ಮಯಾಮಿ ಓಪನ್‌ ಟೆನಿಸ್‌ ಪ್ರಿ-ಕ್ವಾರ್ಟರ್‌ ತಲುಪಿದ ಜೊಕೋವಿಕ್‌

Team Udayavani, Mar 26, 2019, 6:00 AM IST

ಮಯಾಮಿ: “ಮಯಾಮಿ ಓಪನ್‌’ ಕೂಟದಲ್ಲಿ ನಂ.ವನ್‌ ಟೆನಿಸಿಗ ನೋವಾಕ್‌ ಜೊಕೋವಿಕ್‌, ಸಿಮೋನಾ ಹಾಲೆಪ್‌ ಹಾಗೂ ವೀನಸ್‌ ವಿಲಿಯಮ್ಸ್‌ ಪ್ರಿ-ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ.

7ನೇ ಪ್ರಶಸ್ತಿ ಮೇಲೆ ಗುರಿಯಿಟ್ಟಿರುವ ಜೊಕೋವಿಕ್‌ ಸೋಮವಾರದ ಪಂದ್ಯದಲ್ಲಿ ಆರ್ಜೆಂಟೀನಾದ ಫೆಡ್ರಿಕೊ ಡೆಲ್ಬೋನಿಸ್‌ ವಿರುದ್ಧ 7-5, 4-6, 6-1 ಸೆಟ್‌ಗಳಿಂದ ಸೋಲಿಸಿದರು.

ಈ ಗೆಲುವಿನ ಮೂಲಕ ಜೊಕೋವಿಕ್‌ ಆರ್ಜೆಂಟೀನಾ ಆಟಗಾರರ ವಿರುದ್ಧ ತಮ್ಮ ದಾಖಲೆಯನ್ನು ಇನ್ನಷ್ಟು ಉತ್ತಮಪಡಿಸಿಕೊಂಡರು. 2007ರಿಂದ ಆರ್ಜೆಂಟೀನಾದ ಆಟಗಾರ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ಮಾತ್ರ ಜೊಕೋವಿಕ್‌ ವಿರುದ್ಧ ಗೆಲುವು ದಾಖಲಿಸಿದ್ದರು. ಉಳಿದಂತೆ ಆರ್ಜೆಂಟೀನಾದ ಯಾವುದೇ ಆಟಗಾರ ಜೊಕೋ ವಿರುದ್ಧ ಮೇಲುಗೈ ಸಾಧಿಸಿಲ್ಲ.

ಜೊಕೋವಿಕ್‌ ಅವರ ಮುಂದಿನ ಎದುರಾಳಿ 22ನೇ ಶ್ರೇಯಾಂಕಿತ ಸ್ಪೇನ್‌ ಟೆನಿಸಿಗ ರಾಬರ್ಟೊ ಬಟಿಸ್ಟ ಅಗುಟ್‌. ಅವರು ಇಟಲಿಯ ಫ್ಯಾಬಿಯೊ ಫೊಗ್ನಿನಿ ವಿರುದ್ಧ 6-1, 6-4 ನೇರ ಸೆಟ್‌ಗಳಿಂದ ಜಯ ಸಾಧಿಸಿದರು.

ಹಾಲಿ ಚಾಂಪಿಯನ್‌, ಅಮೆರಿಕದ ಜಾನ್‌ ಇಸ್ನರ್‌ ಸ್ಪೇನ್‌ನ ಆಲ್ಬರ್ಟ್‌ ರವೋಸ್‌ ವಿನೋಲಸ್‌ ಅವರನ್ನು 7-5, 7-6 (8-6) ಸೆಟ್‌ಗಳಿಂದ ಸೋಲಿಸಿದರು. ಮುಂದಿನ ಪಂದ್ಯದಲ್ಲಿ ಅವರ ಎದುರಾಳಿ ಬ್ರಿಟನ್ನಿನ ಕೈಲ್‌ ಎಡ್ಮಂಡ್‌. ಅವರು ಕೆನಡಾದ ಮಿಲೋಸ್‌ ರಾನಿಕ್‌ ವಿರುದ್ಧ 6-4, 6-4 ನೇರ ಸೆಟ್‌ಗಳಿಂದ ಗೆದ್ದರು.

ಹಾಲೆಪ್‌-ವೀನಸ್‌ ಮುಖಾಮುಖೀ
ನಂ.1 ಪಟ್ಟವನ್ನು ಮತ್ತೆ ಪಡೆಯುವ ಕನಸನ್ನು ಜೀವಂತವಾಗಿರಿಸಿರುವ ರೊಮೇನಿಯಾದ ಸಿಮೋನಾ ಹಾಲೆಪ್‌ ಸ್ಲೋವೆನಿಯಾದ ಪೊಲೊನಾ ಹರ್ಕಾಂಗ್‌ ವಿರುದ್ಧ 5-7, 7-6 (7-1), 6-2 ಜಯಿಸಿ 16ನೇ ಸುತ್ತು ಪ್ರವೇಶಿಸಿದ್ದಾರೆ. ಇಲ್ಲಿ ಅವರು ವೀನಸ್‌ ವಿಲಿಯಮ್ಸ್‌ ವಿರುದ್ಧ ಆಡಲಿದ್ದಾರೆ. ಸದ್ಯ 3ನೇ ರ್‍ಯಾಂಕಿನಲ್ಲಿರುವ ಹಾಲೆಪ್‌ ಚೊಚ್ಚಲ “ಮಯಾಮಿ ಓಪನ್‌’ ಜಯಿಸಿದರೆ ಮತ್ತೆ ಅಗ್ರಸ್ಥಾನಕ್ಕೇರುವ ಅವಕಾಶವಿದೆ.

ಇನ್ನೊಂದು ಪಂದ್ಯದಲ್ಲಿ 7 ಬಾರಿಯ ಗ್ರ್ಯಾನ್‌ ಸ್ಲಾಮ್‌ ಚಾಂಪಿಯನ್‌ ವೀನಸ್‌ ವಿಲಿಯಮ್ಸ್‌ ರಶ್ಯದ ದರಿಯಾ ಕಸತ್ಕಿನಾ ಅವರನ್ನು 6-3, 6-1 ನೇರ ಗೇಮ್‌ಗಳಿಂದ ಸೋಲಿಸಿದರು.

ಚಾಂಪಿಯನ್‌ ಸ್ಟೀಪನ್ಸ್‌ ಔಟ್‌
ಇನ್ನೊಂದೆಡೆ ಅಮೆರಿಕದ ಸ್ಲೋನ್‌ ಸ್ಟೀಫ‌ನ್ಸ್‌ ಅವರ ಪ್ರಶಸ್ತಿ ಉಳಿಸಿಕೊಳ್ಳುವ ಆಟ ಕೊನೆಗೊಂಡಿದೆ. ಅವರು ಜರ್ಮನಿಯ ತಜಾನಾ ಮರಿಯಾ ವಿರುದ್ಧ 6-3, 6-2 ಸೆಟ್‌ಗಳಿಂದ ಪರಾಭವಗೊಂಡರು. ಸ್ಪೀಫ‌ನ್ಸ್‌ ಅವರಿಗಿದು ಎರಡನೇ ಅನಿರೀಕ್ಷಿತ ಸೋಲು. ಕಳೆದ ಇಂಡಿಯನ್‌ ವೆಲ್ಸ್‌ ಕೂಟದಲ್ಲಿ ಅವರು 3ನೇ ಸುತ್ತಿನಲ್ಲೇ ಎಡವಿದ್ದರು.