ತಾಯಿ ಸೇವೆಯಲ್ಲಿ 13 ಸಾವಿರಕ್ಕೂ ಹೆಚ್ಚು ಸ್ವಯಂಸೇವಕರು

Team Udayavani, Mar 12, 2019, 6:28 AM IST

ಪೊಳಲಿ :  ಧಾರ್ಮಿಕ ಕಾರ್ಯ ಆಯೋಜನೆ ಯಲ್ಲಿ ಭಕ್ತರನ್ನು ಸತ್ಕರಿಸಿ ನಿರ್ವಹಿಸುವುದು ಸವಾಲಿನ ಕಾರ್ಯ. ಆದರೆ ಪೊಳಲಿ ಶ್ರೀ ರಾಜರಾಜೇಶ್ವರೀ ಸನ್ನಿಧಿಯ ಬ್ರಹ್ಮಕಲಶೋತ್ಸವದಲ್ಲಿ ಪಾಲ್ಗೊಳ್ಳುವ ಭಕ್ತರ ನಿರ್ವಹಣೆ ಮೆಚ್ಚುಗೆಗೆ ಪಾತ್ರವಾಗಿದೆ. ಇದಕ್ಕಾಗಿ ಈವರೆಗೆ 13 ಸಾವಿರಕ್ಕೂ ಹೆಚ್ಚು ಮಂದಿ ಸ್ವಯಂಸೇವಕರು ದುಡಿದಿರುವುದು ವಿಶೇಷವಾಗಿದೆ. 

ಅನ್ನಛತ್ರ, ಪಾಕಶಾಲೆ, ಅತಿಥಿ ಸತ್ಕಾರ, ಉಗ್ರಾಣ, ಪಾರ್ಕಿಂಗ್‌, ರಕ್ಷಣೆ ಹೀಗೆ ಎಲ್ಲಿ ನೋಡಿದರೂ ಸ್ವಯಂಸೇವಕರ ಅಚ್ಚುಕಟ್ಟಿನ ಸೇವೆ ಎದ್ದು ಕಾಣುತ್ತಿದೆ. ಕ್ಷೇತ್ರದಲ್ಲಿ ನಿತ್ಯವೂ ಸರಾಸರಿ ಎರಡು ಸಾವಿರಕ್ಕೂ ಅಧಿಕ ಮಂದಿ ದುಡಿಯುತ್ತಿದ್ದಾರೆ. ಪ್ರತಿ ಕಾರ್ಯಕ್ಕೂ ಸ್ವಯಂಸೇವಕರನ್ನು ಸಂಪರ್ಕ ಕಾರ್ಯಾಲಯದಲ್ಲಿ ವಿಭಾಗಿಸಿ ಕಳುಹಿಸುವ ವ್ಯವಸ್ಥೆ ಮಾಡಲಾಗುತ್ತಿದೆ. 

    13,700ಕ್ಕೂ ಹೆಚ್ಚು ಮಂದಿ
ಬ್ರಹ್ಮಕಲಶದ ಸ್ವಯಂಸೇವಕರ ನೋಂದಣಿ ಆರಂಭಗೊಂಡ ಬಳಿಕ 225 ಪುರುಷರ ಹಾಗೂ 151 ಮಹಿಳೆಯರ ತಂಡಗಳ ನೋಂದಣಿ ಮಾಡಲಾಗಿದ್ದು,  ಒಟ್ಟು ಸ್ವಯಂಸೇವಕರ ಸಂಖ್ಯೆ 13,700 ಮೀರಿದೆ. ಪ್ರತಿ ತಂಡದಲ್ಲೂ ಕನಿಷ್ಠ 30 ಮಂದಿಯನ್ನು ನಿಗದಿಗೊಳಿಸಿದ್ದರೂ ಕೆಲವೊಂದು ಸಂದರ್ಭ ಹೆಚ್ಚಿನ ಸ್ವಯಂ ಸೇವಕರು ಆಗಮಿಸುತ್ತಿದ್ದಾರೆ. ಒಂದು ದಿನ ಮುಂಚಿತ ವಾಗಿ ಸ್ವಯಂಸೇವಕರನ್ನು ಪಟ್ಟಿ ಮಾಡಿ ಯಾವ ಕೆಲಸಕ್ಕೆ ಎಷ್ಟು ಮಂದಿ ಬೇಕು ಎಂದು ಸಂಬಂಧಪಟ್ಟವರ ಬಳಿ ವಿಚಾರಿಸಿ ಜವಾಬ್ದಾರಿ ಹಂಚಲಾಗುತ್ತದೆ. 

ಬಂಟ್ವಾಳ ತಾಲೂಕು ಸಹಿತ ದ.ಕ, ಉಡುಪಿ, ಕಾಸರಗೋಡು ಜಿಲ್ಲೆಗಳ ಬಹುತೇಕ ಪ್ರದೇಶದ ಸ್ವಯಂಸೇವಕರು ಬ್ರಹ್ಮಕಲಶ ಕಾರ್ಯದಲ್ಲಿ ತಮ್ಮ ಸೇವೆ ಸಲ್ಲಿಸಿದ್ದಾರೆ. ಫೆ. 26ರಿಂದಲೇ ಕ್ಷೇತ್ರದಲ್ಲಿ ಇದಕ್ಕಾಗಿ ಪ್ರತ್ಯೇಕ ಕಚೇರಿ ಕಾರ್ಯಾಚರಿಸುತ್ತಿದ್ದು, ನಿರಂತರವಾಗಿ ಸ್ವಯಂಸೇವಕರ ಜೋಡಣೆಯಲ್ಲಿ ತೊಡಗಿದೆ. ಕೆಲವೊಂದು ಸಂದರ್ಭ ಕ್ಷೇತ್ರಕ್ಕೆ ಕೈ ಮುಗಿಯಲು ಬಂದ ಭಕ್ತರೂ ಸೇವೆ ಮಾಡಲು ಅವಕಾಶ ನೀಡುವಂತೆ ಮನವಿ ಮಾಡುತ್ತಿದ್ದಾರೆ.

ವಿವಿಧ ಸಂಘ – ಸಂಸ್ಥೆಗಳು ಸ್ವಯಂ ಸೇವೆಗೆ ಬರುತ್ತಿರುವುದರಿಂದ ಒಮ್ಮೆ ಸೇವೆ ಸಲ್ಲಿಸಿದವರಿಗೆ ಬೇಡಿಕೆ ಇದ್ದರೂ ಮತ್ತೂಮ್ಮೆ ಅವಕಾಶ ನೀಡುವ ಪ್ರಮೇಯ ಕಡಿಮೆ ಇದೆ. 

   6,000ಕ್ಕೂ ಅಧಿಕ ಮಂದಿ
ಮಾ. 10ರಂದು ಪ್ರತಿಷ್ಠಾ ದಿನದಂದು 6,000ಕ್ಕೂ ಹೆಚ್ಚು ಮಂದಿ ಸ್ವಯಂಸೇವಕರು ಕಾರ್ಯ ನಿರ್ವ ಹಿಸಿದ್ದು, ಮಾ. 13ರಂದು ಇಷ್ಟೇ ಸಂಖ್ಯೆಯ ಸ್ವಯಂಸೇವಕರು ಕಾರ್ಯ ನಿರ್ವಹಿಸುವಂತೆ ವ್ಯವಸ್ಥೆ ಮಾಡಲಾಗುತ್ತಿದೆ ಎಂದು ಸಮಿತಿಯ ಉಪಾಧ್ಯಕ್ಷ ಪ್ರಕಾಶ್‌ ಬೆಳ್ಳೂರು ತಿಳಿಸಿದ್ದಾರೆ. 

    ಸ್ವತ್ಛತೆಗೆ ಪ್ರತ್ಯೇಕ
ಸ್ವತ್ಛತೆಗೆ ಪ್ರತ್ಯೇಕವಾಗಿ ಪತಂಜಲಿ ಯೋಗ  ಸಮಿತಿ ಹಾಗೂ ಮರೋಳಿ ಶ್ರೀ ಸೂರ್ಯ ನಾರಾಯಣ ಕ್ಷೇತ್ರದವರು ದುಡಿಯುತ್ತಿದ್ದಾರೆ. ಪತಂಜಲಿಯ ತಂಡ ಬೆಳಗ್ಗಿನ ಹೊತ್ತು ಹಾಗೂ ಮರೋಳಿಯ ತಂಡ ರಾತ್ರಿ ಕಾರ್ಯ ನಿರ್ವಹಿಸುತ್ತಿದೆ. ಇವರಿಗೆ ಅಗತ್ಯಕ್ಕೆ ತಕ್ಕಂತೆ ಸ್ವಯಂಸೇವಕರನ್ನು ಒದಗಿಸುವ ಕಾರ್ಯವನ್ನು ಸಮಿತಿ ಮಾಡುತ್ತಿದೆ.  

ಸಂದೇಶ/ಕರೆಯ ವ್ಯವಸ್ಥೆ
ಬ್ರಹ್ಮಕಲಶದ ಕಾರ್ಯ ನಿರ್ವಹಣೆಗಾಗಿ ಸ್ವಯಂಸೇವಕರ ನೋಂದಣಿಯ ಸಂದರ್ಭದಲ್ಲೇ ಅವರ ಮೊಬೈಲ್‌ ಸಂಖ್ಯೆ ಯನ್ನೂ ಪಡೆಯಲಾಗಿತ್ತು. ಸ್ವಯಂಸೇವಕರ ತಂಡ ಯಾವ ಕೆಲಸ ಮಾಡಬೇಕು ಹಾಗೂ ತಂಡಕ್ಕೆ ನಿಗದಿಗೊಂಡಿರುವ ಅವಧಿ ಏನು ಎಂಬುದನ್ನು ಬಿಟಿ-ಪೊಳಲಿ ಎಂಬ ಹೆಸರಿನಲ್ಲಿ ಸಂದೇಶವೊಂದನ್ನು ಕಳುಹಿಸಲಾಗುತ್ತದೆ. ಜತೆಗೆ ತಂಡದ ಮುಖ್ಯಸ್ಥನಿಗೆ ಕರೆ ಮಾಡಿ ತಿಳಿಸಲಾಗುತ್ತದೆ. ಒಟ್ಟು  ಸ್ವಯಂಸೇವಕರ ಜೋಡಣ ಕಾರ್ಯದಲ್ಲಿ  ಸಂಪರ್ಕ ಕಾರ್ಯಾಲಯದಲ್ಲಿ  25 ಮಂದಿ ಸ್ವಯಂಸೇವಕರೇ ದುಡಿಯುತ್ತಿದ್ದಾರೆ. 

 ಕನಿಷ್ಠ 30 ಮಂದಿಯ ತಂಡ
ಭಕ್ತರಿಂದ ತಾಯಿಯ ಬ್ರಹ್ಮಕಲಶಕ್ಕೆ ನಿರೀಕ್ಷೆಗೂ ಮೀರಿ ಸಹಕಾರ ಲಭಿಸಿದೆ. ಈವರೆಗೆ 13 ಸಾವಿರಕ್ಕೂ ಅಧಿಕ ಮಂದಿ ಸ್ವಯಂಸೇವಕರು ಭಾಗಿಗಳಾಗಿದ್ದಾರೆ. ಒಂದು ತಂಡದಲ್ಲಿ ಕನಿಷ್ಠ 30 ಮಂದಿ ಇರಲಿದ್ದು, ಗರಿಷ್ಠ 150 ಮಂದಿಯೂ ಭಾಗವಹಿಸಿದ್ದಿದೆ. 
ಫೆ. 26ರಿಂದಲೇ ಸ್ವಯಂಸೇವಕರ ಸಂಪರ್ಕ ಕಾರ್ಯಾಲಯ ಸ್ವಯಂಸೇವಕರ ಜೋಡಣೆಯಲ್ಲಿ ನಿರತವಾಗಿದೆ. ಪ್ರತಿಯೊಬ್ಬರಿಗೂ ಎಸ್ಸೆಮ್ಮೆಸ್‌ ಮೂಲಕ ಸಮಯ, ಕೆಲಸದ ಅವಧಿತಿಳಿಸಲಾಗುತ್ತದೆ. 
 - ಬಿ. ದೇವದಾಸ್‌ ಶೆಟ್ಟಿ, ಅಧ್ಯಕ್ಷರು ಸ್ವಯಂಸೇವಕ ನಿರ್ವಹಣ ಸಮಿತಿ

  ಕಿರಣ್‌ ಸರಪಾಡಿ