ಲೇಡಿಗೋಶನ್‌ ಆಸ್ಪತ್ರೆ ಫೆ. 26: ಹೊಸ ಕಟ್ಟಡ ಲೋಕಾರ್ಪಣೆ

Team Udayavani, Feb 20, 2019, 1:00 AM IST

ಮಂಗಳೂರು: ಲೇಡಿಗೋಶನ್‌ ಆಸ್ಪತ್ರೆಯ ಹೊಸ ಕಟ್ಟಡ ಫೆ. 26ರಂದು ಲೋಕಾರ್ಪಣೆಗೊಳ್ಳಲಿದೆ. ಆದರೆ ಆಸ್ಪತ್ರೆಗೆ ಅಗ್ನಿಶಾಮಕ ಇಲಾಖೆಯಿಂದ ಕ್ಲಿಯರೆನ್ಸ್‌ ಪ್ರಮಾಣಪತ್ರ ಬಾರದೇ ಉದ್ಘಾಟನೆಗೆ ಮುಂದಾಗುತ್ತಿರುವುದು ಗೊಂದಲಕ್ಕೆ ಕಾರಣವಾಗಿದೆ.

ಕಟ್ಟಡ ಲೋಕಾರ್ಪಣೆ ವಿಳಂಬವಾಗುತ್ತಿರುವ ಕುರಿತು ಇತ್ತೀಚೆಗೆ ಉದಯವಾಣಿ ಪ್ರತಿನಿಧಿ ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕಿ ಡಾ| ಸವಿತಾ ಅವರಲ್ಲಿ ವಿಚಾರಿಸಿದಾಗ, “ಅಗ್ನಿಶಾಮಕ ಕ್ಲಿಯರೆನ್ಸ್‌ ಪ್ರಮಾಣಪತ್ರಕ್ಕಾಗಿ ಬೆಂಗಳೂರು ಕಚೇರಿಗೆ ಪತ್ರ ಬರೆಯಲಾಗಿದ್ದು, ಪ್ರಮಾಣಪತ್ರ ದೊರಕಿದ ತತ್‌ಕ್ಷಣ ಉದ್ಘಾಟನೆಯಾಗಬಹುದು’ ಎಂದಿದ್ದರು. ಆದರೆ ಕ್ಲಿಯರೆನ್ಸ್‌ ಪತ್ರ ತಲುಪಿಲ್ಲವಾದರೂ ಫೆ. 26ರಂದು ಆಸ್ಪತ್ರೆ ಉದ್ಘಾಟನೆಗೊಳ್ಳುತ್ತಿದೆ.

ಅಗ್ನಿ ಅವಘಡಗಳಾಗದಂತೆ ಮತ್ತು ಅಗ್ನಿಶಾಮಕ ಸಂಬಂಧಿತ ವ್ಯವಸ್ಥೆಗಳು ಸುಸ್ಥಿತಿಯಲ್ಲಿವೆ ಎಂದು ಅಗ್ನಿಶಾಮಕ ಕಚೇರಿಯವರು ಪ್ರಮಾಣಪತ್ರ ನೀಡಬೇಕು. ಕೆಲವು ತಿಂಗಳುಗಳ ಹಿಂದಷ್ಟೇ ಇದೇ ಕಟ್ಟಡದ ಎನ್‌ಐಸಿಯು ಘಟಕದಲ್ಲಿ ಅಗ್ನಿ ಅವಘಡ ಸಂಭವಿಸಿದ್ದರೂ ದುರಂತ ತಪ್ಪಿತ್ತು. ಈ ಹಿನ್ನೆಲೆಯಲ್ಲಿ ಪ್ರಮಾಣಪತ್ರ ಬಾರದೆ
ಉದ್ಘಾಟನೆ ಮಾಡುವುದು ಸರಿಯಲ್ಲ ಎಂಬ ನಿಟ್ಟಿನಲ್ಲಿ ಉದ್ಘಾಟನೆ ಮುಂದೂಡಿಕೆಯಾಗಿತ್ತು. ಕ್ಲಿಯರೆನ್ಸ್‌ ಪ್ರಮಾಣಪತ್ರದ ಕುರಿತು ಐದಾರು ದಿನಗಳ ಹಿಂದಷ್ಟೇ ಬೆಂಗಳೂರು ಅಗ್ನಿಶಾಮಕ ಕಚೇರಿಯ ಅಧಿಕಾರಿ ಶಿವಕುಮಾರ್‌ ಅವರಲ್ಲಿ ಕೇಳಿದಾಗ ಪ್ರಮಾಣಪತ್ರ ನೀಡಲು 1 ತಿಂಗಳು ಬೇಕಾಗಬಹುದು ಎಂದಿದ್ದರು. ಇದೀಗ ಪ್ರಮಾಣಪತ್ರ ದೊರಕದಿದ್ದರೂ ಕಟ್ಟಡ ಲೋಕಾರ್ಪಣೆಗೊಳ್ಳುತ್ತಿದೆ.

ಕ್ಲಿಯರೆನ್ಸ್‌ ಪ್ರಮಾಣ ಪತ್ರ ಸಿಗದೆ ಉದ್ಘಾಟನೆ ಮಾಡುತ್ತಿರುವ ಬಗ್ಗೆ ಸಚಿವ ಯು. ಟಿ. ಖಾದರ್‌ ಅವರಿಂದ ಪ್ರತಿಕ್ರಿಯೆ ಲಭ್ಯವಾಗಿಲ್ಲ.