ಸೆನ್ಸೆಕ್ಸ್‌ ಭರ್ಜರಿ 425 ಅಂಕ ಜಿಗಿತ, ನಿಫ್ಟಿ 11,483, ರೂಪಾಯಿ ಬಲವರ್ಧನೆ

Team Udayavani, Mar 26, 2019, 4:33 PM IST

ಮುಂಬಯಿ : ಎರಡು ದಿನಗಳ ನಿರಂತರ ಸೋಲಿನ ಬಳಿಕ ಇಂದು ಮಂಗಳವಾರ ಲಾಭದ ಹಾದಿ ಹಿಡಿದ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ, ದಿನದ ವಹಿವಾಟನ್ನು 425 ಅಂಕಗಳ ಭರ್ಜರಿ ಜಿಗಿತದೊಂದಿಗೆ 38,000 ಅಂಕಗಳ ಮನೋ ಪ್ರಾಬಲ್ಯದ ಗಡಿ ದಾಟಿ ವಿಜೃಂಭಿಸುವಲ್ಲಿ ಸಫ‌ಲವಾಯಿತು.

ಇದೇ ರೀತಿ 11,500 ಅಂಕಗಳ ಗಡಿ ದಾಟುವಲ್ಲಿ ಸಫ‌ಲವಾದ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 129 ಅಂಕಗಳ ಏರಿಕೆಯೊಂದಿಗೆ ದಿನದ ವಹಿವಾಟನ್ನು 11,483.25 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ಮುಂಬಯಿ ಶೇರು ಕಳೆದೆರಡು ದಿನಗಳ ವಹಿವಾಟಿನಲ್ಲಿ 575 ಅಂಕಗಳ ನಷ್ಟಕ್ಕೆ ಗುರಿಯಾಗಿತ್ತು. ಡಾಲರ್‌ ಎದುರು ರೂಪಾಯಿ ಇಂದು 19 ಪೈಸೆಗಳಷ್ಟು ಬಲಗೊಂಡು 68.77 ರೂ. ಮಟ್ಟದಲ್ಲಿ ವ್ಯವಹಾರ ನಿರತವಾಗಿತ್ತು.

ಮುಂಬಯಿ ಶೇರು ಪೇಟೆಯಲ್ಲಿಂದು ಒಟ್ಟು 2,858 ಕಂಪೆನಿಗಳ ಶೇರುಗಳು ವಹಿವಾಟಿಗೆ ಒಳಪಟ್ಟವು; ಈ ಪೈಕಿ 1,407 ಶೇರುಗಳು ಮುನ್ನಡೆ ಸಾಧಿಸಿದವು; 1,288 ಶೇರುಗಳು ಹಿನ್ನಡೆಗೆ ಗುರಿಯಾದವು; 163 ಶೇರುಗಳ ಧಾರಣೆ ಯಾವುದೇ ಬದಲಾವಣೆ ಕಾಣಲಿಲ್ಲ.