‘ಮೀನಿನ ಲಾರಿಗಳ ಗಲೀಜು ನೀರು ರಸ್ತೆಗೆ; ಶಾಶ್ವತ ಪರಿಹಾರಕ್ಕೆ ಕ್ರಮ`

Team Udayavani, Mar 16, 2019, 6:10 AM IST

ಮಹಾನಗರ : ಮೀನಿನ ಲಾರಿಗಳಿಂದ ರಸ್ತೆಯಲ್ಲಿ ನೀರು ಬಿದ್ದು ಸಮಸ್ಯೆ ಆಗುತ್ತಿರುವುದನ್ನು ಪೊಲೀಸರು ಗಂಭೀರವಾಗಿ ಪರಿಗಣಿಸಿದ್ದು, ಈ ಬಗ್ಗೆ ಶಾಶ್ವತ ಪರಿಹಾರ ಕ್ರಮವನ್ನು ಕೈಗೊಳ್ಳಲಾಗುವುದು ಎಂದು ಮಂಗಳೂರು ಪೊಲೀಸ್‌ ಕಮಿಷನರ್‌ ಸಂದೀಪ್‌ ಪಾಟೀಲ್‌ ತಿಳಿಸಿದ್ದಾರೆ. ಶುಕ್ರವಾರ ತಮ್ಮ ಕಚೇರಿಯಲ್ಲಿ ನಡೆದ ಫೋನ್‌ಇನ್‌ ಕಾರ್ಯಕ್ರಮದಲ್ಲಿ ಸಾರ್ವಜನಿಕರ ಅಹವಾಲುಗಳಿಗೆ ಸ್ಪಂದಿಸಿ ಮಾತನಾಡಿದರು.

‘ನೋ ಸ್ಮಾಕಿಂಗ್‌’ ಬೋರ್ಡ್‌ ಬಹುತೇಕ ಎಲ್ಲ ಸಾರ್ವಜನಿಕ ಸ್ಥಳಗಳಲ್ಲಿ ಇದೆ. ಆದರೆ ಸಾರ್ವಜನಿಕ ಸ್ಥಳದಲ್ಲಿ ಧೂಮಪಾನ ಮಾಡಿದರೆ ದೂರು ಕೊಡ ಬೇಕಾದ ಫೋನ್‌ ನಂಬರ್‌ ಇಲ್ಲ. ಯಾರಿಗೆ ದೂರು ನೀಡಬೇಕು ? ಹೆಸರು, ಫೋನ್‌ ನಂಬರ್‌ ನೀಡಿದರೆ ಉತ್ತಮ ಎಂದು ನಾಗರಿಕರೊಬ್ಬರು ಸಲಹೆ ಮಾಡಿದರು.

2ನೇ ಟೋಯಿಂಗ್‌ವಾಹನ ಸೇರ್ಪಡೆ
ನೋ ಪಾರ್ಕಿಂಗ್‌ ಏರಿಯಾ ಮತ್ತು ಎಲ್ಲೆಂದರಲ್ಲಿ ನಿಲುಗಡೆ ಮಾಡುವ ವಾಹನಗಳನ್ನು ಮೇಲೆತ್ತಿ ಸಾಗಿಸಲು ಈಗಾಗಲೇ ಒಂದು ಟೋಯಿಂಗ್‌ ವಾಹನ ಇದ್ದು, ಒಂದು ವಾರದಲ್ಲಿ 41 ವಾಹನಗಳನ್ನು ಎತ್ತಂಗಡಿ ಮಾಡಲಾಗಿದೆ. ಇದೀಗ ಇನ್ನೊಂದು ವಾಹನ ಬಂದಿದೆ. ಅದು ಇಂದಿನಿಂದ ಕಾರ್ಯ ನಿರ್ವಹಿಸಲಿದೆ. ಇನ್ನೂ ಎರಡು ಟೋಯಿಂಗ್‌ ವಾಹನಗಳು ಬರಲಿವೆ ಎಂದು ಕಮಿಷನರ್‌ ಸಾರ್ವಜನಿಕರ ದೂರಿಗೆ ಉತ್ತರಿಸುತ್ತಾ ತಿಳಿಸಿದರು. 

3 ದಿನಗಳಲ್ಲಿ 103 ಕೇಸು
ವಾಹನಗಳ ಕರ್ಕಶ ಹಾರ್ನ್ ವಿರುದ್ಧ ಕಾರ್ಯಾಚರಣೆ ಮುಂದುವರಿಸಬೇಕು ಎಂದು ಸಾರ್ವಜನಿಕರೊಬ್ಬರು ಸಲಹೆ ನೀಡಿದರು. ಉತ್ತರಿಸಿದ ಸಂದೀಪ್‌ ಪಾಟೀಲ್‌, ಮೂರು ದಿನ ನಡೆಸಿದ ಕಾರ್ಯಾಚರಣೆಯಲ್ಲಿ 103 ವಾಹನಗಳ ವಿರುದ್ಧ ಕ್ರಮಕೈಗೊಳ್ಳಲಾಗಿದೆ. ಇದನ್ನು ಮುಂದುವರಿಸಲಾಗುವುದು ಎಂದರು. ಲಾರಿ, ಇತರ ಗೂಡ್ಸ್‌ ವಾಹನಗಳಲ್ಲಿ ಮರಳು ಮತ್ತು ಮಣ್ಣು ಸಾಗಿಸುವಾಗ ಮೇಲ್ಗಡೆ ಟರ್ಪಾಲಿನ್‌ ಮುಚ್ಚದೆ ಕಾರ್ಯಾಚರಣೆ ಮಾಡುತ್ತಿದ್ದ ಬಗ್ಗೆ ಕಳೆದ ವಾರದಲ್ಲಿ 41 ಪ್ರಕರಣ ದಾಖಲಿಸಲಾಗಿದೆ. ವಾಹನಗಳ ಮಾಲಕರನ್ನು ಕರೆಸಿ ತಿಳಿವಳಿಕೆ ನೀಡ ಲಾಗಿದೆ ಎಂದು ಕಮಿಷನರ್‌ ತಿಳಿಸಿದರು. 

ಇದು 109ನೇ ಫೋನ್‌ ಇನ್‌ ಕಾರ್ಯಕ್ರಮವಾಗಿದ್ದು, ಒಟ್ಟು 32 ಕರೆಗಳು ಬಂದವು. ಡಿಸಿಪಿಗಳಾದ ಹನುಮಂತರಾಯ, ಉಮಾ ಪ್ರಶಾಂತ್‌, ಎಸಿಪಿಗಳಾದ ಮಂಜುನಾಥ್‌ ಶೆಟ್ಟಿ , ವಿನಯ್‌ ಎ. ಗಾಂವ್‌ಕರ್‌, ಇನ್‌ಸ್ಪೆಕ್ಟರ್‌ ಗಳಾದ ಹರೀಶ್‌ ಕೆ. ಪಟೇಲ್‌, ಅಶೋಕ್‌ ಕುಮಾರ್‌, ಎಎಸ್‌ಐ ಯೋಗೇಶ್ವರನ್‌, ಹೆಡ್‌ಕಾನ್‌ಸ್ಟೆಬಲ್‌ ಪುರುಷೋತ್ತಮ, ಕೆನರಾ ಬಸ್‌ ಮಾಲಕರ ಸಂಘದ ಅಧ್ಯಕ್ಷ ರಾಜವರ್ಮ ಬಲ್ಲಾಳ್‌, ದ.ಕ. ಬಸ್‌ ಮಾಲಕರ ಸಂಘದ ಅಧ್ಯಕ್ಷ ದಿಲ್‌ರಾಜ್‌ ಆಳ್ವ ಉಪಸ್ಥಿತರಿದ್ದರು.

ಇತರ ದೂರುಗಳು 
 ಗುರುಪುರ ಕೈಕಂಬದಲ್ಲಿ ನೋ ಪಾರ್ಕಿಂಗ್‌ನಲ್ಲಿ ವಾಹನ ನಿಲ್ಲಿಸುತ್ತಾರೆ.
 ಬಜಪೆ ಪೇಟೆಯಲ್ಲಿ 2018ರಲ್ಲಿ 8 ಕಡೆ ರಸ್ತೆಯ ಝೀಬ್ರಾ ಕ್ರಾಸಿಂಗ್‌ಗೆ ಹಾಕಿದ್ದ ಬಣ್ಣ ಕಳಚಿ ಹೋಗಿದೆ.
 ದೇರಳಕಟ್ಟೆ ಸಮೀಪದ ಕುತ್ತಾರ್‌ ಪದವಿನ ಬಹು ಮಹಡಿ ಕಟ್ಟಡದ ಗಲೀಜು ನೀರನ್ನು ತರೆದ ಚರಂಡಿ, ರಸ್ತೆಗೆ ಬಿಡಲಾಗುತ್ತಿದೆ.