“ಬ್ಯಾಡ ಹೋಗು ಅಂದ್ಬುಟ್ಲು’: ಏನಿದು ಭಟ್ಟರ ಹೊಸ ಸಾಂಗ್?

Team Udayavani, Mar 12, 2019, 12:03 PM IST

ಸ್ಯಾಂಡಲ್​ವುಡ್​ನ ವಿಕಟಕವಿ ಹಾಗೂ ಖ್ಯಾತ ನಿರ್ದೇಶಕ ಯೋಗರಾಜ್‌ ಭಟ್‌ ಆ್ಯಕ್ಷನ್ ಕಟ್ ಹೇಳಿರುವ “ಪಂಚತಂತ್ರ’ ಚಿತ್ರದ ಫಸ್ಟ್ ಲುಕ್ ಹಾಗೂ ಹಾಡುಗಳು ಈಗಾಗಲೇ ಬಿಡುಗಡೆಯಾಗಿ ಸಾಮಾಜಿಕ ಜಾಲತಾಣದಲ್ಲಿ ಸಕತ್ ಸದ್ದು ಮಾಡುತ್ತಿದ್ದರೆ, ಇತ್ತ ಚಿತ್ರತಂಡ ಚಿತ್ರದ ಮತ್ತೊಂದು ಹಾಡನ್ನು ಬಿಡುಗಡೆ ಮಾಡಿದೆ. 

ಹೌದು, “ಬ್ಯಾಡ ಹೋಗು ಅಂದ್ಬುಟ್ಲು’ ಎಂಬ ಹಾಡು ಬಿಡುಗಡೆಯಾಗಿದ್ದು, ಸಿನಿರಸಿಕರಿಂದ ಹಾಡಿಗೆ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಅಲ್ಲದೇ ಯೂಟ್ಯೂಬ್ ಟ್ರೆಂಡಿಂಗ್‍ನಲ್ಲಿ ಸ್ಥಾನವನ್ನು ಪಡೆದಿದೆ. ಇದುವರೆಗೆ ಮೆಲೋಡಿ ಹಾಡುಗಳನ್ನು ಮಾತ್ರ ಹಾಡಿರುವ ಸಂಗೀತ ನಿರ್ದೇಶಕ ವಾಸುಕಿ ವೈಭವ್‌, ಯೋಗರಾಜ್‌ ಭಟ್‌ ಸಾಹಿತ್ಯವಿರುವ ಈ ಹಾಡಿಗೆ ಮೊದಲ ಬಾರಿ ಪ್ಯಾಥೊ ಸ್ಟೈಲ್‍ನಲ್ಲಿ ಹಾಡಿದ್ದಾರೆ. 

ಚಿತ್ರದಲ್ಲಿ ವಿಹಾನ್‌ಗೆ ನಾಯಕಿಯಾರಾಗಿ, ಸೊನಾಲ್, ಅಕ್ಷರ ಗೌಡ ಅಭಿನಯಿಸಿದ್ದು, ವಿ. ಹರಿಕೃಷ್ಣ ಸಂಗೀತ ನೀಡಿದ್ದಾರೆ. ಇನ್ನು ಇದೊಂದು ಯೂಥ್‌ಫ‌ುಲ್‌ ಕಥೆಯಾಗಿದ್ದು, ಹಾಸ್ಯದೊಂದಿಗೆ ನವಿರಾದ ಪ್ರೇಮಕಥೆ ಇದೆ. ಸಾಕಷ್ಟು ನೈಜತೆಗೆ ಹತ್ತಿರವಾಗಿರುವ ಅಂಶಗಳು ಚಿತ್ರದ ಮತ್ತೊಂದು ಹೈಲೈಟ್‌. ಮುಖ್ಯವಾಗಿ ಯುವಪೀಳಿಗೆಯನ್ನು ಮನಸ್ಸಲಿಟ್ಟುಕೊಂಡೇ ಭಟ್ಟರು ಕಥೆ ರಚಿಸಿದ್ದಾರೆ.

ಈಗಿನ ವಾಸ್ತವತೆಯ ಸಾರ ಚಿತ್ರದುದ್ದಕ್ಕೂ ಕಾಣಸಿಗಲಿದೆ. ಇದು ಭಟ್ಟರ 12ನೇ ಚಿತ್ರ ಎಂಬುದು ಇನ್ನೊಂದು ವಿಶೇಷ. ಚಿತ್ರದಲ್ಲಿ ರಂಗಾಯಣ ರಘು ಸೇರಿದಂತೆ ಅನೇಕರ ತಾರಾಬಳಗವಿದೆ. ಸುಜ್ಞಾನ್‌ ಅವರು ಕ್ಯಾಮೆರಾ ಕೈಚಳಕ, ಶಶಿಧರ್‌ ಅಡಪ ಅವರ ಕಲಾನಿರ್ದೇಶನ, ಸೇರಿದಂತೆ ಸುರೇಶ್‌ ಆರ್ಮುಗನ್‌ ಸಂಕಲನ ಚಿತ್ರಕ್ಕಿದೆ.