ಶೇ.12.62ರಷ್ಟು ಅಭ್ಯರ್ಥಿಗಳು ಶಿಕ್ಷಕರ ಅರ್ಹತಾ ಪರೀಕ್ಷೇಲಿ ಪಾಸ್‌

Team Udayavani, Mar 10, 2019, 12:25 AM IST

ಬೆಂಗಳೂರು: ಸಾರ್ವಜನಿಕ ಶಿಕ್ಷಣ ಇಲಾಖೆಯ ಕೇಂದ್ರೀಕೃತ ದಾಖಲಾತಿ ಘಟಕ ನಡೆಸಿದ ಶಿಕ್ಷಕರ ಅರ್ಹತಾ ಪರೀಕ್ಷೆಯಲ್ಲಿ(ಟಿಇಟಿ) ಶೇ.12.62ರಷ್ಟು ಅಭ್ಯರ್ಥಿಗಳು ತೇರ್ಗಡೆ ಹೊಂದಿದ್ದಾರೆ.

ಸರ್ಕಾರಿ ಶಾಲೆಗಳಲ್ಲಿ ಖಾಲಿ ಇರುವ ಶಿಕ್ಷಕರ ಹುದ್ದೆಗೆಅರ್ಜಿ ಸಲ್ಲಿಸುವ ಅಭ್ಯರ್ಥಿ ಗಳು ಕಡ್ಡಾಯವಾಗಿ ಟಿಇಟಿ ತೇರ್ಗಡೆ ಹೊಂದಿರಬೇಕು. ಪೇಪರ್‌-1ರಲ್ಲಿ ತೇರ್ಗಡೆ ಹೊಂದಿದವರು ಒಂದರಿಂದ ಐದನೇ ತರಗತಿ ಹಾಗೂ ಪೇಪರ್‌-2ರಲ್ಲಿ ತೇರ್ಗಡೆ ಹೊಂದಿದವರು 6ರಿಂದ 8ನೇ ತರಗತಿ ಶಿಕ್ಷಕರಾಗಿ ಸೇವೆ ಸಲ್ಲಿಸಲು ಅರ್ಹತೆ ಪಡೆದಿರುತ್ತಾರೆ.ಪತ್ರಿಕೆ-1ರಲ್ಲಿ 87,166, ಪತ್ರಿಕೆ-2ರಲ್ಲಿ 1,72,907 ಅಭ್ಯರ್ಥಿಗಳು ಪರೀಕ್ಷೆಗೆ ನೋಂದಣಿ ಮಾಡಿಕೊಂಡಿದ್ದರು. ಫೆ.3ರಂದು ನಡೆದ ಟಿಇಟಿ ಪರೀಕ್ಷೆಯಲ್ಲಿ ಪತ್ರಿಕೆ-1ರಲ್ಲಿ 79,280 ಹಾಗೂ ಪತ್ರಿಕೆ-2ರಲ್ಲಿ 1,60,583 ಅಭ್ಯರ್ಥಿಗಳು ಹಾಜರಾಗಿದ್ದರು. ಒಟ್ಟಾರೇ ಪರೀಕ್ಷೆ ಬರೆದಿರುವ 2,39,863 ಅಭ್ಯರ್ಥಿಗಳಲ್ಲಿ 30,274 ಅಭ್ಯರ್ಥಿಗಳು ಅರ್ಹತೆ ಪಡೆದಿದ್ದಾರೆ.

ಪೇಪರ್‌-1ರಲ್ಲಿ ಶೇ.60ರಷ್ಟು ಅಂಕದೊಂದಿಗೆ 1593, ಶೇ.55ರಷ್ಟು ಅಂಕದೊಂದಿಗೆ 1560 ಅಭ್ಯರ್ಥಿಗಳು ಮತ್ತು ಪತ್ರಿಕೆ-2ರಲ್ಲಿ ಶೇ.60ರಷ್ಟು ಅಂಕದೊಂದಿಗೆ 17054, ಶೇ.50ರಷ್ಟು ಅಂಕದೊಂದಿಗೆ 10067 ಅಭ್ಯರ್ಥಿಗಳು ತೇರ್ಗಡೆಹೊಂದಿದ್ದಾರೆ.

ಪತ್ರಿಕೆ-1ರಲ್ಲಿ ಶೇ.3.98 ಹಾಗೂ ಪೇಪರ್‌-2ರಲ್ಲಿ 16.89ರಷ್ಟು ಫ‌ಲಿತಾಂಶ ಬಂದಿದೆ.ಪರೀಕ್ಷೆಯ ಕೀ ಉತ್ತರವನ್ನು ಫೆ.18ರಂದು ಬಿಡಲಾಗಿತ್ತು. 17472 ಆಕ್ಷೇಪಣೆಗಳು ಬಂದಿದ್ದವು. ಆಕ್ಷೇಪಣೆಗಳನ್ನು ತಜ್ಞರಿಂದ ಪರಿಶೀಲಿಸಿ ಮಾ.8ರಂದು ಅಂತಿಮ ಕೀ ಉತ್ತರ ಪ್ರಕಟಿಸಲಾಗಿತ್ತು. ಈ ಬಾರಿ ಟಿಇಟಿಯಲ್ಲಿ ಪತ್ರಿಕೆ-1ರಲ್ಲಿ ಕಡಿಮೆ ಅಭ್ಯರ್ಥಿಗಳು ಹಾಗೂ ಪತ್ರಿಕೆ-2ರಲ್ಲಿ ಹೆಚ್ಚು ಅಭ್ಯರ್ಥಿಗಳು ತೇರ್ಗಡೆ ಹೊಂದಿದ್ದಾರೆ .

ಎಲೆಕ್ಟ್ರಾನಿಕ್ಸ್‌ ಅಂಕಪಟ್ಟಿ: ತೇರ್ಗಡೆ ಹೊಂದಿರುವ ಅಭ್ಯರ್ಥಿಗಳಿಗೆ ಎಲೆಕ್ಟ್ರಾನಿಕ್ಸ್‌ ಅಂಕಪಟ್ಟಿ ಒದಗಿಸಲಾಗುತ್ತದೆ. ತಮ್ಮ ಹೆಸರಿನ ಮೊದಲ ಮೂರು ಅಕ್ಷರ ಅಥವಾ ಹುಟ್ಟಿದ ದಿನಾಂಕ ನಮೂದಿಸಿ ಅಂಕಪಟ್ಟಿ ಪಡೆಯಬಹುದಾಗಿದೆ. ವಾರದೊಳಗೆ ಈ ಸಂಬಂಧ ಲಿಂಕ್‌ ಅನ್ನು ಕೇಂದ್ರೀಕೃತ ದಾಖಲಾತಿ ಘಟಕದ ವೆಬ್‌ ಸೈಟ್‌ನಲ್ಲಿ ಪ್ರಕಟಿಸಲಾಗುತ್ತದೆ.