಲುಗಾರರನ್ನು ನಿಯೋಜಿಸಿತ್ತು.ಅಲ್ಲದೆ ಈ ಬಗ್ಗೆ ದೂರು ದಾಖಲಾದ ಹಿನ್ನೆಲೆಯಲ್ಲಿ ಪೊಲೀಸರು ತನಿಖೆ ನಡೆಸಿ ನಾಲ್ವರು ಯುವಕರನ್ನು ಬಂಧಿಸಿದ್ದರು. ಘಟನೆ ನಂತರ ಮಂಟಪದ ಅಂದ ಹಾಳಾಗಿತ್ತು. ಹೀಗಾಗಿ ಮೊದಲಿದ್ದಂತೆ ಕಂಬಗಳನ್ನು ಮರು ಜೋಡಿಸಲು ಪುರಾತತ್ವ ಇಲಾಖೆ ಅಧಿಕಾರಿಗಳು ನಿರ್ಧರಿಸಿದ್ದರು. ಭಾನುವಾರ ನುರಿತ ಕೆಲಸಗಾರರು ಕಂಬಗಳನ್ನು ಮರುಜೋಡಿಸಿದ್ದು ಮಂಟಪ ಮೊದಲ ರೂಪ ಪಡೆದಿದೆ.