ವಿನೋದ್‌ ರಗಡ್‌ ಲುಕ್‌ಗೆ ಮೆಲೋಡಿ ಲಕ್‌

Team Udayavani, Feb 24, 2019, 10:11 AM IST

ವಿನೋದ್‌ ಪ್ರಭಾಕರ್‌ ಅಭಿನಯದ “ರಗಡ್‌’ ಚಿತ್ರದ “ನಿನ್ನನ್ನೇ ಪ್ರೀತಿಸುವೆ ನೂರಾರು ಜನ್ಮಕು, ನಿನಗಾಗಿಯೇ ಹುಟ್ಟುವೆನು ಪ್ರತಿಯೊಂದು ಜನ್ಮಕು’ ಹಾಡು ತಿಂಗಳ ಹಿಂದೆ ಬಿಡುಗಡೆಯಾಗಿತ್ತು. ಅದಕ್ಕೆ ಸಾಕಷ್ಟು ಮೆಚ್ಚುಗೆಯೂ ಸಿಕ್ಕಿತ್ತು. ಇತ್ತೀಚೆಗೆ ದರ್ಶನ್‌ ಅವರ ಹುಟ್ಟುಹಬ್ಬದ ದಿನದಂದು
“ರಗಡ್‌’ ಚಿತ್ರತಂಡ ಮತ್ತೂಂದು ಹಾಡು “ಅವನದೆ ಯೋಚನೆ, ಶುರುವಾಗಿದೆ ಸುಮ್ಮನೆ’ ಎಂಬ ಹಾಡನ್ನು ಬಿಡುಗಡೆ ಮಾಡಿದೆ. ಬಿಡುಗಡೆಗೊಂಡ ಎರಡನೇ ದಿನಕ್ಕೆ ಲಕ್ಷಾಂತರ ವೀವ್ಸ್‌ ಆಗಿದೆ. ಅಷ್ಟೇ ಅಲ್ಲ, ಸಾಕಷ್ಟು ಮೆಚ್ಚುಗೆಯ ಸಂದೇಶಗಳೂ ಯುಟ್ಯೂಬ್‌ನಲ್ಲಿ ಹರಿದಾಡುತ್ತಿವೆ. ಇದು ಸಹಜವಾಗಿಯೇ ಚಿತ್ರತಂಡಕ್ಕೆ ಖುಷಿಕೊಟ್ಟಿದೆ.

ಅಭಿಮನ್‌ ರಾಯ್‌ ಸಂಗೀತ ನಿರ್ದೇಶನ ಈ ಚಿತ್ರಕ್ಕಿದೆ. ಹಾಡುಗಳು ಹಿಟ್‌ ಆಗಿರುವ ಕುರಿತು ಹೇಳುವ ನಿರ್ದೇಶಕ ಶ್ರೀಮಹೇಶ್‌ಗೌಡ, “ಸಂಗೀತ ನಿರ್ದೇಶಕ ಅಭಿಮನ್‌ರಾಯ್‌ ಅವರಿಗೆ ಒಳ್ಳೆಯ ರಾಗ ಸಂಯೋಜನೆ ಬೇಕು ಅಂತ ಹಠ ಹಿಡಿದು, ಹೊಸ ಬಗೆಯ ಮೆಲೋಡಿ ಹಾಡುಗಳನ್ನು ಪಡೆದಿದ್ದೇವೆ. ವಿನೋದ್‌ ಪ್ರಭಾಕರ್‌ ಸಿನಿಮಾದಲ್ಲಿ ಮೊದಲ ಹಿಟ್‌ ಆಲ್ಬಂ ಇದಾಗಲಿದೆ ಎಂಬ ವಿಶ್ವಾಸ ನನ್ನದು. ಈಗಾಗಲೇ ಹಾಡುಗಳಿಗೆ ಎಲ್ಲೆಡೆಯಿಂದ ಮೆಚ್ಚುಗೆ ಸಿಕ್ಕಿದೆ.

ಎರಡು ಹಾಡಿಗೂ ನಾನೇ ಸಾಹಿತ್ಯ ಬರೆದಿದ್ದೇನೆ. “ಅವನದೆ ಯೋಚನೆ’ ಹಾಡಿಗೆ “ಬಾಹುಬಲಿ 2′ ಚಿತ್ರದಲ್ಲಿ ಹಾಡಿರುವ ಗಾಯಕಿ ಸೋನಿ ಕಮಂಡೋರಿ ಧ್ವನಿಯಾಗಿದ್ದಾರೆ. ಇದೊಂದು ಕಾಮಿಡಿ, ಲವ್‌, ಆ್ಯಕ್ಷನ್‌ ಪ್ಯಾಕೇಜ್‌ ಇರುವ ಚಿತ್ರ. ಸದ್ಯಕ್ಕೆ ಗಂಡುಮಕ್ಕಳಿ ಗೊಂದು, ಹೆಣ್ಣುಮಕ್ಕಳಿಗೊಂದು ಎಂಬಂತೆ ಈ ಎರಡು ಹಾಡನ್ನು ಬಿಡುಗಡೆ ಮಾಡಿದ್ದೇವೆ. ಮುಂದಿನ ದಿನಗಳಲ್ಲಿ ಭಗ್ನಪ್ರೇಮಿಗಳಿಗೊಂದು ಹಾಡು ಬಿಡುಗಡೆಯಾಗುತ್ತಿದೆ’.