ರೆಬೆಲ್ ಸ್ಟಾರ್ ಅಭಿಮಾನಿಯ ಕಥೆ ಹೇಳಲಿದ್ದಾರೆ ರಾಕೇಶ್!

Team Udayavani, Mar 13, 2019, 12:01 PM IST

ಕಲಿಯುಗದ ಕರ್ಣ ಅಂತಲೇ ಹೆಸರಾಗಿ ಮರೆಯಾದ ನಂತರವೂ ಜೊತೆಗೇ ಇದ್ದಂತೆ ಭಾಸವಾಗುವ ವ್ಯಕ್ತಿತ್ವ ಹೊಂದಿದ್ದವರು ಅಂಬರೀಶ್. ಅವರು ಬದುಕಿದ್ದಾಗಲೇ ದಂತಕಥೆಯಾಗಿದ್ದವರು. ಇದೀಗ ಪತಿಬೇಕು ಡಾಟ್ ಕಾಮ್ ಚಿತ್ರದ ನಿರ್ದೇಶಕ  ತಮ್ಮ ಹೊಸಾ ಚಿತ್ರದಲ್ಲಿ ಅಂಬಿ ಅಭಿಮಾನಿಯೊಬ್ಬನ ರೋಚಕ ಕಥೆ ಹೇಳಲು ತಯಾರಾಗಿದ್ದಾರೆ!

ಪತಿಬೇಕು ಡಾಟ್ ಕಾಮ್ ಚಿತ್ರದ ಮೂಲಕವೇ ರಾಕೇಶ್ ಹೆಸರಾಗಿದ್ದಾರೆ. ಈ ಸಿನಿಮಾ ತೆರೆ ಕಾಣುತ್ತಲೇ ಮುಂದಿನ ಚಿತ್ರಕ್ಕಾಗಿ ತಯಾರಿ ಆರಂಭಿಸಿದ್ದ ರಾಕೇಶ್ ಹೊಸಾ ಚಿತ್ರಕ್ಕೆ ಫ್ಯಾನ್ ಆಫ್ ರೆಬೆಲ್ ಸ್ಟಾರ್ ಎಂಬ ವಿಶಿಷ್ಟವಾದ ಶೀರ್ಷಿಕೆ ಫೈನಲ್ ಮಾಡಿದ್ದಾರೆ.

ಇದು ರೆಬೆಲ್ ಸ್ಟಾರ್ ಅಭಿಮಾನಿಯೊಬ್ಬನ ಕಥೆ. ಮಂಡ್ಯ ಜಿಲ್ಲೆಯ ಗ್ಯಾಮ್ಯ ಶೈಲಿಯಲ್ಲಿ ಇಡೀ ಚಿತ್ರ ಮೂಡಿ ಬರಲಿದೆಯಂತೆ. ಹಾಗಾದ್ರೆ ಇದರ ಹೀರೋ ಯಾರೆಂಬ ಪ್ರಶ್ನೆ ಸಹಜ. ಅದರಲ್ಲಿಯೇ ರಾಕೇಶ್ ಬ್ರಹ್ಮಾಂಡ ಕುತೂಹಲವಿಟ್ಟಿದ್ದಾರೆ. ಅದನ್ನ ಎಲ್ಲರೂ ತಲೆಕೆಡಿಸಿಕೊಳ್ಳುವಂಥಾ ಒಗಟಾಗಿಸಿಬಿಟ್ಟಿದ್ದಾರೆ. ಯಾಕೆಂದರೆ ಈ ಚಿತ್ರದ ಹೀರೋ ರೆಬೆಲ್ ಸ್ಟಾರ್ ಅಂಬರೀಶ್ ಆಪ್ತ ವಲಯದಲ್ಲಿದ್ದವರೇ ಎನ್ನೋದರ ಹೊರತಾಗಿ ಬೇರ್ಯಾವ ಸುಳಿವನ್ನೂ ರಾಕೇಶ್ ಬಿಟ್ಟು ಕೊಟ್ಟಿಲ್ಲ.

ಪ್ರೇಕ್ಷಕರೀಗ ಆ ಹೀರೋ ಯಾರೆಂಬ ಬಗ್ಗೆ ತಲೆ ಕೆಡಿಸಿಕೊಂಡಿದ್ದಾರೆ. ಈಗಾಗಲೇ ಟೈಟಲ್ ಕೂಡಾ ರಿಜಿಸ್ಟರ್ ಆಗಿದೆ. ಶೀಘ್ರದಲ್ಲಿಯೇ ಅಂಬರೀಶ್ ಅಂತಿಮ ದರ್ಶನ ನಡೆದಿದ್ದ ಮಂಡ್ಯದ ಮೈದಾನದಲ್ಲಿ ಈ ಚಿತ್ರ ಆರಂಭವಾಗಲಿದೆಯಂತೆ. ಹೀರೋ ಯಾರೆಂದು ಯಾರೂ ಪತ್ತೆ ಹಚ್ಚದಿದ್ದರೆ ಸದ್ಯದಲ್ಲಿಯೇ ರಾಕೇಶ್ ಅದನ್ನು ಬಯಲು ಮಾಡಲಿದ್ದಾರೆ!